Founga Naʻe Fakahaofi Ai ʻa e Pēpē ko Mōsesé

SIO ki he kiʻi pēpē ʻoku tangi pea ʻoku piki ki he tuhu ʻo e fefiné. Ko Mōsese ia. ʻOkú ke ʻilo pe ko hai ʻa e fefine fakaʻofoʻofa ko ʻení? Ko e pilinisesi ʻIsipite ia, ko e ʻofefine tonu ia ʻo Felo.

Naʻe fūfuuʻi ʻe he faʻē ʻa Mōsesé ʻa ʻene pēpeé ʻo aʻu ki hono māhina tolu, koeʻuhi he naʻe ʻikai te ne loto ke tāmateʻi ia ʻe he kau ʻIsipité. Ka naʻá ne ʻilo ʻe maʻu nai ʻa Mōsese, ko ia ko e meʻa ʻeni naʻá ne fai ke fakahaofi ai iá.

Naʻá ne ngaohi ha kato ke ʻoua naʻa toe lava ha vai ʻo hū ki he loto kató. Pea naʻá ne toki tuku ʻa Mōsese ki he loto kató, pea tuku ʻa e kató ʻi he ngaahi musie lalahi ʻi he Vaitafe Nailá. Naʻe fekau kia Meliame, ko e tuofefine ʻo Mōsesé, ke ne nofo ofi pē ai ʻo vakai pe ko e hā ʻa e meʻa ʻe hokó.

Naʻe taimi siʻi pē mei ai mo e haʻu ʻa e ʻofefine ʻo Feló ki he Vaitafe Nailá ke kaukau. Naʻe fakafokifā ʻene sio ki he kato ʻi he loto musie lōloá. Naʻá ne ui ʻa e taha ʻo ʻene kau sevāniti fefiné: ‘ʻAlu ʻo ʻomai ʻa e kató kiate au.’ ʻI hono fakaava ʻe he pilinisesí ʻa e kató, ko ha toki pēpē fakaʻofoʻofa moʻoni ē naʻá ne sio ki ai! Naʻe tangi pē ʻa siʻi Mōsesé, pea naʻe ongoʻi ʻofa ai ʻa e pilinisesí. Naʻe ʻikai te ne loto ke tāmateʻi ia.

Naʻe toki haʻu ʻa Meliame. ʻOku lava ke ke sio ki ai ʻi he fakatātā ko ʻení. Naʻe ʻeke ʻe Meliame ki he ʻofefine ʻo Feló: ‘Te u ʻalu ʻo ui mai ha fefine ʻIsileli ke ne tauhi ʻa e pēpeé maʻau?’

Naʻe tali ange ʻe he pilinisesí: ‘ʻIo, kātaki ʻo fai ia.’

Ko ia naʻe lele vave ʻa Meliame ʻo tala ia ki heʻene faʻeé. ʻI he haʻu ʻa e faʻē ʻa Mōsesé ki he pilinisesí, naʻe pehē ʻe he pilinisesí: ‘ʻAve ʻa e pēpeé ni ʻo tauhi maʻaku, pea te u totongi kiate koe.’

Ko ia naʻe tauhi ai pē ʻe he faʻē ʻa Mōsesé ia ʻa ʻene tamá tonu. Ka ʻi he taimi ne motuʻa feʻunga ai ʻa Mōsesé, naʻá ne ʻave ia ki he ʻofefine ʻo Feló, ʻa ia ne ohi ia ko ʻene tama tonu. Ko e founga ia naʻe tupu hake ai ʻa Mōsese ʻi he fale ʻo Feló.