Papa Tuʻuaki Tohí “ko ha Fakamoʻoni ki he Ngaahi Puleʻanga Kotoa Pē”

Ko e papa tuʻuaki tohí kuó ne tohoakiʻi mai ʻa e tokanga ʻa e kakaí ki heʻetau ngāue fakafaifekaú ʻi he taʻu ʻe hongofulu tupu. ʻI māmani lahi, ʻoku ʻiloʻingofua ʻa e papa tuʻuakí. ʻOku ʻikai ngata pē ʻa e makehe ʻa hono tisainí ka ʻoku toe tisaini foki ia ʻi ha founga pōtoʻi. Te ke loto-tatau nai mo Asenata, ko ha tuofefine ʻi Pōlani, ʻa ia ʻokú ne pehē: “Ko e papa tuʻuakí ʻoku faingofua pē mo feʻunga hono tisainí pea toe hā fakaʻofoʻofa foki. ʻOku faingofua ke fokotuʻu mo ʻave holo.”

Kuó ke fifili nai ki he founga naʻe tisaini mo faʻu ai ʻa e ngaahi papa tuʻuakí?

Ko ha Tisaini Pōtoʻi

ʻI he 2001, naʻe tali ʻe he Kulupu Pulé ke kamata ʻahiʻahiʻi ʻe hotau fanga tokoua mo e fanga tuofāfine ʻi Falaniseé ha ngaahi founga kehekehe ʻo e faifakamoʻoni ʻi he feituʻu kakaí, ʻo kau ai hono ngāueʻaki ʻo e papa tuʻuakí. Naʻa nau ʻahiʻahiʻi ʻa e ngaahi tisaini kehekehe. Ko e fakatātaá, naʻa nau fakaleleiʻi ha ngaahi kato fakavaʻe mo ha ngaahi saliote fakatau ke tuʻuaki mo faʻo ai ʻa e ʻū tohí. Faai atu pē, naʻe fili ʻe he vaʻa ʻi Falaniseé ha tisaini pau, ʻa ia naʻe ngāueʻaki ʻe he kau malangá ʻi ha ngaahi taʻu lahi.

Naʻe fiefia ʻa e fanga tokoua ʻi Falaniseé ʻi he ngaahi ola ʻo ʻenau ʻahiʻahiʻi ʻa e founga faifakamoʻoni ʻi he feituʻu kakaí. Ko ia ʻi he 2011, naʻe tali ʻe he Kulupu Pulé ha polokalama foʻou ʻo e faifakamoʻoni ʻi he feituʻu kakaí ʻi Niu ʻIoke, ʻAmelika, ʻo ngāueʻaki ʻa e ngaahi tēpile mo e ngaahi papa tuʻuaki. Ko e kau tāimuʻa naʻa nau kau ʻi he polokalamá naʻe vave ʻenau ʻiloʻi naʻe lahi ʻa e ʻaonga ʻo e papa tuʻuakí, ʻo kau ai ʻa e faingofua hono ʻave holó. Naʻe toe ʻomai foki ʻe he kau tāimuʻá ha ngaahi fokotuʻu ʻaonga ki he founga ke toe fakaleleiʻi ai ʻa e tisaini ʻo e papa tuʻuakí. Ko e papa tuʻuaki ki muʻa naʻe faʻu mei he papá naʻe fuʻu mamafa ke toʻo holo ko ia naʻe faingataʻa ke ʻohake mo ʻohifo ʻi he sitepú. Ko ia naʻe toe fakaleleiʻi ia ke maʻamaʻa ange, kae ʻikai ke fuʻu maʻamaʻa ki hono puhiʻi ʻe he havilí. Naʻe toe fakakau ʻi he tisaini foʻou ko ení ha ngaahi vaʻe fōlalahi mo mālohi ange ke faingofua ai hono teke holo ʻi he feituʻu tokakoví. Tānaki atu ki aí, naʻe toe faʻu mo hano kiʻi puha tukuʻanga tohi.

Naʻe lavameʻa ʻa e polokalama foʻou ko ení! Ko ia ʻi he 2012, naʻe tali ʻe he Kulupu Pulé ke ngāueʻaki ʻa e papa tuʻuaki tohí ʻi māmani lahi. Naʻe fai ʻa e fokotuʻutuʻu mo ha kautaha ke nau faʻu ha ngaahi papa tuʻuaki lahi ʻaupito ʻo ngāueʻaki ʻa e ngaahi naunau maʻamaʻa kae tolonga.

ʻI he faai mai ʻa e ngaahi taʻú, naʻe toe fai hano kiʻi fakaleleiʻi ʻo e papa tuʻuakí. Ko e fakatātaá, ʻi he 2015, naʻe toe faʻu mo hano ʻufiʻufi milemila ke malu ai mei he ʻuhá. Ko Dina, ʻokú ne nofo ʻi he fonua ko Siōsiá, ʻokú ne houngaʻia ʻi he fakaleleiʻi ko ení. ʻOkú ne pehē, “ʻOku maʻu ʻe he papa tuʻuakí hano ‘kote fakaʻuha’ pē ʻaʻana ke ne maluʻi ʻa e ʻū tohí.” ʻI he 2017, naʻe toe ala maʻu foki mo ha ngaahi tuʻuaki makinito ʻi he ngaahi lea ʻe niʻihi. Ko Tomasz, ko ha tokoua ʻi Pōlani, ʻokú ne pehē: “Ko ha ngāue lahi hono toutou fetongi ʻa e ngaahi tuʻuaki naʻe faʻa fakapipiki ki muʻá. Ka ko e ngaahi tuʻuaki makinitó naʻe hoko ia ko ha founga lelei ʻaupito ange.” ʻI he 2019, naʻe toe fai ha ngaahi liliu ki he ngaahi naunau naʻe ngāueʻakí pea mo hono faʻu ʻo e ngaahi papa tuʻuakí ke ʻai ke toe tolonga ange.

Ko Hono Faʻu ʻa e Papa Tuʻuaki Tohí

Ko e papa tuʻuaki tohí ʻoku faʻu ia ʻe ha kautaha pē ʻe taha pea toki tufaki atu ia ʻi māmani lahi. ʻI he lolotonga ní, ko e mahuʻinga ʻo ha papa tuʻuaki ʻe taha, ʻo ʻikai kau ai ʻa e mahuʻinga hono fakafolaú mo e ngaahi fakamole kehé, ko e tola ʻAmelika ʻe $43. ʻI he aʻu mai ki he ʻaho ní, kuo laka hake ʻi he tola ʻAmelika ʻe $16 miliona kuo fakamoleki ki he ngaahi papa tuʻuakí, pea ko e papa tuʻuaki ʻe 420,000 tupu kuo fakafolau atu ki he ngaahi fakatahaʻangá ʻi māmani lahí.

Ke ngāue lelei taha ʻaki ʻa e paʻanga tokoní, ko e ngaahi papa tuʻuakí ʻoku ʻota fakalūkufua mai ia. ʻIkai ngata aí, kuo lava ʻe he ngaahi fakatahaʻangá he taimí ni ʻo ʻota ha ngaahi kongokonga pea ngāueʻaki ia ke monomono ʻaki ʻa e ngaahi papa tuʻuakí kae ʻikai ko hono toe fakafoʻou mai ia.

Faifakamoʻoni ʻAki ʻa e Papa Tuʻuakí

Ko e kau malanga takatakai ʻi he māmaní ʻoku nau fiefia ʻi hono ngāueʻaki ʻa e papa tuʻuakí. Ko Martina, mei Kana, ʻokú ne pehē: “ʻI he ngaahi tafaʻaki lahi taha ʻo ʻetau ngāue fakafaifekaú, ʻoku tau fakaofiofi ki he kakaí. Ko e meʻa ʻoku ou saiʻia ai ʻi he papa faifakamoʻoní ko e kakaí ia ʻoku nau fakaofiofi mai kiate kitautolú. Naʻa mo e niʻihi ʻoku nau lue haké ʻoku kei lava pē ke fai ha fakamoʻoni kiate kinautolu.”

ʻI ha fonua ʻAfilika ʻe taha, naʻe ʻi ai ha tangata naʻe haʻu ki he papa tuʻuakí ʻo ne ʻave ha ʻū tohi ʻi heʻene leá tonu. Naʻá ne foki mai ʻi ha uike ʻe taha ki mui ai peá ne pehē: “Naʻá ku lau kotoa ʻa e ʻū tohí. ʻOku mātuʻaki mahuʻinga ʻa e ngaahi fakamatala ʻi aí. Te u vahevahe ia ki hoku fāmilí ʻi homau koló,” ʻa ia ko e kilomita ʻe 500 (pe maile ʻe 311) nai hono mamaʻó. Hili ha māhina ʻe ua mei ai, naʻá ne toe foki mai peá ne tala mai: “Ko e kakai ʻi homau koló naʻa nau lau ʻa e ʻū tohí kotoa, pea naʻa nau fiefia ʻaupito ʻi he ngaahi fakamatala ko iá. ʻOku nau loto ke nau hoko ko e Kau Fakamoʻoni ʻa Sihova. Ka ʻoku ʻi ai ʻenau ngaahi fehuʻi. Ko e fakatātaá, ʻoku nau mahinoʻi ke hoko ʻo papitaisó, ʻe fiemaʻu ke fakauku kinautolu ʻi he vaí. Kae kehe, ʻoku ʻikai ke ʻi ai ha vaitafe ʻe ofi mai ki homau koló. ʻE fiemaʻu ke mau haʻu ki heni ʻo papitaiso ai?” Ko ia naʻe tokoniʻi leva ʻe he ongo malangá ʻa e tangatá ke ne fetuʻutaki mo ha tāimuʻa ʻoku lea ʻi heʻene leá. Pea talu mei ai kuo hokohoko atu ʻa e talanoa ʻa e tāimuʻá mo e tangatá.

ʻOku fakafiefia ke sio ki hono ngāueʻaki ʻa e papa tuʻuaki tohí ke malanga “ʻi he kotoa ʻo e māmani kuo nofoʻí ko ha fakamoʻoni ki he ngaahi puleʻanga kotoa pē.” (Mātiu 24:14) ʻOku anga-fēfē hono feau ʻa e ngaahi fakamole ki hono faʻu ʻa e papa tuʻuakí? Fakafou ʻi he ngaahi tokoni ki he ngāue ʻi māmani lahí, ʻa ia ko e lahi tahá ʻoku fai ia fakafou ʻi he donate.jw.org. Mālō ki hoʻo tokoni nima-homó.