Fakaʻilonga ʻOku Maʻu Ai ʻa e Fakahaofí
1 Ki muʻa ke fai ʻa ʻene ngaahi fakamaau māʻoniʻoní, ʻoku fai maʻu ai pē ʻe Sihova ʻa e fakatokanga mo tokonaki ki he faʻahinga angamaluú ha founga ke nau hao ai. ʻI he taimi ʻo ʻIsikelí, naʻe ʻi ai ʻa e faʻahinga naʻa nau māpuhoi mo toʻe ʻo fekauʻaki mo e ngaahi meʻa fakalielia kotoa pē naʻe faí. Naʻe ʻai ʻe Sihova ke fakaʻilongaʻi ʻa e faʻahinga taau ko iá ke fakahaofi. (ʻIsi. 9:4-6) ʻOku fakahoko ʻe heʻetau ngāue fakamalanga ʻi he ʻaho ní ʻa e taumuʻa tatau pē. ʻOku lava ke tau fakahoko ʻa e ngāue mahuʻingá ni.
2 Ko e ʻuluaki lākangá pē ko hono kumi ʻa e kakai loto-totonú. ʻOku tau fokotuʻutuʻu ki ha toe ʻaʻahi. Ko e teuteu ki he toe ʻaʻahí ʻoku fai pē ia ʻi he ʻuluaki ʻaʻahí ʻaki hono hiki ʻa e tohi naʻe tukú mo e kaveinga naʻe fetalanoaʻaki ki ai. Ko ʻetau ola lelei ʻi he toe ʻaʻahí ʻe fakatuʻunga lahi ia ʻi he meʻa naʻa tau teuteu ke leaʻaki mo fai ʻi heʻetau toe fokí.
3 ʻI ha toe ʻaʻahi ki ha “Taua Leʻo” naʻe tuku te ke lava ʻo fakahanga ʻa e tokanga ki he kaveinga tefitó:
◼ “Fakatokangaʻi ʻi he takafi ʻi muʻa ʻo e Taua Leʻo ʻoku hā ai ʻa e fakamatala “Fanongonongo Ai ʻa e Puleʻanga ʻo Sihova.” Ko e meʻa ʻoku laulōtaha ai ʻa e makasini ko ʻení ko ʻene fanongonongo ko e Puleʻanga ʻo e ʻOtua ʻa e fakaleleiʻanga pē ʻe taha ki he ngaahi palopalema kotoa pē ʻa e māmaní. ʻOkú ne fakamatala ki he meʻa ʻe fakahoko ʻe he Puleʻanga ʻo e ʻOtua ʻi he taimi ʻe fai ai ʻa e finangalo ʻo e ʻOtuá ʻi he māmaní. Ko e ongoongo lelei ʻeni naʻe pehē ʻe Sīsū ʻe fanongonongo ʻi māmani kotoa pē.” Lau ʻa e Mātiu 24:14, pea fakamatala ki he founga ʻe maʻu tuʻumaʻu ai ʻa e Taua Leʻo pea mo ngāueʻaki ki he ako Tohitapu tāutahá.
4 Te ke saiʻia nai ke fakahanga pē ʻa e tokanga ki he Tohitapú mo fakamamafaʻi ʻa e fiemaʻu ke lau maʻu pē ia. Te ke lava ʻo pehē:
◼ “ʻOku ngalingali ko e meimei tokotaha kotoa pē ʻoku tau ʻilo ʻe houngaʻia ʻi ha fakahinohino ʻaonga ki he anga ʻo e fekuki ola lelei mo e ngaahi palopalema ʻo e moʻuí ʻi he ʻaho kotoa pē. ʻOkú ke fakakaukau te tau maʻu mei fē ʻa e fakahinohino ʻa ia ʻe lava ke tau falala ki aí? [Tuku ke ne tali.] Ko e tokolahi naʻa nau falala ki he fakahinohino ʻa e ngaahi kaungāmeʻa pe naʻa nau totongi ha faleʻi fakapalofesinale kuo nau loto-mamahi lahi. ʻI he tafaʻaki ʻe tahá, ʻoku ʻilo ʻe he kakai ʻe laui miliona ko e Tohitapú pē ʻa e maʻuʻanga ʻo e fakahinohino ʻoku malava ke nau falala ki aí. ʻOku maʻu ʻi he Tohitapú ʻa e fakahinohino ki he ʻanga ʻo e fekuki mo ha palopalema pē ʻoku tau fehangahangai nai mo ia. [Lau 2 Tīmote 3:16, 17.] Neongo ʻokú ke pehē nai ʻoku faingataʻa ke mahino ʻa e Tohitapú, kau fakahā atu muʻa kiate koe ʻa e anga ʻo hono ngāueʻaki ia ʻo ʻatā ai kiate koe ʻa e tukuʻanga koloa ʻo e akonaki fakapotopotó.” Hoko atu ʻaki ʻa hoʻo huke ki he “ʻOfa” ʻi he konga ko e “ʻIniteki ʻo e Ngaahi Lea Fakatohitapu” ʻi mui ʻi he New World Translation, pea lave ki ha ngaahi fakamatala ʻoku fakahā ai ʻa e founga ʻe tokoni ai ʻa e ʻofá kiate kitautolu ke fakaleleiʻi ʻa e ngaahi faikehekehe mo e niʻihi kehé.
5 ʻI he kolo ke kamata ha ako Tohitapu foʻoú, te ke fili nai ke ngāueʻaki ʻa e tohi ko e “Te Ke Malava ʻo Moʻui Taʻengata he Palataisi ʻi he Māmaní,” ʻo ngāueʻaki ʻa e lea kamata ko ení:
◼ “ʻOku tau ʻofa ʻi hotau ngaahi fāmilí mo fiemaʻu ʻa e ngaahi tuʻunga lelei taha ʻe malava kiate kinautolú. ʻE ʻaonga fēfē ki ho fāmili ʻa e moʻui ʻi ha māmani ʻoku hangē ko ʻení?” Fakahā ʻa e ngaahi fakatātā ʻi he peesi 156-157. Lau ha konga Tohitapu ʻe taha pe ua mei he ongo peesí, pea fakamatala ko e ngaahi talaʻofa ʻeni naʻe fai ʻe Sihova ko e ʻOtuá, ʻa ia ʻoku ʻikai malava ʻo loi. Lave ki he fakahokohoko ʻo e ngaahi vahe ʻi he peesi 5 mo e 6, pea ʻeke ki he tokotaha-ʻapi pe ko e fē ʻa e kaveinga ʻokú ne mahuʻingaʻia lahi taha aí; huke ki he vahe ʻokú ne filí, pea fakamatalaʻi ha palakalafi ʻe taha pē ua.
6 Te ke saiʻia ke tokoni ki ha tokotaha kehe ke fakaʻilongaʻi ke fakahaofi? Ko e ola leleí ʻoku hoko ia mei hono ‘fai kotoa ʻo ho lakanga’ ʻaki ʻa e teuteu lelei mo toe ʻaʻahi leva ki he mahuʻingaʻia kotoa pē ʻokú ke maʻú.—2 Tīm. 4:5.