Tokoni Fakatamaki ʻi he 2021​—ʻIkai Liʻaki Hotau Fanga Tokouá mo e Fanga Tuofāfiné

Lolotonga ʻa e taʻu fakangāue 2021,a ʻoku kei hokohoko atu pē hono uesia ʻe he mahaki fakaʻauha COVID-19 ʻa e māmaní. Hangē ko ia naʻe fakamatalaʻi ʻi he kupu “Tokoni Fakamāmanilahi ki ha Mahaki Fakaʻauha,” kuo tau fakamoleki ʻa e tola ʻe laui milionab ʻi he tokoni ki he mahaki fakaʻauhá pea faʻu mo e ngaahi Kōmiti Tokoni Fakatamaki ʻe 950 tupu.

Ko e moʻoni, ʻi he lolotonga ʻa e tō ʻa e mahaki fakaʻauhá, kuo toe ʻi ai mo e ngaahi fakatamaki fakanatula mo fakatupunga ʻe he tangatá kuó ne uesia hotau fanga tokouá mo e fanga tuofāfiné ʻi māmani lahi. ʻI he tali ki he ngaahi fakatamaki pehē ʻe 200 tupu, ko e Kōmiti Kouʻotineita ʻo e Kulupu Pulé naʻa nau tali ke fakamoleki ʻa e tola ʻe $8 miliona ʻo tānaki atu ki he tokoni ki he COVID-19. Fakakaukau ki he founga naʻe ngāueʻaki ai hoʻo tokoní ke tokoni ki he niʻihi naʻe maʻukovia ʻi ha fakatamaki ʻe ua ki muí ni mai.

Puna ʻa e Moʻunga Afi Nyiragongo

ʻI Mē 22, 2021, naʻe puna ʻa e moʻunga afi ko Nyiragongo, ʻa ia ʻoku tuʻu ʻi he Lepupilika Temokalati ʻo Kongó. Ko e huhuʻa vela mei he moʻunga afí naʻá ne fakaʻauha ʻa e ngaahi falé, ʻapiakó mo ha tānakiʻanga vai. Ka naʻe ʻikai ko e meʻa fakatuʻutāmakí pē ia. ʻI he ngaahi ʻaho hili ʻa e puna ʻa e moʻunga afí, naʻe haʻu ʻa e ngaahi efu fakatuʻutāmaki mei he moʻunga afí ki he kolo ko Goma pea naʻe hoko mo e fanga kiʻi mofuike iiki. Naʻe laka hake ʻi he vaeua ʻo e koló naʻe fekau ke nau mavahe. Naʻe hola ʻa e laui kilu, ko e niʻihi naʻa nau hola atu ʻi he kauʻāfonuá ki Luanitā.

ʻI he haʻohaʻonga ʻo e faʻahinga naʻe mavahé naʻe kau ai ʻa e Kau Fakamoʻoni ʻa Sihova ʻe toko 5,000 nai. Ko e niʻihi naʻe mole honau ʻapí ʻi he puna ʻa e moʻunga afí; ko e niʻihi naʻe kaihaʻasia honau ngaahi ʻapí hili ʻenau holá. Ko e ngaahi kōmiti tokoni ʻi Luanitā mo e Lepupilika Temokalati ʻo Kongó naʻa nau fokotuʻutuʻu ke fai ha tokoni. ʻI he fekauʻaki mo ha kōmiti tokoni ʻe taha, ko e vaʻa Kongo (Kinshasa) ʻokú ne līpooti: “Neongo ʻa e tuʻunga moveuveu ʻi he koló pea naʻa mo e ki muʻa hono fekauʻi ke nau mavahé, naʻe kamata ke tufa ʻe he kōmití ʻa e meʻakai, vai, naunau mohenga mo e vala.” ʻI ha kolo ʻe taha naʻe fakatahataha ki ai ʻa e toko 2,000 tupu hotau fanga tokouá, naʻe fokotuʻu ʻe ha kōmiti tokoni ʻa e ngaahi tēniti, ʻoatu mo e ngaahi meʻa maluʻi he matá, pea fakamatalaʻi ʻa e founga ke fakasiʻisiʻi ai ʻenau maʻu ʻa e COVID-19 mo e kōlelá.

ʻI loto ʻi ha māhina ʻe tolu ʻo e fakatamakí, ko hotau fanga tokouá naʻa nau tufa ʻo laka hake ʻi he toni laise ʻe ono, toni mahoaʻa koane ʻe ono, toni lolo feimeʻakai ʻe tolu mo e toni vai ʻe tolu. Ke fakahaofi ʻa e paʻangá, naʻe fokotuʻutuʻu ʻe he vaʻá ke fakatau lahi ʻa e meʻakaí fakalotofonua kae ʻikai ko hono ʻota ʻa e meʻakai mamafa ange mei muli.

“Naʻa mau mātuʻaki loto-siʻi mo loto-mamahi,” ko e lau ia ʻa ha tuofefine ʻe taha ʻa ia ko hono ʻapi foʻoú naʻe fakaʻauha ʻe he moʻunga afí. Ka naʻe maʻu leva ʻe hono fāmilí ʻa e tokoni fakaesino mo fakalaumālie. ʻOkú ne pehē he taimí ni: “ʻI he tokoni ʻa Sihová, ʻoku mau kei maʻu pē ʻa e meʻa ʻoku mau fiemaʻú. Kuo mau vakai ki hono fua ʻe Sihova ʻemau kavengá pea ʻai ia ke faingofua ange ke mau fataki.”

Tōlalo Fakaʻekonōmika ʻa Venisuelá

Kuo tofanga ʻa Venisuela ʻi he ngaahi palopalema fakaʻekonōmika mafatukituki ʻi he laui taʻu. Ko hotau fanga tokoua ʻi aí ʻoku nau kātekina ʻa e ngaahi tuʻunga faingataʻa ʻo e nofó, nounou fakameʻatokoni pea fakautuutu ʻa e faihiá. Neongo ia, kuo ʻikai liʻaki kinautolu ʻe he kautaha ʻa Sihová.

Lolotonga ʻa e taʻu fakangāue kuo ʻosí, laka hake ʻi he tola ʻe $1.5 miliona naʻe fakamoleki ki hono fakatau mai mo fakafolau ʻa e meʻakai mo e koa ki he ngaahi fāmili naʻa nau fuʻu fiemaʻu tokoní. Ko e vaʻa Venisuelá ʻokú ne līpooti: “ʻOku ʻikai ke faingofua ke fakafolau ʻa e toni meʻakai ʻe 130 ki he kotoa ʻo e fonuá ʻi he māhina taki taha pea tufaki atu ia ki he fanga tokoua fiemaʻu tokoní.” Ke fakapapauʻi ʻoku ʻikai maumau ʻa e meʻakaí, ko e fanga tokouá ʻoku nau faʻa ʻoatu ʻa e ngaahi meʻa ʻoku tolonga ange. ʻOku toe pehē ʻe he vaʻá: “ʻOku mau fakatau ʻa e lahi taha ʻo e meʻakaí pea fakatau ia ʻi honau faʻahitaʻú ʻi he taimi ʻoku nau maʻamaʻa aí. Pea ʻoku mau fakafolau ia ʻo ngāueʻaki ʻa e founga maʻamaʻa tahá.”

Ko Leonel, ko ha mēmipa ʻi he Kōmiti Tokoni Fakatamaki ʻi Venisuelá, ʻokú ne ʻofa ʻi hono vāhenga-ngāué. “Ko e ngāue tokoní ʻoku makehe,” ko ʻene leá ia. “Ko e monū ko ení kuó ne langa hake au talu mei he mate hoku uaifi ʻofeiná ʻi he COVID-19. ʻOku ou hanganaki femoʻuekina pea ongoʻi ʻoku ou ʻaonga ki he fanga tokoua ʻoku fiemaʻu tokoní. Kuó u vakai tonu ki he tauhi ʻe Sihova ʻene talaʻofa heʻikai ke ne liʻaki ʻene kakaí.”

Ko ha tokoua naʻá ne ngāue ʻi ha kōmiti tokoni ʻi he kuohilí naʻá ne maʻu ha tokoni. “ʻI he taimi ko ení ko au ia ʻoku ou fiemaʻu tokoní,” ko ʻene leá ia. “Naʻe ʻikai ke mau maʻu ha tokoni fakamatelie pē. Ko e fanga tokouá naʻa nau tokoniʻi foki au mo hoku uaifí ke ma nofoʻaki nonga. Naʻa nau tokangaʻi kimaua, fakafiemālieʻi kimaua pea fakalototoʻaʻi kimaua.”

Ko e ngaahi fakatamaki ʻe niʻihi ʻoku hoko ia ʻo ʻikai ha fakatokanga. Neongo ia, ko e kautaha ʻa Sihová ʻoku malava maʻu pē ke nau maʻu mo tufaki vave ʻa e ngaahi tokoní, mālō ki hoʻomou ngaahi tokoni ki he ngāue ʻi māmani lahí. Ko e niʻihi ʻo e ngaahi founga ki he tokoní ʻoku fakamatalaʻi ʻi he donate.jw.org. ʻOku mau houngaʻia ʻi hoʻomou nima-homó.