“ʻOku ʻIkai Te U Kei Hoko ko ha Pōpula ki he Fakamālohí”

KO HOKU KUOHILÍ

Naʻe fanauʻi au ʻi he kolo ko Calgary ʻi Alberta, Kānata. ʻI heʻeku kei siʻí, naʻe vete ai ʻeku ongo mātuʻá pea naʻá ku hiki mo ʻeku fineʻeikí ki he ʻapi ʻo ʻene ongo mātuʻá. Naʻe ʻofa moʻoni ʻeku ongo kuí ʻiate au mo ʻeku faʻeé pea naʻá ku maʻu ha moʻui fakafiefia. ʻOku ou kei manatu melie pē ki he ngaahi taimi nonga ko ia ʻi heʻeku kei siʻí.

ʻI heʻeku taʻu fitú, naʻe liliu ʻeku moʻuí ʻo toe kovi ange ʻi he taimi naʻe toe mali ai ʻeku faʻeé mo ʻeku tamaí pea naʻa mau hiki ki St.Louis, Missouri ʻi ʻAmelika. Ka naʻe vave ʻeku fakatokangaʻi ʻa e faʻa anga-fakamamahi ʻeku tamaí. Ko e fakatātaá, ʻi heʻeku foki mai ʻi he ʻuluaki ʻahó mei heʻeku ako foʻoú, naʻá ne ʻiloʻi naʻe fakamamahiʻi au pea naʻe ʻikai ke u fai ha meʻa. Naʻá ne ʻita lahi ʻaupito pea tā lahi ange au ʻi he meʻa naʻe fai mai ʻe he tamaiki akó! Naʻá ku ako mei ai pea kamata ke u fuhu mo e tamaiki kehé ʻi heʻeku kei taʻu fitú pē.

Ko e tōʻonga ʻiteʻita ʻeku tamaí naʻá ne ʻai ʻeku faʻeé ke ne hoko ʻo loto-kona pea naʻá na faʻa kē ʻo felāuaki. Naʻe kamata ke u ngāuekoviʻaki ʻa e faitoʻo kona tapú mo e ʻolokaholó ʻi heʻeku taʻu 11. Naʻá ku hoko ʻo toe fuʻu anga-kakaha ange pea faʻa kau ki he ngaahi fuhu ʻi he hala puleʻangá. ʻI he taimi naʻá ku ʻosi ai mei he kolisí, naʻá ku hoko ko ha tokotaha anga-fakamālohi ʻaupito.

ʻI heʻeku taʻu 18, naʻá ku kau ki he U.S. Marine Corps. ʻI aí naʻá ku ako ai ʻa e founga ki he fetāmateʻakí. Hili e taʻu ʻe nima mei ai, naʻá ku mavahe mei he ngāue fakakautaú ke ako ki he saienisi ʻo e ʻatamaí ʻi he taumuʻa ke ngāue ʻi he Potungāue Fakatahataha ʻo e Fakatotoló (FBI). Naʻá ku kamata ako ʻi he ʻunivēsiti ʻo ʻAmeliká pea naʻá ku hoko atu ki Kānata hili ia ʻeku toe hiki ki aí.

ʻI he ʻunivēsití naʻe hoko ʻo siva ʻaupito ʻeku ʻamanakí ʻi he faʻahinga ʻo e tangatá pea mo e sōsaietí fakalūkufua. Ko e kakaí naʻe hā ngali naʻa nau fuʻu siokita, ko e meʻa kotoa ʻi he māmaní naʻe hā ngali ko e koto ngeʻesi pē pea ko e ngaahi palopalema ʻa e faʻahinga ʻo e tangatá naʻe hā ngali ʻoku ʻikai ha fakaleleiʻanga. Naʻe siva ai ʻeku ʻamanakí heʻikai lava ʻe he faʻahinga ʻo e tangatá ʻo ʻai ʻa e māmaní ke hoko ko ha feituʻu lelei ange.

ʻI he ʻikai ha taumuʻa ʻi he moʻuí, naʻe kamata ke u ngāuekoviʻaki ʻa e ʻolokaholó, faitoʻo kona tapú, fehokotaki fakasinó mo e mānumanu ki he paʻangá. Ko e meʻa pē naʻá ku fakakaukau ki aí, ko e hiki mei he paati ki he paati pea mei he fefine ki he fefine. Koeʻuhi ko ʻeku kau ki he ako fakakautaú, naʻá ku maʻu ʻa e loto-toʻa ke fuhu maʻu pē mo e kakaí. Naʻá ku fakakaukau ʻe lava ke u fili ʻa e meʻa ʻoku tonú mo e halá pea fehangahangai mo e faʻahinga ne u fakakaukau naʻe taʻefaitotonú. Ka ko hono moʻoní, naʻá ku fakaʻatā ʻa e fakamālohí ke ne puleʻi ʻeku moʻuí.

FOUNGA HONO LILIU ʻE HE TOHI TAPÚ ʻEKU MOʻUÍ

ʻI he ʻaho ʻe taha lolotonga ʻema ngāueʻaki mo hoku kaungāmeʻá ʻa e faitoʻo kona tapú ʻi lalo fale ʻi hoku ʻapí pea teuteu ha uta maliuana taʻefakalao ke fakatau atu, naʻe ʻeke mai ʻe hoku kaungāmeʻá pe ʻoku ou tui ki he ʻOtuá. Naʻá ku tali ange, “Kapau ko e ʻOtuá ʻokú ne fakatupunga ʻa e faingataʻá ʻi he māmaní, ʻoku ʻikai ke u fieʻilo ki ai!” ʻI he ʻaho hono hokó, ko e fuofua taimi ia ke u ngāue ʻi ha ngāue foʻou, naʻe ʻeke mai ʻe ha kaungāngāue ʻa ia ko ha taha ʻo e Kau Fakamoʻoni ʻa Sihová, “ʻOkú ke pehē ʻoku fakatupunga ʻe he ʻOtuá ʻa e faingataʻá ʻi he māmaní?” Naʻá ku ʻohovale koeʻuhí naʻá ku toki lāulea ki he fehuʻi tatau ʻi he ʻaho ki muʻá pea naʻá ku fieʻilo lahi ange ki ai. ʻI he māhina ʻe ono hokó, naʻá ma fetalanoaʻaki lahi ange pea naʻá ne fakahaaʻi mai ʻa e ngaahi tali Fakatohitapu ki he niʻihi ʻo ʻeku ngaahi fehuʻi faingataʻa taha ʻi he moʻuí.

Ko e fefine naʻá ku teu mali mo iá ʻa ia naʻá ma nofo ʻi he taimi ko iá, naʻe ʻikai ke ne loto ke u vahevahe ange ʻa e meʻa naʻá ku akó. ʻI ha Sāpate ʻe taha naʻá ku tala ange kiate ia, naʻá ku fakaafeʻi ʻa e Kau Fakamoʻoní ki homa ʻapí ke mau ako Tohi Tapu. ʻI he ʻaho hono hokó, naʻá ku foki mai mei he ngāué ʻo ʻiloʻi kuó ne ʻave ʻa e meʻa kotoa mei he falé pea naʻá ne liʻaki au. Naʻá ku hū ki tuʻa ʻo tangi. Naʻá ku lotu ki he ʻOtuá ʻo kōlenga ki heʻene tokoní. Ko e fuofua taimi ia naʻá ku ngāueʻaki ai ʻa e huafa fakafoʻituitui ʻo e ʻOtuá ʻa e Sihová ʻi he lotú.​—Saame 83:18.

ʻI he ʻaho ʻe ua ki mui ai, ko e fuofua taimi ia naʻá ku ako ai ʻa e Tohi Tapú mo e Kau Fakamoʻoní, mo ha ongo meʻa mali. ʻI he hili ʻena mavahé naʻá ku hoko atu hono lau ʻa e tohi ako Te Ke Malava ʻo Moʻui Taʻengata he Palataisi ʻi he Māmaní, pea ʻosiki ia ʻi he pō pē ko iá.a Ko e meʻa naʻá ku ako fekauʻaki mo Sihova ko e ʻOtuá mo hono ʻAló ʻa Sīsū Kalaisí, naʻe maongo ia ki hoku lotó. Naʻá ku ʻiloʻi ko Sihová ʻokú ne manavaʻofa pea ʻokú ne loto-mamahi ʻi he taimi ʻoku tau faingataʻaʻia aí. (ʻAisea 63:9) Naʻe tautefito ʻene maongo loloto kiate aú ʻa e ʻofa lahi ʻa e ʻOtuá mo e feilaulau huhuʻi naʻe fai ʻe hono ʻAló maʻakú. (1 Sione 4:10) Naʻá ku fakamulitukuʻaki kuo anga-kātaki ʻa Sihova kiate au “koeʻuhí ʻoku ʻikai te ne finangalo ke fakaʻauha ha taha ka ʻokú ne finangalo ke aʻusia ʻe he tokotaha kotoa ʻa e fakatomalá.” (2 Pita 3:9) Naʻá ku ongoʻi naʻe tohoakiʻi au ʻe Sihova kiate ia.​—Sione 6:44.

Ko e uike pē ko iá naʻe kamata ke u maʻu ʻa e ngaahi fakataha ʻa e fakatahaʻangá. Naʻe lōloa hoku ʻulú, tui ʻa e ngaahi hau pea hangē ha tokotaha fakailifiá ka neongo ia, naʻe fakafeangai mai ʻa e Kau Fakamoʻoní ʻo hangē ha kāinga naʻe fuoloa ʻene pulí. Naʻa nau fakafeangai ʻo hangē ko e kau Kalisitiane moʻoní. Naʻá ku ongoʻi nonga ʻo hangē ko ia ko e taimi naʻá ku nofo ai mo ʻeku ongo kuí, ka ʻi ha ʻātakai naʻe toe fakaofo ange ia.

Ko e ngaahi meʻa naʻá ku ako mei he Tohi Tapú naʻe kamata ke ne liliu ʻeku moʻuí. Naʻá ku kosi hoku ʻulú, taʻofi ʻa e ngaahi tōʻonga kotoa pē ʻo e fehokotaki fakasino taʻetāú pea taʻofi ʻa hono ngāueʻaki ʻa e faitoʻo kona tapú mo e ʻolokaholó. (1 Kolinitō 6:9, 10; 11:14) Naʻá ku loto ke fakahōifuaʻi ʻa Sihova. Ko ia ʻi heʻeku ʻiloʻi ʻoku taʻefakahōifua kia Sihova ha meʻa naʻá ku fai, naʻe ʻikai ʻaupito ke u kumi kalofanga. ʻI hono kehé, naʻe faʻa ongoʻi tautea hoku lotó. Naʻá ku faʻa pehē loto, ‘ʻoku ʻikai totonu ke u toe fai e tōʻonga ko iá.’ ʻI he ʻikai toe tatalí naʻá ku feinga leva ke liliu ʻeku tōʻongá mo e fakakaukaú. Ko e olá, naʻe kamata ke u maʻu ʻaonga mei hono fai ʻa e ngaahi meʻá ʻi he founga ʻa Sihová. ʻI he ʻaho 29 ʻo Siulai, 1989 ʻa ia ko e māhina ia ʻe ono talu mei heʻeku fuofua ako ʻa e Tohi Tapú, naʻá ku papitaiso ai ko e taha ʻo e Kau Fakamoʻoni ʻa Sihová.

FOUNGA ʻO ʻEKU MAʻU ʻAONGÁ

Kuo tokoni ʻa e Tohi Tapú ke liliu hoku angaʻitangatá. ʻI he kuohilí naʻá ku faʻa anga-fakamālohi ʻi he feangainga mo ha tokotaha fakafepaki. Ka ʻi he taimí ni, ʻoku ou ngāue mālohi ke “nofo melino mo e tangata kotoa pē.” (Loma 12:18) ʻOku ou fakamālō maʻu ai pē kia Sihova koeʻuhí ko e malava ko ia ʻe he mālohi ʻo ʻene Folofolá mo hono laumālie māʻoniʻoní ke ne liliu ʻeku moʻuí.​—Kalētia 5:22, 23; Hepelū 4:12.

ʻI he ʻikai ke toe hoko ko ha pōpula ki he faitoʻo kona tapú, fakamālohí mo e ngaahi holi taʻetāú, ʻoku ou feinga mālohi ke fakahōifuaʻi ʻa Sihova ko e ʻOtuá pea ʻoange kiate ia hoku lelei tahá. ʻOku kau ki ai ʻa hono tokoniʻi ʻa e niʻihi kehé ke hoko ʻo ʻiloʻi ia. Hili ha ngaahi taʻu siʻi mei heʻeku papitaisó, naʻá ku hiki ki ha feituʻu kehe ʻe taha ʻa ia naʻe ʻi ai ʻa e fiemaʻu lahi ange ki ha kau ʻevangeliō. ʻI he faai mai ʻa e ngaahi taʻú, kuó u maʻu ʻa e fiefia ʻi hono akoʻi ʻa e kakai tokolahi pea sio ki he founga hono liliu ʻe he Tohi Tapú ʻenau moʻuí foki. ʻOku ou toe fiefia lahi foki koeʻuhí ko e hoko ko ia ʻeku faʻeé ko e taha ʻo e Kau Fakamoʻoni ʻa Sihová​—ko e ʻuhinga ʻe tahá naʻá ne sio ki he ngaahi liliu ʻi heʻeku tōʻongá mo e angaʻitangatá.

ʻI he 1999, ʻi El Salvador, naʻá ku maʻu tohi fakamoʻoni ako ai mei he ako ʻoku ui ʻi he taimí ni ko e Ako Maʻá e Kau ʻEvangeliō ʻo e Puleʻangá. Ko e ako ko iá naʻá ne teuʻi mo akoʻi au ki he founga ke takimuʻa ʻi he ngāue fakaʻevangelioó pea ke faiako mo tokangaʻi ʻa e fakatahaʻangá. Ki mui ai, ʻi he taʻu ko iá, naʻá ku mali mo hoku uaifi ʻofaʻangá ʻa Eugenia. ʻOkú ma ngāue fakataha ko ha ongo malanga taimi-kakato ʻi Kuatemala.

ʻI he taimi ní, ʻoku ʻikai ke kei siva ʻeku ʻamanakí ka ʻoku ou fiefia lahi ʻaupito. Ko hono ngāueʻaki ʻa e ngaahi akonaki Fakatohitapú kuó ne fakatauʻatāinaʻi au mei he fehokotaki fakasino taʻetāú mo e fakamālohí pea kuó ne ʻomai ʻa e moʻui ʻoku fonu ʻi he ʻofa moʻoni mo e fiemālie.