Ko e Founga ʻe Lava ke Tau Maʻu Ai ʻa e Moʻui Taʻengatá

ʻOKÚ KE ʻilo pe ko e hā ʻoku lau ʻe he kiʻi taʻahiné mo hono ongo kaungāmeʻá? ʻIo, ko e tohi pē ko eni ʻokú ke laú​—⁠Ko ʻEku Tohi ʻo e Ngaahi Talanoa Faka-Tohitapú. Pea ʻoku nau lau ʻa e talanoa pē ko ia ʻokú ke laú​—⁠“Ko e Founga ʻE Lava Ke Tau Maʻu Ai ʻa e Moʻui Taʻengatá.”

ʻOkú ke ʻilo ʻa e meʻa ʻoku nau ako ki aí? ʻUluaki, ʻoku fiemaʻu kiate kitautolu ke tau ʻilo ʻo kau kia Sihova mo hono ʻAló ko Sīsū kae malava ke tau moʻui taʻengata. ʻOku pehē ʻe he Tohitapú: ‘Ko e founga ʻeni ki he moʻui taʻengatá. Ako ʻo kau ki he ʻOtua moʻoní pē ʻe taha, mo e ʻAlo naʻá ne fekau mai ki he māmaní, ko Sīsū Kalaisi.’

ʻOku anga-fēfē haʻatau ako ʻo kau kia Sihova ko e ʻOtuá mo hono ʻAlo ko Sīsuú? Ko e founga ʻe taha ko e lau ʻo e Ko ʻEku Tohi ʻo e Ngaahi Talanoa Faka-Tohitapú mei hono kamataʻangá ki heʻene ʻosi. ʻOku lahi ʻene fakamatala ʻo kau kia Sihova mo Sīsū, ʻikai ko ia? Pea ʻoku lahi ʻene fakamatala ʻo kau ki he ngaahi meʻa kuó na fai mo e ngaahi meʻa te na toki fai. Ka ʻoku fiemaʻu kiate kitautolu ke fai ʻa e meʻa lahi ange ʻi hono lau pē ʻo e tohi ní.

ʻOkú ke sio ki he tohi ʻe taha ʻoku tuku ʻi he falikí? Ko e Tohitapú ia. ʻAi ha tokotaha ke ne lau atu kiate koe ʻa e ngaahi konga mei he Tohitapú ʻa ia ʻoku makatuʻunga mei ai ʻa e ngaahi talanoa ʻi he tohí ni. ʻOku ʻomai ʻe he Tohitapú kiate kitautolu ʻa e fakamatala kakato ʻoku fiemaʻu kiate kitautolú kae lava ke tau tauhi kia Sihova ʻi he founga totonú pea maʻu ai ʻa e moʻui taʻengatá. Ko ia ʻoku totonu ke tau angaʻaki ke ako maʻu pē ʻa e Tohitapú.

Ka ʻoku ʻikai ke feʻunga pē ʻa e ako ʻo kau kia Sihova ko e ʻOtuá mo Sīsū Kalaisí. ʻE lava ke tau maʻu ha ʻilo lahi ʻaupito ʻo kau kiate kinaua mo ʻena ngaahi akonakí, kae ʻikai pē ke tau maʻu ʻa e moʻui taʻengatá. ʻOkú ke ʻilo pe ko e hā mo ha toe meʻa kehe ʻoku fiemaʻú?

ʻOku toe fiemaʻu kiate kitautolu foki ke moʻui ʻo fakatatau ki he ngaahi meʻa ʻoku tau akó. ʻOkú ke manatuʻi ʻa Siutasi ʻIsikaliote? Ko e tokotaha ia ʻo e toko 12 naʻe fili ʻe Sīsū ke hoko ko ʻene kau ʻapositoló. Naʻe lahi ʻa e ʻilo ʻa Siutasi ʻo kau kia Sihova mo Sīsuú. Ka ko e hā naʻe hoko kiate iá? Naʻá ne hoko ʻo siokita, pea naʻá ne lavakiʻi ʻa Sīsū ki hono ngaahi filí ki he konga siliva ʻe 30. Ko ia ʻe ʻikai ke maʻu ʻe Siutasi ʻa e moʻui taʻengatá.

ʻOkú ke manatuʻi ʻa Kēhesi, ʻa e tangata naʻa tau ako ki ai ʻi he Talanoa 69? Naʻá ne loto ke maʻu ʻa e ngaahi kofu mo e paʻanga naʻe ʻikai ko haʻane meʻa iá. Ko ia naʻá ne fai ha loi ke maʻu ai ʻa e ngaahi meʻa ko iá. Ka naʻe tautea ia ʻe Sihova. Pea te ne tautea mo kitautolu foki ʻo kapau ʻe ʻikai te tau talangofua ki heʻene ngaahi laó.

Ka naʻe ʻi ai ʻa e kakai lelei tokolahi naʻa nau tauhi angatonu maʻu pē kia Sihova. ʻOku tau fiemaʻu ke tau hangē ko kinautolú, ʻikai ko ia? Ko kiʻi Sāmiuela ko ha faʻifaʻitakiʻanga lelei ia ke muimui ai. Manatuʻi, ʻi heʻetau sio ʻi he Talanoa 55, naʻá ne taʻu fā pe nima nai ʻi heʻene kamata tauhi kia Sihova ʻi hono tāpanekalé. Ko ia tatau ai pē pe ko e hā ho taʻu motuʻá, ʻoku ʻikai te ke fuʻu kei siʻi ke tauhi kia Sihova.

Ko e moʻoni, ko e tokotaha ʻoku tau fie muimui kotoa aí ko Sīsū Kalaisi. Naʻa mo e taimi naʻá ne kei tamasiʻi aí, ʻo hangē ko ia naʻe fakahā ʻi he Talanoa 87, naʻá ne ʻi ai ʻi he temipalé ʻo talanoa ki he niʻihi kehe ʻo kau ki heʻene Tamai fakahēvaní. Tau muimui ʻi heʻene faʻifaʻitakiʻangá. Tau tala ki he lahi taha ʻo e kakai te tau malavá ʻo kau ki hotau ʻOtua fakaofo ko Sihová mo hono ʻAló, ko Sīsū Kalaisi. Kapau te tau fai ʻa e ngaahi meʻa ko ʻení, ʻe lava ke tau maʻu ʻa e moʻui taʻengata ʻi he palataisi foʻou ʻa e ʻOtuá ʻi he māmaní.