ʻOku Fiemaʻu Kitautolu Kotoa kae Lava ʻa e Ngāué
1 ʻOku totonu ki he kau ākonga kotoa pē ʻa Sīsū Kalaisí ke nau mahuʻingaʻia ko ʻene feinga ke poupou pea kau ki he ngāue malangaʻi ʻo e Puleʻangá ko e meʻa mātuʻaki mahuʻinga ia. Naʻe fakatokangaʻi ʻe Sīsū ko ʻene kau ākongá te nau fakatupu ha fua ʻo e Puleʻangá ʻi he ngaahi tuʻunga lahi kehekehe. (Mt. 13:23) Neongo ko ha konga lahi ʻo e ngāue fakamalangá ʻoku fai ia ʻe he kau tāimuʻa ngāue mālohi tokolahi, ko kinautolu kotoa ʻoku hokohoko atu tōtōivi ʻi hono fakalāngilangiʻi ʻa e ʻOtuá ʻaki hono fakatupu ʻa e fua lahi ʻoku malavá ʻoku fakaongoongoleleiʻí.—Sione 15:8.
2 Ko e Ngaahi Feinga Fakatahá ʻOku Fakahoko Ai ʻa e Meʻa Lahi: Naʻe tala ki muʻa ʻe Sīsū ko e ngaahi feinga fakataha ʻa e kotoa ʻo ʻene kau ākongá ʻe fakatupu ai ʻa e ngaahi ngāue lahi ange ia ʻi haʻaná. (Sione 14:12) Pe ʻoku fakangatangata ʻe hotau ngaahi tuʻunga fakafoʻituituí ʻa e meʻa ʻoku tau malavá pe ʻoku nau fakaʻatā kitautolu ke fakamoleki ʻa e taimi lahi ange ʻi he malangaʻi ʻo e Puleʻangá, ʻoku fiemaʻu kitautolu kotoa kae lava ʻa e ngāué. ʻOku hangē pē ko ia naʻe fakahā ʻe Paulá: “ʻA e sino kotoa, pea fai ai pe ʻene tupu mei he ngaahi fakahokoʻanga kotoa pe ʻo e tokoni, ʻi he ngaue ʻa e foʻi meʻa taki taha ʻo tāu mo ʻene mafai.”—Ef. 4:16.
3 ʻOku ongoʻi nai ʻe he niʻihi ko ʻenau ngaahi feingá ʻoku ʻikai ke lahi. Kae kehe, ʻi he ʻafio mai ʻa Sihová ko e meʻa mahuʻingá ko ʻetau ngāué ke ʻaufuatō. Ko e meʻa kotoa pē ʻoku tau fai kiate iá ʻoku mahuʻinga pea fakahoungaʻi.—Fakafehoanaki mo Luke 21:1-4.
4 Hokohoko Atu ke Poupouʻi ʻa e Ngāué: Ko kitautolu kotoa pē ʻoku tau maʻu ʻa e monū ke tokoni fakamatelie ki he ngāue ʻi māmani lahí. ʻOku lava foki ʻa e niʻihi ke tokoni ʻaki ʻenau ngāue ʻo kau ki hono poupouʻi ʻa e ngāue ʻo e Puleʻangá. ʻOku lava ʻa e tokotaha taki taha ʻo feinga ke fai ha ngaahi fakamatala ʻosi teuteuʻi lelei ʻi he ngaahi fakatahá pea kau ki he Akoʻanga Fakafaifekau Fakateokalatí. ʻI hono ngāueʻaki ʻa e ngaahi faingamālié ke fakalototoʻaʻi ʻa e niʻihi kehé, ʻoku tau fai ai ha tokoni mahuʻinga ki he tuʻunga fakalaumālie ʻo e fakatahaʻangá, pea ʻoku tānaki atu ʻa e meʻá ni ki heʻene malava ke fakahoko ʻa e ngāue ʻoku tuku ki aí.
5 ʻIo, ʻoku fiemaʻu kitautolu kotoa kae lava ʻa e ngāué. ʻOku ʻikai totonu ki ha taha ke ne ongoʻi ʻoku ʻikai ke kaunga ia ki ai. Ko ʻetau ngaahi feinga fakatahá, fakatouʻosi ʻi he lahi mo e siʻisiʻi, ʻi hono tauhi ʻa Sihová ʻoku fakafaikehekeheʻi ai kitautolu ko e kau lotu moʻoni pē ia ʻa e ʻOtuá. (Mal. 3:18) Ko e tokotaha taki taha ʻo kitautolu ʻoku lava ke ʻi ai hono kaunga mohu ʻuhinga ki hono fakalāngilangiʻi ʻa Sihová pea ʻi hono tokoniʻi ʻa e niʻihi kehé ke nau ʻilo pea tauhi kiate iá.