Tokonaki Maʻá e Kau Maʻukovia ʻi he Fakatamakí

ʻI he taʻu 2020 naʻe lahi fau ʻa e ngaahi fakatamaki fakanatula pea mo e kamata tō ʻa e mahaki fakaʻauha ko e COVID-19 ʻi māmani lahí. Naʻe anga-fēfē tokoni ʻa e Kau Fakamoʻoni ʻa Sihová ki he faʻahinga ne maʻukoviá?

Lolotonga ʻa e taʻu fakangāue 2020,a naʻe tali ai ʻe he Kōmiti Kouʻotineita ʻo e Kulupu Pulé ke ngāueʻaki ʻa e paʻanga ʻe 28 milionab ke tokoni ʻi ha fakatamaki. Ko e tokonaki ko ení naʻe tokoni ia ki he faʻahinga ne maʻukovia ʻi he ngaahi fakatamaki ʻe 200 tupu ʻo kau ai ʻa e COVID-19, ngaahi saikolone fakatalopiki, tāfea ʻi ʻAfilika, nounou fakameʻatokoni ʻi Venisuela mo e laʻalaʻā ʻi Simipāpuē. Ko e paʻanga tokoni ko ení ne totongiʻaki ia ʻa e meʻakai, vai, nofoʻanga, vala mo e meʻa fakafaitoʻo pea pehē ki he ngaahi meʻa tefito ki he fakamaʻá, monomonó mo e toe langa foʻou. Fakakaukau angé ki ha ngaahi fakatātā ʻo e ngāue tokoní.

COVID-19. Kuo uesia fakaesino, fakaeongo mo fakaʻekonōmika ʻa hotau fanga tokoua mo e fanga tuofāfine ʻi māmani lahí ʻe he mahaki fakaʻauhá. Ke tokoniʻi ʻa e faʻahinga ko ení naʻe fokotuʻu ai ha Kōmiti Tokoni ki he Fakatamakí ʻe 800 tupu ʻi māmani lahi. Naʻe vakaiʻi ʻe he ngaahi kōmiti ko ení ʻa e ngaahi fiemaʻu hotau fanga tokouá pea ʻoatu vave ʻa e ngaahi līpōtí ki he Kōmiti Kouʻotineitá ʻa ia naʻe tokoni eni ke nau ʻilo ʻa e founga ke fai ai ha tokoni.

ʻI he faai mai e taʻú, kuo tokoniʻi ʻe he Kōmiti Tokoni ki he Fakatamakí ʻa e tokolahi ke maʻu e meʻakai, vai, ngaahi meʻa ke tauhi e tuʻunga maʻá mo e ngaahi meʻa fakafaitoʻo. ʻI he ngaahi feituʻu ʻe niʻihi, naʻe toe tokoni ʻa e kōmiti ko ení ke ngāue fakataha mo e kau mātuʻa fakalotofonuá ke lava ʻo nau maʻu e ngaahi tokoni mei he puleʻangá.

Kuo fakatokangaʻi ʻe he faʻahinga ʻi he māmaní ʻa ʻetau ngāue tokoní. Ko e fakatātaá, naʻe tala ange ʻe he pule fakavahe ko Field Simwinga ʻo Nakonde ʻi Semipia ki hotau fanga tokouá: “ʻOku mau houngaʻia lahi ki homou tokoni taimi totonu ki he ngaahi fiemaʻu vivili ʻa e siʻi ngaahi fāmili kuo maʻukoviá.”

Nounou Fakameʻatokoni ʻi ʻEngikola. Koeʻuhí ko e COVID-19 kuo siʻisiʻi pea toe hiki ʻo mamafa ange ʻa e meʻakaí ʻi ʻEngikola. Kuo faingataʻa ange ki he tokolahi hotau fanga tokouá mo e fanga tuofāfiné ke fakatau ha meʻakai.

Naʻe kole ki he vaʻa Pelēsilá ke nau tokonaki ha meʻakai ki hotau fanga tokoua ʻi ʻEngikolá. Ke ngāue fakapotopotoʻaki ʻa e paʻanga tokoní naʻe fekumi ai ʻa e fanga tokouá ki he founga lelei ke fakatau mo fakafolau ai ʻa e meʻakaí pea naʻe fakatau ʻa e meʻakai lahi fakaʻulia. Ko ia ai, naʻe feʻunga pē mo e $22 ʻa hono fakatau mo fakafolau ʻa e kofukofu meʻakai taki taha ʻo kau ai ʻa e laise, piini mo e lolo ngaahi kai ʻa ia naʻe feʻunga mo e kilokalami ʻe 20 (pāuni ʻe 44). Kuo fakafolau atu ʻa e kofukofu meʻakai ʻe 33,544 ʻa ia ko e toni fakakātoa ia ʻe 654. Fakatahaʻi mo e ngaahi meʻakai fakalotofonuá kuo tokoni eni ke fafanga ʻa e kakai laka hake he 50,000!

ʻOku anga-fēfē ongoʻi hotau fanga tokouá ki he tokonaki ko ení? ʻOku pehē ʻe Alexandre ʻa ia ʻoku nofo ʻi ha kolo mavahe ʻi ʻEngikola: “Ko ha fakamoʻoni māʻalaʻala eni ʻoku ʻofa mai ʻa Sihova kiate au pea ʻoku ʻikai ke u toko taha. ʻOku fakamahuʻingaʻi au ʻe he kautaha ʻa Sihová!” ʻOku pehē ʻe ha faʻē taʻehoa ko Mariza: “Naʻe fanongo ʻa Sihova ki heʻeku tangí pea ʻoku ou houngaʻia ʻiate ia mo ʻene kautahá!”

Tokoni ki Simipāpuē ʻi he Laʻalaʻaá. Lolotonga ʻa e taʻu fakangāue 2020, naʻe tō ha laʻalaʻaá lahi ʻi Simipāpuē ʻo iku eni ki ha mate fiekaia ha laui miliona. Ko e Kau Fakamoʻoni ʻe laui afe ʻi Simipāpuē naʻe ʻikai haʻanau meʻakai feʻunga.

Naʻe fokotuʻu ha Kōmiti Tokoni Fakatamaki ʻe nima ke nau tokoni ki hotau fanga tokouá. Ko e fanga tokoua ʻe laui ngeau naʻa nau tokoni ki hono kofu ʻa e meʻakaí, fakaheka ʻa e ʻū utá mo fakafaingamālieʻi ʻenau ʻū meʻalelé.c Lolotonga ʻa e taʻu fakangāue 2020, naʻe fakamoleki ʻa e $691,561 ke fafanga ʻa e kakai laka hake ʻi he 22,700!

ʻI he ngaahi tuʻunga ʻe niʻihi, naʻe feʻunga pē ʻosi ʻenau meʻakaí mo e aʻu atu ʻa e ngaahi tokoní. ʻI he tau atu ʻa e meʻakaí naʻe fakahīkihikiʻi ʻe hotau fanga tokouá ʻa Sihova pea ko e niʻihi ne kamata ke nau hiva ʻi he hiva ʻo e Puleʻangá.

ʻI ha kolo ʻe taha, naʻe kau atu ai ha ongo uitou Fakamoʻoni ki ha fakataha ʻa e koló ke tālangaʻi ʻa e tokoni fakameʻakai ha kautaha. Kae kehe ne lahi ange ʻa e fakapolitikale ʻa e fakatahá ko ia ai naʻe mavahe ʻa e ongo tuofāfiné ʻo ʻikai te na tali ʻa e ngaahi fiemaʻu ke maʻu ha tokoni meiate kinautolu. ʻI heʻena mavahé naʻa nau manukiʻi kinaua pea tala ange, “ʻOua naʻá mo toe haʻu ʻo kumi meʻakai mai kiate kimautolu!” Kae kehe hili ha uike ʻe ua mei ai naʻe aʻu atu hotau fanga tokouá mo e meʻakai ʻa e ongo tuofāfine ʻo tokamuʻa ia ʻi he tokoni ʻa e kautaha fakaemāmani ko iá!

Naʻe hoko foki mo e tokoni fakatamaki ʻi Simipāpuē ko ha fakamoʻoni lelei. Ko e fakatātaá, fakatokangaʻi ʻa e hokosia ʻa Prisca ʻa ia ʻokú ne nofo ʻi ha kiʻi kolo siʻisiʻi. Neongo ʻa e ngaahi faingataʻa ʻi he tō ʻa e laʻalaʻaá naʻe kau kakato ʻa Prisca ki he ngāue fakamalangá ʻi he Pulelulu mo e Falaite kotoa pē naʻa mo e lolotonga ʻa e faʻahitaʻu teuteu tō-taʻú. Naʻe manukiʻi ia he kakai hono kolo ʻo tala ange: “Malanga hena ka ke taʻekai mo ho fāmilí.” Naʻe tali ange ʻe Prisca: “Kuo ʻikai ke liʻaki ʻe Sihova ʻene kau sevānití.” ʻIkai fuoloa mei ai naʻá ne maʻu ha tokoni mei heʻetau kautahá. Naʻe maongo eni ki he niʻihi hono kaungāʻapí ʻo nau tala ange ki ai: “Kuo ʻikai liʻaki koe ʻe he ʻOtuá ko ia ʻoku mau loto ke ako lahi ange fekauʻaki mo ia.” He taimí ni, ko e toko fitu ʻo kinautolu ʻoku nau fanongo maʻu pē ki he fakataha ʻa e fakatahaʻangá ʻi he letioó.

ʻI heʻetau toe ofi ange ko ia ki he ngataʻangá, te tau kei hokohoko atu ai ke fekuki mo e ngaahi fakatamaki fakanatulá. (Mātiu 24:3, 7) ʻOku fakahoungaʻi moʻoni hoʻo ngaahi tokoni nima-homo ʻi he donate.jw.org. ʻE ngāue fakapotopotoʻaki ia ke tokoni ki he siʻi faʻahinga ʻoku fiemaʻu tokoní pea ʻave ia ʻi he taimi totonu.