Aʻu ki Māmani Lahi ʻa e Ako Kiliatí

ʻI he taʻu taki taha, ʻoku fakaafeʻi ai ha niʻihi ʻo e kau sevāniti taimi-kakato makehe ʻi māmani lahí ke kau ki he Akoʻanga Tohi Tapu Taua Leʻo ko Kiliatí ʻa ia ʻoku fai ʻi he Senitā Fakaeako Taua Leʻo ʻi Patterson, Niu ʻIoke.a ʻI he akoʻangá ni, ʻoku teuʻi ai ʻa e kau akó ke nau ngāue ola lelei ange ʻi heʻenau vāhenga-ngāué ʻi he kautaha ʻa Sihová. ʻOku tokoniʻi kinautolu ʻe he akó ni ke fakaivimālohiʻi mo ʻai ke tuʻu maʻu ʻa e ngaahi fakatahaʻangá mo e ngaahi vaʻá takatakai ʻi he māmaní.

Ko Kiliatí ko e akoʻanga fakavahaʻapuleʻanga moʻoni ia. Ko e fakatātaá, ko e kalasi hono 147 naʻe fakahoko ʻi he 2019 naʻe kau ki ai ʻa e kau ako ʻe toko 56 mei he fonua kehekehe ʻe 29. Ko e faʻahinga ʻoku ako ʻi Kiliatí kuo nau ʻosi kau ki ha tafaʻaki pē ʻo e ngāue taimi-kakato makehé hangē ko e ngāue Pēteli, ʻovasia sēketi, misinale pe tāimuʻa makehe.

ʻOku tomuʻa fai ʻa e ngaahi fokotuʻutuʻu ki he akó ʻi ha vahaʻa taimi ki muʻa ke fakahoko ʻa e fuofua kalasi ʻi loki akó. Ko e fakatātaá, ʻOku totongi ʻe he Potungāue Fefolauʻaki ʻo e ʻUluʻi ʻApitangá ʻa e tikite ʻo e faʻahinga ʻoku fakaafeʻi ki he akó. ʻI he kalasi hono 147, ko e ʻavalisi ʻo e fakamole ki hono totongi mai mo e foki mei Patterson ha toko taha ako muli ʻoku feʻunga mo e $1,075 (ʻAmelika). Ko e kau ako mei he ʻOtu Motu Solomoné naʻe pau ke nau fetongi vaka tuʻo fā ke aʻu ki Patterson pea fetongi vaka tuʻo tolu ʻi heʻenau fokí, ʻa ia ʻoku laka hake ʻi he kilomita fakakātoa ʻe 35, 400 (maile ʻe 22,000) ʻa e fefonongaʻaki ko ení! Ko e fakamole ki he fepunaʻaki ʻa e tokotaha ako taki taha naʻe feʻunga mo e $2,300 (ʻAmelika). Ke fakasiʻisiʻi ʻa e fakamolé, ʻoku ngāueʻaki ai ʻe he Potungāue Fefolauʻakí ha polokalama fakakomipiuta ke kumi ʻaki ha tikite maʻamaʻa. Naʻa mo hono taʻofi ʻa e tikité, ʻoku kei hokohoko atu pē hono kumi ʻe he polokalamá ʻi ha laui uike pe māhina ha tikite maʻamaʻa ange. ʻOku toe ngāueʻaki foki ʻe he Potungāue Fefolauʻakí ʻa e ngaahi meʻaʻofa pōnasi mei he kautaha vakapuná ke totongi ʻaki ha tikite.

Ko e tokolahi ʻo e kau akó ʻoku nau fiemaʻu ha visa ki ʻAmelika. ʻI he tuʻunga ko ení, ʻoku tokoni ʻa e Potungāue Lao ʻo e ʻUluʻi ʻApitangá ke kole ʻenau visá. Ko e fakamole ki hono fakahū ʻo e visá ʻoku fakaʻavalisi ki he $510 (ʻAmelika) ki he toko taha.

ʻOku anga-fēfē ʻetau maʻu ʻaonga mei he ako ʻoku kau ki ai ʻa e faʻahingá ni? Ko Hendra Gunawan ko ha mātuʻa ʻi ʻĒsia Tonga-Hahake ʻokú ne ʻi he fakatahaʻanga tatau mo ha ongo meʻa mali naʻá na toki ʻosi mei Kiliati. ʻOkú ne pehē: “ʻI he kamatá, naʻe ʻikai ha kau tāimuʻa tuʻumaʻu ʻi heʻemau fakatahaʻangá. Ka ʻi he hili ʻena foki mai mei Kiliatí naʻe ueʻi heʻena laumālie loto-leleí mo e faivelengá ha toko ua kehe ke na kamata tāimuʻa. Ki mui ai, naʻe kau ha tuofefine ʻi heʻemau fakatahaʻangá ki he Ako Maʻá e Kau ʻEvangeliō ʻo e Puleʻangá!”

Ko Sergio Panjaitan ʻokú ne ngāue fakataha mo ha kau ako mei Kiliati ʻi he Pēteli ʻi ʻĒsia Tonga-Hahake. ʻOkú ne pehē: “Ko e ako naʻa nau maʻú naʻe ʻikai ko ha tāpuaki pē kiate kinautolu kae toe pehē foki kiate kimautolu. Kuo nau ako ha meʻa lahi! ʻI he ʻikai ke nau hoko ʻo fie mahuʻinga koeʻuhi ko e ʻilo ʻoku nau maʻú, ʻoku nau vahevahe atu ʻa e meʻa ʻoku nau akó. ʻOku fakalototoʻaʻi heni kimautolu pea ʻoku ueʻi ai ke mau fakalototoʻaʻi ʻa e niʻihi kehé.”

ʻOku anga-fēfē hono fakapaʻanga ʻa e ako ko ení? Fakafou ʻi he ngaahi tokoni ki he ngāue ʻi māmani lahí ʻa ia ʻoku fai ʻi he donate.jw.org. Mālō ʻaupito ki hoʻo ngaahi tokoni loto-fiefoakí he ʻoku tokoni ia ki he akó ni ʻa ia ʻoku kau mai ki ai ʻa e kau ako mei māmani lahi.