Ko e Potu Folofola Kotoa Pē ʻOku ʻAonga ki he Akonaki
1 Ko e ngaahi fakakaukau ʻo fekauʻaki mo e mahuʻinga ʻo e Tohitapú ʻoku lahi mo kehekehe. Kae kehe, ʻoku tau tuipau ʻoku ʻi he ngaahi peesi ʻo e Tohitapú ʻa e ngaahi tali ki he ngaahi palopalema fakapuputuʻu ʻa e faʻahinga ʻo e tangatá, pea pehē ki ha tākiekina falalaʻanga ki heʻetau founga moʻui fakafoʻituituí. (Pal. 3:5, 6) ʻOku laulōtaha ʻa e fakapotopoto ʻo ʻene akonakí. ʻOku ʻikai ke lakasi ʻa e ngaahi tuʻunga ʻulungaanga ʻokú ne poupouʻí. ʻOku mālohi ʻaupito ʻa ʻene pōpoakí, “ʻoku ne vavangaʻi ʻa e ngaahi holi mo e fakakaukau ʻo e loto.” (Hep. 4:12) ʻOku lava fēfē ke tau tokoni ki he niʻihi kehé ke nau sio ki he meʻa ʻoku fiemaʻú, ko hono toʻo ʻa e tohí ni mei he funga laupapá pea fai hano sivisiviʻi fakalelei? Te ke loto nai ke ʻahiʻahiʻi ha niʻihi ʻi he ngaahi fokotuʻu ʻoku hoko haké ʻi hono tuʻuaki ʻa e Fāʻūtaha ʻi he Lotu ki he ʻOtua Moʻoni Pē Taha ʻi he lolotonga ʻo Nōvemá.
2 Koeʻuhi ko e kakai tokolahi ʻoku nau hohaʻa ʻo fekauʻaki mo ʻenau ngaahi fiemaʻu tefitó, ko e lea kamata ko ʻení te ne maʻu mai nai ʻa ʻenau tokangá:
◼ “Ko e kakai tokolahi ʻoku ou talanoa ki ai ʻi he ngaahi ʻaho ní ʻoku nau hohaʻa ʻo fekauʻaki mo hono maʻu ha meʻa ki he moʻui ʻa honau fāmilí. Ko e tokolahi kuo nau fihia ʻi he tuli ki he ngaahi meʻa fakamatelié, pea ko e ola ʻo e meʻá ni ko e fakatupu mamahi. Ko fē ʻa e feituʻu lelei taha ke hanga ki aí, ki ha faleʻi ʻi he ngaahi meʻa peheé? [Tuku ke ne tali.] Kuó u ʻilo ʻoku ʻomai ʻi he Tohitapú ʻa e faleʻi ʻaonga ʻoku lava ke tokoni kiate kitautolu ke fakaʻehiʻehi ai mei he ngaahi palopalema taʻeʻaongá. Tuku ke u fakahā atu kiate koe ha fakatātā.” Huke ki he peesi 143 ʻi he tohi Fāʻūtaha ʻi he Lotu pea lau ʻa e ʻEfesō 5:25-27, ʻoku lave ki ai ʻi he palakalafi 9. ʻAi ha toe ngaahi fakamatala ʻi he palakalafi 10, pea tuʻuaki ʻa e tohí.
3 Ko ha fokotuʻu ʻeni ʻe taha ke ke fakakaukau nai ki ai:
◼ “ʻI he taimi hono kotoa pē ʻoku tau lau ai ʻa e pepá pe fanongo ki he ongonongó, ʻoku tau fanongo ai ki ha palopalema fakatupu mamahi ʻe taha ʻokú ne ʻai kitautolu ke tau ongoʻi loto-moʻua. [Lave ki ha meʻa fakatupu hohaʻa naʻe fakamatala ki muí ni mai ʻi he ongoongó.] ʻOku lava fēfē ke tau fekuki mo e ngaahi palopalema pehē ní? [Tuku ke ne tali.] ʻI he 1983, naʻe pehē ʻe he palesiteni ʻi he taimi ko iá ʻo e ʻIunaite Seteté [Ronald Reagan] ʻoku ʻi he Tohitapú ʻa e pōpoaki lahi taha kuo tohí, pea ʻoku ‘ʻi loto ʻi hono ngaahi peesí ʻa e ngaahi tali hono kotoa ki he ngaahi palopalema kotoa pē kuo ʻiloa ʻe he tangatá.’ Ko e meʻa naʻá ne leaʻakí ʻoku tau manatuʻi ai ʻa e meʻa ʻoku lea tonu ʻaki ʻi he Tohitapú. [Lau 2 Tīmote 3:16, 17.] Tuku ke u fakahā atu kiate koe ʻa e ʻuhinga ʻoku lava ke tau falala ai ki he Tohitapú.” Tuhu ki ha ngaahi meʻa mahuʻinga ʻe niʻihi mei he tuleki, Ko e ʻUhinga Ke Ke Falala Ai ki he Tohitapu. Fakahā ange te ke toe foki atu ke fetalanoaʻaki ki he fakaofo ʻo hono fakahoko ʻo e ngaahi kikite ʻi he Tohitapú ʻi he ngaahi meʻa ʻoku lolotonga hoko ʻi he māmaní.
4 Ko ʻetau Faiako Maʻongoʻongá kuó ne fakapapauʻi ko e ʻilo ki hono finangaló ʻoku ala maʻu ʻe kinautolu kotoa ʻoku nau fie ako ki aí. Ko e tokoni ki he niʻihi kehé ke houngaʻia ʻi he mahuʻinga moʻoni ʻo e Tohitapú, ko e taha ia ʻi he ngaahi meʻa lelei taha ʻoku lava ke tau fai ke tokoni kiate kinautolú; ʻoku lava ke fakahaofi ai ʻa ʻenau moʻuí.—Pal. 1:32, 33.