“ʻE ʻIkai Te Ma Faʻa Tuku ʻEma Lea”
1 ʻOku vakaiʻi lelei ʻe Sīsū Kalaisi ʻa e ngāue fakamalangá. (Mt. 28:20; Mk. 13:10) Neongo ʻoku ʻi ai ʻa e kau fanongonongo longomoʻui ʻe meimei toko ono miliona ʻoku nau faifakamoʻoni ʻi he ngaahi fonua ʻe 234, kuo pau ke ʻoua te tau fakamahalo ʻo pehē ko ʻetau faifakamoʻoní kuo ʻosi. ‘ʻE ʻikai te tau faʻa tuku ʻetau lea’ ʻo fekauʻaki mo e ngaahi meʻa kuo tau akó, kae ʻoua ke toki talaki ʻe he ʻOtuá ʻo pehē kuo ʻosi ʻa e ngāué.—Ng. 4:20.
2 Falala ki he Laumālie ʻo e ʻOtuá: ʻOku ngāueʻaki ʻe Sētane ʻa e tenge lahi ke fakalotosiʻiʻi ʻaki kitautolu. (Fkh. 12:17) Ko hotau kakano taʻehaohaoá tonu ʻokú ne toe fakahohaʻasi kitautolu ʻaki ʻa e ngaahi palopalema lahi. Ko e ngaahi meʻa peheé ʻoku lava ke nau afeʻi ʻetau tokangá mei he ngāue fakamalanga mahuʻinga tahá. Ka neongo ia, kapau ʻoku tau falala kia Sihova, ʻe tokoniʻi kitautolu ʻe hono laumālié ke tau fehangahangai mo ha fakafaingataʻaʻiaʻanga pē.
3 ʻI he taimi naʻe fakatangaʻi anga-kakaha ai ʻa e fakatahaʻanga Kalisitiané ʻi he ʻuluaki senitulí, naʻe lotu ʻa e fanga tokouá ki he ʻOtuá ki ha tokoni ke nau hanganaki leaʻaki ʻene folofolá ʻaki ʻa e taʻemālūʻia kotoa pē. Naʻe tali ʻe Sihova ʻenau lotú, ʻo fakahūhū kiate kinautolu hono laumālié pea ʻoange kiate kinautolu ʻa e faivelenga mo e fakapapau naʻe fiemaʻú ke hokohoko atu ai ʻenau malangá. Ko hono olá, naʻa nau hokohoko atu taʻetuku ʻa hono talaki taʻemālūʻia ʻa e ongoongo leleí.—Ng. 4:29, 31; 5:42.
4 ʻOua ʻe Manavahē ki he Lea Fakalotosiʻí: Ko e fakakaukau fakalūkufuá pe lea lauʻikovi loi fakahāhaá ʻe hoko nai ia ke ʻi ai haʻane uesia ʻi ha tuʻunga fakamanamana kiate kitautolu. Kae kehe, manatuʻi ʻa e fakamatala taʻemālūʻia ʻa Pita pea mo e kau ʻapositolo kehé ki he Sanetalimí, ʻa ia ʻoku hiki ʻi he Ngāue 5:29-32. Hangē ko ia naʻe fakahaaʻi moʻoni ʻe he faiako Lao ko Kāmelielí, ko e ngāue ʻa e ʻOtuá ʻe ʻikai lava ke liua. ʻOku ʻikai ke fakahoko ia ʻaki hotau mālohí. Ko e ngāue lahi ko ʻení ʻoku poupouʻi ia ʻe he ʻOtuá, pea ko ia pē te ne malava ʻo fakahoko iá!—Sak. 4:6.
5 ʻAi ke tau kole fakamātoato fakaʻaho kia Sihova ki hono laumālié ke ne tokoniʻi kitautolu ke tau fanongonongo faivelenga atu ʻa e ongoongo leleí. ʻOfa ke tau leaʻaki, ʻo hangē ko ia naʻe leaʻaki ʻe Selemaiá, ko e pōpoaki ko ia ʻo e Puleʻangá ʻoku hangē ia ha afi vela ʻi hotau ngaahi huí. (Sel. 20:9) ʻE ʻikai lava ke tau fakalongolongo!