Fai ha Tokoni Lolotonga ‘a e “Ngaahi Tau pea mo e Ongoongo ʻo e Ngaahi Tau”

ʻI he ngaahi ʻaho fakaʻosi ko ení, ʻoku tau ʻamanekina ke “fanongo ʻi he ngaahi tau pea mo e ongoongo ʻo e ngaahi tau.” (Mātiu 24:6) Neongo ia, ʻi he fehangahangai hotau fanga tokouá mo e ngaahi faingataʻa ko ení, ʻoku nau kei maʻu pē ʻa e tokoni ʻoku nau fiemaʻú. ʻI he Līpooti ʻa e Kulupu Pulé Fika 3, 2022 naʻe ʻomai ai ʻa e fakamatala fakalotomāfana fekauʻaki mo e ngāue tokoni hokohoko ʻi ʻIulope Hahake ki he faʻahinga ʻoku uesia ʻe he tau ʻi ʻIukalainé. ʻOku anga-fēfē hono ʻave ʻa e tokoní eni ʻi he uhouhonga ʻo e taú? Kuo anga-fēfē ʻa e tokoni ʻa e ngāué ni ki hotau fanga tokoua ʻi ʻIukalainé?

Ko e Hā ʻOku Fiemaʻú? Kuo Anga-Fēfē Hono Fakahokó?

ʻI Fepueli 24, 2022, ʻa e ʻaho naʻe kamata ai ʻa e tau ʻi ʻIukalainé, naʻe tali ʻe he Kōmiti Kouʻotineitá ʻa e patiseti tokoni ke tokoniʻi ʻaki hotau fanga tokoua ʻi ʻIukalainé. Naʻe kamata leva ʻa e vaʻa ʻi ʻIukalainé ke fakatau ʻa e ngaahi meʻa fakalotofonua pea tufaki atu fakafou ʻi he ngaahi Kōmiti Tokoni Fakatamaki ʻe 27 kuo ʻosi fokotuʻú.

Ke poupou ki he ngāue ko ení, naʻe ngāue leva ʻa e ʻUluʻi ʻApitanga ʻi Māmani ʻa e Kau Fakamoʻoni ʻa Sihová ke ʻiloʻi ʻa e ngaahi tokoni ʻaonga ke ʻavé. Ko e Kōmiti Kouʻotineitá mo e Kōmiti Pulusi ʻa e Kulupu Pulé, naʻá na kole ki he Potungāue Fakataú ke ngāue fakataha mo e kau fakafofonga mei he vaʻa ʻi ʻIukalaine mo Pōlaní, ke tokoni ki he fiemaʻu ko ení mo fokotuʻutuʻu ha palani ngāue. Ko e fanga tokoua mei he potungāue Fakatau, Fakaheka, mo Fakalao mei he vaʻa taki taha, ko ha mēmipa mei he Kōmiti Vaʻa ʻi ʻIukalainé, mo e kau mēmipa mei he Potungāue Fakataú naʻa nau fakataha ʻi he ʻaho taki taha ke fokotuʻutuʻu ʻa e tokoní.

“ʻUluakí naʻa mau feinga ke ʻiloʻi ʻa e meʻa naʻe fiemaʻú,” ko e lau ia ʻa Jay Swinney mei he Potungāue Fakataú. “Naʻa mau loto ke ʻoatu ʻa e meʻakai mo e ngaahi naunau ki he haisiní ʻa ia ʻoku anga ki ai ʻa e fanga tokoua fakalotofonuá. Kae kehe, ko hono fakapapauʻi pe ko e hā ʻa e meʻa naʻe fiemaʻú, ko e konga pē ia ʻe taha ʻo e palopalemá. Naʻe toe pau ke mau ʻiloʻi ʻa e founga ke ʻave ʻa e ngaahi meʻa ko ení ki ʻIukalaine lolotonga ʻa e taú ʻi he malu mo e vave taha ʻe ala lavá.”

ʻI Maʻasi 9, 2022, naʻe fakapapauʻi ai ʻa e ngaahi meʻa naʻe fiemaʻú. Ko e ngaahi puha naʻe faʻo ai ʻa e ngaahi meʻakai tefito hangē ko e meʻakai kapa, kapa ika, laise, mo e piini naʻe ʻave fakataha ia mo e ngaahi naunau haisini hangē ko e koa mo e pepa falemālōlō. ʻI he taimi ko iá, naʻe fakafuofua ko ha tokonaki uike ʻe fā ʻo e ngaahi koloa ko ení ki he tokotaha ko hono mahuʻingá ʻoku fakafuofua ki he $65 ʻAmelika. ʻI he fakakaukau atu ko e laui afe hotau fanga tokouá ngalingali te nau fiemaʻu e ngaahi meʻá ni, naʻe tali ai ʻe he Kōmiti Kouʻotineitá ke fakamoleki ʻa e paʻanga lahi ke faiʻaki ʻa e tokoní. Ka ʻe anga-fēfē hono fakaaʻu ʻa e ngaahi tokoni ko ení ʻo ʻikai ʻai ke ʻi ha tuʻunga fakatuʻutāmaki ʻa e tuʻunga malu hotau fanga tokouá?

ʻI Maʻasi 13, ko ha ongo tokoua mei Pōlani naʻá na fai ha tiliva ʻahiʻahi mei he ʻōfisi vaʻa ʻi Pōlaní ki ha fale tukuʻanga koloa ofi ki Lviv, ʻIukalaine. ʻI he ngaahi ʻaho ki muʻa peá na mavahé, naʻe tokoni ʻa e kau ngāue ʻi he vaʻa ʻi Pōlani mo ʻIukalainé ki he ongo tokoua polé ke teuteu ki heʻena fonongá. Naʻe fakakakato ʻe he vaʻá ʻa e ngaahi pepa fakalao naʻe fiemaʻu ke kolosi atu ʻaki ʻi he kauʻāfonuá ke fai ha tokoni ʻofa. Naʻa nau fakapapauʻi ko e meʻalele ʻa e ongo tokouá ʻoku fakaʻilongaʻi mahino ʻokú na ʻave ʻa e tokoni, pea fengāueʻaki mo e fanga tokoua fakalotofonua ʻi ʻIukalainé ke fakapapauʻi ʻa e halanga vave tahá ʻi he taimi ʻe kolosi atu ai ʻa e ongo tokouá ʻi he kauʻāfonuá. ʻI he teuteu lelei ko ení fakataha mo e tāpuaki ʻa Sihová, naʻe fakaaʻu atu ai ʻa e tokoní ki he ngaahi Kōmiti Tokoni Fakatamakí ʻi loto ʻi he houa ʻe 24 ʻo ʻena tiliva ki Lviv, pea naʻe foki hao ʻa e ongo tokouá ki Pōlani.

Neongo naʻe ola lelei ʻa e ʻuluaki tiliva ʻahiʻahí, ko e tokoni naʻe tiliva ʻe he fanga tokouá naʻe siʻi hifo he toni ʻe tahá. Naʻe fakafuofua ko e toni ʻe 200 naʻe kei fiemaʻú! ʻE anga-fēfē hano fakaaʻu ha koloa lahi pehē pea malava ke tufaki ʻi he vave tahá?

“Ko Ho Kakaí Te Nau Foaki Loto-Lelei Atu Kinautolu”

Hili hono lau e ngaahi līpooti ʻi he jw.org fekauʻaki mo hono uesia hotau fanga tokouá ʻe he meʻa ʻoku hoko ʻi ʻIukalainé, ko e kakai takatakai meí he māmaní naʻa nau loto ke tokoni. Ko e tokolahi ʻoku nofo mamaʻó naʻa nau fai ʻa e tokoni fakapaʻanga ki he ngāue ʻi māmani lahi ʻa e Kau Fakamoʻoni ʻa Sihová, ʻi hono ʻiloʻi ʻe ngāueleleiʻaki ʻa e paʻanga ko ení. Ko e faʻahinga ʻoku nofo ʻi he ngaahi fonua kaungāʻapí naʻe malava ke nau foaki honau taimí, iví mo ʻenau ngaahi meʻangāué ke tokoni. Ko e ngaahi fakatātā eni ʻe niʻihi.

ʻI Pōlani, naʻe fakatahatahaʻi ʻe he kau ngāue polé ʻa e laui afe ʻo e fanga kiʻi puha tokoní mo e ngaahi kaati naʻe tā valivali ʻe he fānaú. “ʻI he taimi lahi naʻá ku lau ʻa e veesi ʻi he Saame 110:3, ʻa ia ʻoku pehē ai ko e ʻkakai ʻa Sihová te nau foaki loto-lelei atu kinautolu,’” ko e lau ia ʻa Bartosz Kościelniak, ko ha mēmipa ʻo e Potungāue Fakatau ʻi he vaʻa ʻi Pōlaní. “Ka ʻi he sio tonu ki he tafe mai ʻa e ngaahi tokoní, ko e lauingeau ʻa e kau ngāue pole ʻoku nau loto-lelei ke kau mai ʻi he vave tahá pea mateuteu ke ngāué, naʻe fakahaaʻi mai ai kiate au ʻoku moʻoni ʻa e ngaahi leá ni.”

Ko ha taha ʻo e Kau Fakamoʻoni ʻa Sihová ʻoku ʻi ai haʻane kautaha feʻaveʻaki uta fakavahaʻapuleʻanga. Naʻá ne tokoni ke ngāueʻaki peá ne toe ʻutu foki ʻene ngaahi lolí. Naʻá ne pehē: “Kiate au, ko ha faingamālie eni ke fakahaaʻi ʻeku ʻofa ki hoku fanga tokouá pea kia Sihova. ʻOku ou fiefia naʻe lava ke u tokoni.” ʻOku fakafuofua naʻe laka hake ʻi he lita lolo ʻe 7,700 naʻe tokoniʻakí, pea naʻe ngāueʻaki ʻe he fanga tokouá honau taimí mo e iví ke nau fakaʻuli ʻo meimei aʻu ki he kilomita ʻe 48,000 ke fakaaʻu ʻa e ngaahi tokoní!

Koeʻuhí ko e ngāue loto-lelei mo anga-ʻofa hotau fanga tokouá mo e fanga tuofāfiné, ʻi heʻene aʻu ki he ʻaho 28 ʻo Maʻasí​​—ko e ʻaho pē ia ʻe 15 mei he ʻuluaki tiliva ʻahiʻahí​​—ko e toni ʻe 100 ʻo e meʻakai, naunau ki he haisiní, pea mo e ngaahi naunau fakafaitoʻo kuo ʻosi fakaaʻu ki ʻIukalaine! Pea koeʻuhi ko e foaki nima-homo ʻa e ngaahi koloa mei hotau fanga tokouá mo e ngaahi kautahá, ko e lahi ʻo e paʻanga naʻe fakataumuʻa ke fakamoleki ki he ngaahi tokoni fakatamakí naʻe mātuʻaki holoki. ʻI he aʻu mai ki he taimi ní, kuo fakaaʻu ʻe he Kau Fakamoʻoni ʻa Sihová ʻa e tokoni laka hake ʻi he toni ʻe 190 ki ʻIukalaine. Kuo anga-fēfē tokoni ʻa e ngāué ni ki hotau fanga tokouá?

“Naʻe Toe Fakaaʻu Mai Ai Hoʻomou ʻOfá!”

Hili e tūʻuta ʻa e ngaahi tokoní ki Lviv, ko e ngaahi Kōmiti Tokoni Fakatamaki ʻi ʻIukalainé naʻa nau tufaki atu ia ki he faʻahinga naʻe fiemaʻu tokoní. Kuo tufaki ʻa e ngaahi puha tokoní ki he ngaahi kolo kehekehe, ko e niʻihi naʻe laka hake ʻi he kilomita ʻe 1,300 hono mamaʻó mei Lviv. Neongo ko e ngāué ni naʻe fakahoko ia ʻi he lelei taha naʻe ala lavá, naʻe kei fiemaʻu pē ʻa e taimi.a

Ko Markus Reinhardt, ko ha mēmipa ʻo e Kōmiti Vaʻa ʻi ʻIukalainé, ʻokú ne pehē: “Lolotonga ʻa e fakatamakí, kuo mātā tonu ʻe he tokolahi taha hotau fanga tokouá ʻa e ʻofa ʻa Sihová pea mo hono lelei ʻa e talangofua ki he ngaahi fakahinohino mei heʻene kautahá​​—naʻa mo e ki muʻa ke hoko mai ʻa e fakatamakí. Ko ha fakatātā, ʻoku fakalototoʻaʻi ʻa e tokotaha kotoa ke tokonaki maʻu pē ʻi honau ʻapí ʻa e meʻakai mo e vai ke feʻunga mo e laui uike. ʻI he felāveʻi mo e fakahinohino ko ení, ko ha mātuʻa ko Anton ʻokú ne ngāue ʻi Kyiv naʻá ne pehē: ʻKuo teuʻi kimautolu ʻe he kautaha ʻa Sihová ki he ngaahi taimi faingataʻá, pea ʻoku mau fakamālō lahi ki ai. Ko e maʻu ha meʻakai mo e vai pea pehē ki ha letioó kuó ne fakahaofi moʻoni ʻemau moʻuí.’ ʻOku mau houngaʻia moʻoni ʻi he talangofua ʻa e fanga tokouá ki he fakahinohino ko ení koeʻuhí naʻe ʻoange ai ʻa e taimi ki he ʻōfisi vaʻá ke fokotuʻutuʻu ʻa e tokoni naʻe fiemaʻú.

Naʻe fēfē ʻa e ongoʻi hotau fanga tokouá ʻi he aʻu atu ʻa e tokoní? Ko Mykola mo Zinaida, ʻokú na nofo ʻi Kharkiv, ko e anga eni ʻena fakakaukaú: “Naʻe maongo moʻoni kiate kimaua hoʻomou tokangá. Fakamālō lahi atu ki he meʻakaí mo e faitoʻó. Ko e moʻoni, ʻoku lava ke sio ki he toʻukupu ʻo Sihová ʻi he meʻá ni.” Ko Valentyna ʻoku nofo ʻi he feituʻu tatau. Naʻá ne pehē: “Talu mei he kamata ʻa e taú mo e kiu ʻa e ngaahi falekoloá. Naʻe ʻikai faʻa malava ke fakatau mai ʻa e meʻa naʻe fiemaʻú. Ka naʻe ʻafioʻi ʻe Sihova ʻa e palopalema ko ení. Naʻá ne fakanofo ha fanga tokoua ke nau tufaki ʻa e tokoní ki he ngaahi ʻapí, pea naʻe ʻi loto ʻi he ngaahi puha ko ení ʻa e meʻa tofu pē naʻa mau fiemaʻú! ʻI he ngaahi tuʻunga faingataʻa peheé, ʻi he hā ngali ʻoku ʻikai toe ʻi ai ha ʻamanakí, ʻoku ongoʻi pea ʻiloʻi ʻe he tokotahá ʻa e tokanga ʻa Sihova pea mo ʻene kautahá ʻi ha founga makehe. . . . ʻOku mātuʻaki fakafiefia ke ongoʻi ʻa ʻene tokoní mo e poupou ʻoku fiemaʻú ʻi he taimi totonu.”

Ko Yevhen mo Iryna, naʻá na hola mei Mariupol, naʻá na pehē: “ʻOkú ma houngaʻia lahi ʻi hoʻomou tokanga mo e poupou maʻa homau fāmilí. Tui mai, naʻe ʻomi taimi totonu ia. Ke ʻilo, naʻá ma ʻuluaki fakakaukau ko e ngaahi koloá pē naʻe faʻo ʻi he puhá, ka ʻi heʻema fakaava iá, naʻá ma ʻiloʻi tā naʻe toe fakaaʻu mai ai hoʻomou ʻofá!”

ʻOku ʻikai ha veiveiua ʻokú ke sio ki he kaunga ʻa e laumālie ʻo Sihová mo ʻene tatakí ʻi hono fakaaʻu ʻa e ngaahi tokoni ʻofa ko ení lolotonga ʻa e “ngaahi tau pea mo e ongoongo ʻo e ngaahi tau.” Ko hoʻo tokoni anga-ʻofa ki he ngāue ʻi māmani lahí, ʻa ia ko e lahi tahá naʻe fakafou ʻi he donate.jw.org, ko e taha ia e ʻuhinga naʻe lavameʻa ai ʻa e ngāué ni. Ko hoʻo tokoni nima-homó ʻoku hounga moʻoni!

ʻOatu ʻa e Tokoní ʻi he Vave mo e Malu Taha ʻe Ala Lavá

1. 

   Fepueli 24, 2022: Tali ʻe he Kōmiti Kouʻotineitá ha patiseti paʻanga tokoni maʻa ʻIukalaine, ke ngāueʻaki ʻe he vaʻá ke kamataʻi ha tokoni

2. 

   Fepueli 24-Maʻasi 8, 2022: Fakatau ʻe he vaʻa ʻi ʻIukalainé ʻa e ngaahi meʻa fakalotofonua pea kamata tufaki atu ia ʻi he ngaahi Kōmiti Tokoni Fakatamakí. ʻOku toe mateuteu foki ʻa e ʻōfisi vaʻá ke tali pea tufaki ʻa e ngaahi koloa mei Pōlaní

3. 

   Maʻasi 9, 2022: Tali ʻe he Kōmiti Kouʻotineitá ʻa hono tiliva ʻa e ngaahi tokoni ʻofa ki ʻIukalaine

4. 

   Maʻasi 10-12, 2022: Fokotuʻutuʻu ʻa e ngaahi palani ki hono tiliva ʻahiʻahi ʻa e meʻakai mo e ngaahi naunau mei Pōlani ki Lviv, ʻIukalaine

5. 

   Maʻasi 13, 2022: Tiliva ʻahiʻahi ʻa e meʻakai mo e ngaahi naunau mei Pōlani ki Lviv, ʻIukalaine

6. 

   Maʻasi 14-16, 2022: ʻI ha Holo ʻAsemipilī ofi ki Poznan, Pōlani, ko e kau ngāue pole mei he Tisaini/Langa Fakalotofonuá ʻoku fokotuʻutuʻu maau ke fakatahatahaʻi ʻa e ngaahi puha tokoni ʻo e meʻakaí mo e naunau ki he haisiní

7. 

   Maʻasi 17, 2022: Hili ʻa e ʻaho ʻe fā mei he lavameʻa ʻa e ʻuluaki tiliva ʻahiʻahí, ʻoku kamata leva hono tiliva ʻa e toni ʻe 13 ʻo e ngaahi puha tokoní ki he kauʻāfonua ʻo ʻIukalainé

8. 

   Maʻasi 21-27, 2022: ʻI he muimui he founga tatau, ko e toenga ʻo e ngaahi tokoní ʻoku fakatahatahaʻi ʻi Pōlani pea toki uta ki ʻIukalaine pea tufaki leva ai ki he ngaahi feituʻu ʻoku fiemaʻu tokoní ʻi loto he houa pē ʻe 24.

9. 

   Maʻasi 28, 2022: ʻI loto ʻi he ʻaho ʻe 20 hili pē hono talí, ko e toni ʻe 100 ʻo e meʻakai, naunau ki he haisiní, pea mo e ngaahi naunau tokoni fakafaitoʻo kuo ʻosi ʻave ki ʻIukalaine

ʻI he taimi ní, ko e Kau Fakamoʻoni ʻa Sihová kuo nau ʻave ʻa e tokoni laka hake he toni ʻe 190 ki ʻIukalaine.