Naʻe Fokotuʻu ʻe Sīsū ʻa e Kau Maté

KO E taʻahine taʻu 12 ʻeni ʻokú ke sio ki aí. ʻOku puke ʻe Sīsū hono nimá, pea ko ʻene faʻeé mo ʻene tamaí ʻoku tuʻu ʻo ofi ʻi he tafaʻakí. ʻOkú ke ʻilo pe ko e hā ʻokú na fuʻu mata fiefia pehē aí? Tau sio angé.

Ko e tamai ʻa e taʻahiné ko ha tangata mahuʻinga ia ko Siailosi. ʻI he ʻaho ʻe taha, naʻe puke hono ʻofefiné, pea naʻe fakatokoto ia ki he mohengá. Ka naʻe ʻikai toe ake mai. Naʻá ne puke ʻo lahi ange mo toe lahi ange. Naʻe hohaʻa ʻaupito ʻa Siailosi mo hono uaifí, koeʻuhi he naʻe ngalingali ʻe mate ʻena kiʻi taʻahiné. Ko hona ʻofefiné pē ia ʻe taha. Ko ia naʻe ʻalu ʻa Siailosi ʻo kumi kia Sīsū. Naʻá ne fanongo ki he ngaahi mana naʻe fai ʻe Sīsuú.

ʻI hono ʻilo ʻe Siailosi ʻa Sīsuú, naʻe takatakai ia ʻe he fuʻu kakai tokolahi. Ka naʻe hū atu pē ʻa Siailosi ʻi he fuʻu kakaí ʻo fakatōmapeʻe ʻi he vaʻe ʻo Sīsuú. Naʻá ne pehē: ‘ʻOku puke lahi ʻaupito ʻa hoku ʻofefiné.’ Naʻá ne kole: ‘Kātaki, ʻo haʻu muʻa ke fakamoʻui ia.’ Naʻe pehē ange ʻe Sīsū ʻe haʻu.

ʻI heʻenau fononga atú, naʻe kei feteketekeʻi pē ʻa e fuʻu kakaí ke nau ofi ange. Naʻe tuʻu fakafokifā ʻa Sīsū. Naʻá ne ʻeke: ‘Ko hai naʻe ala mai kiate aú?’ Naʻe ongoʻi ʻe Sīsū naʻe mole atu ʻa e mālohi meiate ia, ko ia naʻá ne ʻilo ai kuo ala mai ha taha kiate ia. Ka ko hai? Ko ha fefine naʻá ne fuʻu puke lahi ʻo feʻunga mo e taʻu ʻe 12. Naʻá ne haʻu ʻo ala ki he kofu ʻo Sīsuú, pea kuo fakamoʻui ai ia!

Naʻe ongoʻi fiemālie heni ʻa Siailosi, koeʻuhi he naʻá ne sio ko e meʻa faingofua kia Sīsū ke ne fakamoʻui ha tokotaha. Ka naʻe toki haʻu ha talafekau. Naʻá ne tala kia Siailosi: ‘ʻOua te ke toe fakahohaʻasi ʻa Sīsū. Kuo mate ho ʻofefiné.’ Naʻe fanongo atu ʻa Sīsū ki he meʻá ni peá ne pehē kia Siailosi: ‘ʻOua te ke hohaʻa, ʻe sai pē ʻa ho ʻofefiné.’

ʻI heʻenau aʻu atu ki he fale ʻo Siailosí, naʻe tangi ʻa e kakaí ʻi he mamahi lahi. Ka naʻe pehē ʻe Sīsū: ‘ʻOua ʻe tangi. Kuo ʻikai ke mate ʻa e tamá. ʻOkú ne mohe pē.’ Ka naʻa nau kata mo fakakataʻaki ʻa Sīsū, koeʻuhi he naʻa nau ʻilo kuo mate ia.

Naʻe toki ʻave leva ʻe Sīsū ʻa e tamai mo e faʻē ʻa e taʻahiné mo e toko tolu ʻo ʻene kau ʻapositoló ki he loki ʻoku tokoto ai ʻa e tamá. Naʻá ne puke hono nimá ʻo ne pehē: ‘Tuʻu hake!’ Peá ne moʻui leva, ʻo hangē ko ia ʻokú ke sio ki ai ʻi hení. Peá ne tuʻu hake ʻo ʻalu holo! Ko e ʻuhinga ia ʻoku fuʻu fiefia ʻaupito ai ʻa ʻene faʻeé mo ʻene tamaí.

Naʻe ʻikai ko e ʻuluaki tokotaha ʻeni naʻe fokotuʻu ʻe Sīsū mei he maté. Ko e ʻuluaki ʻoku fakahā kiate kitautolu ʻe he Tohitapú ko e tamasiʻi ʻa e uitou ʻa ia naʻe nofo ʻi he kolo ko Neini. Ki mui mai, naʻe toe fokotuʻu mei he maté ʻe Sīsū ʻa Lasalosi, ko e tuongaʻane ʻo Mele mo Māʻata. ʻI he taimi ʻe pule ai ʻa Sīsū ko e tuʻi ʻa e ʻOtuá, te ne toe fokotuʻu mai mei he maté ʻa e kakai tokolahi ʻaupito ke toe moʻui. ʻIkai ʻoku tau fiefia ʻi he meʻá ni?