Naʻe Hoko ha Faingataʻa kia Taina

ʻOKÚ KE sio pe ko hai ʻoku ʻalu ʻa Taina ʻo ʻeva ki aí? ʻOkú ne ʻalu ʻo ʻeva ki he tamaiki fefine ʻi he fonua ko Kēnaní. ʻE fiefia nai ʻa ʻene tamai ko Sēkopé ʻi he meʻá ni? Ke tokoni ki hono tali ʻa e fehuʻí ni, feinga ke ke manatuʻi pe naʻe anga-fēfē ʻa e fakakaukau ʻa ʻĒpalahame mo ʻAisake ʻo fekauʻaki mo e kau fefine Kēnaní.

Naʻe fiemaʻu nai ʻe ʻĒpalahame ke mali ʻa hono foha ko ʻAisaké mo ha taʻahine mei Kēnani? ʻIkai, naʻe ʻikai te ne fiemaʻu ia. Naʻe fiemaʻu ʻe ʻAisake mo Lepeka ke mali hona foha ko Sēkopé mo ha taʻahine Kēnani? ʻIkai, naʻe ʻikai te na fiemaʻu ia. ʻOkú ke ʻilo hono ʻuhingá?

Koeʻuhi he ko e kakai ko ʻeni ʻi Kēnaní naʻa nau lotu ki he ngaahi ʻotua loi. Naʻe ʻikai ko ha kakai lelei kinautolu ke maʻu ko ha husepāniti pe ko ha uaifi, pea naʻe ʻikai ko e kakai lelei ke kaungāmeʻa ofi mo kinautolu. Ko ia ʻoku tau ʻilo pau naʻe ʻikai fiemālie ʻa Sēkope ke kaungāmeʻa hono ʻofefiné mo e tamaiki fefine ko eni ʻo Kēnaní.

Ko e meʻa naʻe pau ke hokó, naʻe tō ʻa Taina ki he faingataʻá. ʻOkú ke sio ki he tangata Kēnani ʻi he fakatātaá ʻokú ne sio kia Tainá? Ko hono hingoá ko Sīkemi. ʻI he ʻaho ʻe taha naʻe haʻu ai ʻa Taina ko ʻene ʻeva, naʻe hanga ʻe Sīkemi ʻo fakamālohiʻi ʻa Taina ke na tākoto. Ko e meʻá ni naʻe hala, koeʻuhi ko e tangata mo e fefine mali pē ʻoku totonu ke nau fai pehē. Ko e meʻa ʻoku kovi ko ʻeni naʻe fai ʻe Sīkemi kia Tainá naʻe iku ia ki he ngaahi faingataʻa lahi ange.

ʻI he fanongo ʻa e ngaahi tuongaʻane ʻo Tainá ʻi he meʻa naʻe hokó, naʻa nau ʻita lahi ʻaupito. Ko e toko ua ʻo kinautolu, ko Simione mo Līvai, naʻá na fuʻu ʻita lahi peá na toʻo ai ʻa e heletā peá na ʻalu atu ki he koló ʻo ʻohofi fakafokifā ʻa e kau tangatá ni. Ko kinaua mo hona ngaahi tokouá naʻa nau tāmateʻi ʻa Sīkemi pea mo e kau tangata kehe kotoa. Naʻe ʻita ʻa Sēkope ʻi hono fai ʻe hono ngaahi fohá ʻa e meʻa ʻoku kovi ko ʻení.

Naʻe kamata fēfē ʻa e faingataʻa kotoa ko ʻení? Naʻe hoko ʻeni koeʻuhi ko e kaungāmeʻa ʻa Taina mo e kakai naʻe ʻikai talangofua ki he ngaahi lao ʻa e ʻOtuá. Heʻikai te tau saiʻia ke maʻu ha ngaahi kaungāmeʻa pehē, ʻikai ko ia?