Sione 16:33—“Kuó U Ikuna ʻa e Māmaní”

“Kuó u leaʻaki ʻa e ngaahi meʻá ni kiate kimoutolú koeʻuhi ke mou maʻu ʻiate au ʻa e nongá. ʻI he māmaní te mou maʻu ai ʻa e mamahi, kae loto-toʻa! Kuó u ikuna ʻa e māmaní.”​—Sione 16:33, Liliu Tohi Tapu Māmani Foʻoú.

“Kuou tala ae gaahi mea ni kiate kimoutolu, koeuhi ke mou maʻu ae fiemalie iate au. Te mou maʻu ae mamahi i mamani: ka mou loto toʻa; kuou ikuʻi a mamani.”​—Sione 16:33, Paaki Motuʻa.

ʻUhinga ʻo e Sione 16:33

ʻI he ngaahi lea ko ení, ʻoku fakapapauʻi loto-māfana ʻe Sīsū ki hono kau muimuí ʻe lava ke nau lavameʻa foki ʻi hono fakahōifuaʻi ʻa e ʻOtuá neongo ʻa e ngaahi ʻahiʻahí mo e fakafepakí.

“Kuó u leaʻaki ʻa e ngaahi meʻá ni kiate kimoutolú koeʻuhi ke mou maʻu ʻiate aua ʻa e nongá.” Ko e toenga ʻo e vēsí ʻokú ne fakahaaʻi ko e nonga ko ení ʻoku ʻikai ʻuhinga ia ki he ʻikai ha fepaki. ʻI hono kehé, ko e nonga ia ʻo e lotó mo e ʻatamaí. Ko e nonga ʻi loto ko ení ʻoku malava ia “koeʻuhi” ko Sīsū, ʻa ia naʻá ne talaʻofa ke ʻomai ʻa e laumālie māʻoniʻoní. Ko e “tokoni” mālohi ko ení te ne ʻai ke malava ʻa e kau ākonga ʻa Sīsuú ʻo lavameʻa ʻi he fehangahangai mo ha faʻahinga faingataʻa pē.​—Sione 14:16, 26, 27.

“ʻI he māmaní te mou maʻu ai ʻa e mamahi, kae loto-toʻa!” Naʻe fakahaaʻi tonu ʻe Sīsū ko ʻene kau ākongá te nau fehangahangai mo e ngaahi ʻahiʻahi, ʻo hangē ko e fakamaau taʻetotonú mo e fakatangá. (Mātiu 24:9; 2 Tīmote 3:12) Neongo ia, naʻe ʻi ai ʻa e ʻuhinga ke nau hoko ai ʻo “loto-toʻa” pe “loto-lahi.”​—Sione 16:33, New International Version.

“Kuó u ikuna ʻa e māmaní.” ʻI hení, ko e foʻi lea “māmani” ʻoku ʻuhinga ia ki he sōsaieti taʻemāʻoniʻoni ʻo e faʻahinga ʻo e tangatá ʻa ia ʻoku fakamavaheʻi mei he ʻOtuá.b ʻOku pehē ʻi he 1 Sione 5:19: “Ko e māmaní kotoa ʻoku tokoto ia ʻi he mafai ʻo e tokotaha fulikivanú” pe ko Sētane. Ko ia ai, ko e kakai ʻo e “māmani” ko ení, ʻoku nau fakakaukau mo ngāue ʻo fakafepaki ki he finangalo ʻo e ʻOtuá.​—1 Sione 2:15-17.

Naʻe feinga ʻa Sētane mo hono māmaní ke taʻofi ʻa Sīsū mei hono fakahoko ʻa e finangalo ʻo e ʻOtuá, ʻa ia naʻe kau ki ai hono akoʻi ʻe Sīsū ʻa e niʻihi kehé fekauʻaki mo e ʻOtuá mo hono foaki atu ʻene moʻui haohaoá ko ha huhuʻi. (Mātiu 20:28; Luke 4:13; Sione 18:37) Ka naʻe ʻikai ke fakaʻatā ʻe Sīsū ʻa e māmaní ke ne tākiekina ʻene fakakaukaú pea fakatafokiʻi ia mei he ʻOtuá. Naʻá ne nofoʻaki faitōnunga ʻo aʻu ki he maté. Ko ia, naʻe lava ke pehē ʻe Sīsū kuó ne ikuna ʻa e māmaní pea ko Sētane, “ʻa e pule ʻo e māmaní,” naʻe “ʻikai hano mafai” kiate ia.​—Sione 14:30.

Naʻe ngāueʻaki ʻe Sīsū ʻene faʻifaʻitakiʻangá tonu ke fakahaaʻi ki hono kau muimuí ʻe lava foki ke nau nofoʻaki faitōnunga ki he ʻOtuá naʻa mo e ʻi he taimi naʻe ʻahiʻahiʻi ai ʻenau anga-tonú. Naʻe hangē ia naʻe pehē ʻe Sīsū: “Kapau ʻoku lava ke u ikuna ʻa e māmaní, te mou lava foki mo kimoutolu.”

Puipuituʻa ʻo e Sione 16:33

Naʻe leaʻaki ʻe Sīsū ʻa e ngaahi leá ni ʻi he pō ki muʻa ke ne pekiá. ʻI hono ʻiloʻi naʻe vave ke ne pekiá, naʻá ne ngāueʻaki ʻa e faingamālié ke ne vahevahe ha faleʻi fakamāvae mo ʻene kau ʻapositolo faitōnungá. Naʻá ne fakakau ai ha ngaahi moʻoni mafatukituki: Heʻikai ke nau toe sio kiate ia, pea ʻe fakatangaʻi pea aʻu ʻo tāmateʻi kinautolu. (Sione 15:20; 16:2, 10) Koeʻuhi naʻe lava ke ʻai heni ʻene kau ʻapositoló ke nau ilifia, naʻe fakamulitukuʻaki ʻe Sīsū ʻa e ngaahi lea ʻi he Sione 16:33 ke ne fakalototoʻaʻi mo fakafiemālieʻi kinautolu.

Ko e ngaahi lea mo e faʻifaʻitakiʻanga ʻa Sīsuú ʻe lava foki ke ne fakalototoʻaʻi hono kau muimuí ʻi he ʻahó ni. Ko e kau Kalisitiane kotoa pē ʻe lava ke nau nofoʻaki faitōnunga ki he ʻOtuá neongo ʻa e mamahí.