Ko e Foaki ʻe Sihova ʻEne Ngaahi Laó

NAʻE feʻunga nai mo e māhina ʻe ua ʻo e mavahe ʻa e kau ʻIsilelí mei ʻIsipité, ne nau aʻu ai ki he Moʻunga Sainaí, ʻa ia naʻe toe ui foki ko Hōlepi. Ko e feituʻu tatau pē ʻeni naʻe lea ai ʻa Sihova kia Mōsese ʻi he ʻakau naʻe uló. Naʻe ʻapitanga heni ʻa e kakaí pea nau kiʻi nofo ai.

ʻI he tatali ʻa e kakaí ʻi laló, naʻe kaka ʻa Mōsese ki he moʻungá. ʻI ai ʻi he funga moʻungá, naʻe tala ʻe Sihova kia Mōsese ʻokú Ne fiemaʻu ʻa e kau ʻIsilelí ke talangofua ange kiate Ia pea ke nau hoko ko ʻEne kakai makehe. ʻI he foki hifo ʻa Mōsesé, naʻá ne tala ki he kau ʻIsilelí ʻa e meʻa naʻe leaʻaki ʻe Sihová. Pea naʻe pehē ʻe he kakaí te nau talangofua kia Sihova, koeʻuhi ʻoku nau saiʻia ke hoko ko ʻene kakai.

Naʻe toki fai leva ʻe Sihova ha meʻa ngalikehe. Naʻá ne ʻai ʻa e funga moʻungá ke kohu, mo ne fakatupunga ha mana leʻo lahi. Naʻá ne toe lea ki he kakaí: ‘Ko au ko Sihova ko homou ʻOtua ʻa ia naʻá ne ʻomi kimoutolu mei ʻIsipite.’ Pea naʻá ne tuʻutuʻuni: ‘Kuo pau ke ʻoua naʻa mou lotu ki ha toe ʻotua kehe ka ko au pē.’

Naʻe toe ʻoange foki ʻe he ʻOtuá ki he kau ʻIsilelí ha toe fekau, pe ngaahi lao, ʻe hiva. Naʻe ilifia ʻaupito ʻa e kakaí. Naʻa nau tala kia Mōsese: ‘Ke ke lea kiate kimautolu, koeʻuhi he ʻoku mau ilifia he kapau ʻe lea mai ʻa e ʻOtuá kiate kimautolu te mau mate nai.’

Ki mui mai ai naʻe tala ʻe Sihova kia Mōsese: ‘Haʻu kiate au ki he moʻungá. Te u ʻoatu kiate koe ha maka lafalafa ʻe ua kuo u hiki ai ʻa e ngaahi lao ʻoku ou fiemaʻu ke tauhi ʻe he kakaí.’ Ko ia naʻe toe ʻalu hake ai ʻa Mōsese ki he moʻungá. Naʻá ne nofo ai ʻi he ʻaho mo e pō ʻe 40.

Naʻe lahi ʻaupito ʻa e ngaahi lao ʻa e ʻOtuá ki heʻene kakaí. Naʻe hiki ʻe Mōsese ʻa e ngaahi lao ko ʻeni. Naʻe toe ʻoange ʻe he ʻOtuá kia Mōsese ʻa e ongo maka lafalafa. Naʻe ʻosi tohi ai ʻe he ʻOtuá ia ʻa e ngaahi lao ʻe 10 ʻa ia naʻá ne leaʻaki ki he kakaí kotoa. Naʻe ui ia ko e Fekau ʻe Hongofulu.

Ko e Fekau ʻe Hongofulú ko e ngaahi lao mahuʻinga ia. Ka naʻe pehē pē mo e ngaahi lao kehe naʻe ʻoange ʻe he ʻOtuá ki he kau ʻIsilelí. Ko e taha ʻo e ngaahi lao ko ʻení: ‘Kuo pau ke ke ʻofa kia Sihova ko ho ʻOtuá ʻaki ʻa e kotoa ho lotó, kotoa ho ʻatamaí, mo hoʻo moʻuí kotoa pea mo e kotoa ho iví.’ Pea ko e taha ʻo e ngaahi laó: ‘Kuo pau ke ke ʻofa ki ho kaungāʻapí ʻo hangē pē ko hoʻo ʻofa kiate koe.’ Naʻe pehē ʻe he ʻAlo ʻo e ʻOtuá, ʻa Sīsū Kalaisi, ko e ongo lao mahuʻinga lahi taha ʻeni naʻe ʻoange ʻe Sihova ki heʻene kakai ʻIsilelí. Te tau ako ʻamui ange ki ha ngaahi meʻa lahi ʻo fekauʻaki mo e ʻAlo ʻo e ʻOtuá mo ʻene ngaahi akonakí.