Ko ha Kiʻi Tamasiʻi Naʻe Tauhi ki he ʻOtuá

ʻIKAI ko ha kiʻi tamasiʻi matamatalelei eni? Ko hono hingoá ko Sāmiuela. Pea ko e tangata ʻokú ne hili hono nimá ʻi he ʻulu ʻo Sāmiuelá ko e taulaʻeiki lahi ia ʻo ʻIsileli ko ʻĪlai. Ko e tamai ʻena ʻa Sāmiuelá ko ʻElikena mo ʻene faʻeé ko ʻAna ʻokú na ʻomai ʻa Sāmiuela kia ʻĪlaí.

Ko e taʻu nai ʻeni ʻe fā pe nima ʻo Sāmiuela. Ka te ne nofo ʻi he tāpanekale ʻo Sihová fakataha mo ʻĪlai pea mo e kau taulaʻeiki kehé. Ko e hā nai hono ʻuhinga naʻe ʻave ai ʻe ʻElikena mo ʻAna ha taha kei siʻi pehē ʻo hangē ko Sāmiuelá ke tauhi kia Sihova ʻi he tāpanekalé? Tau vakai ange.

Ko e ngaahi taʻu siʻi ki muʻa hení naʻe mamahi ʻaupito ʻa ʻAna. Ko hono ʻuhingá ko e ʻikai haʻane pēpē, ka naʻá ne fuʻu fiemaʻu ʻaupito haʻane tama. Ko ia ʻi he ʻaho ʻe taha naʻe ʻaʻahi ai ʻa ʻAna ki he tāpanekale ʻo Sihová, peá ne lotu: ‘ʻE Sihova, manatuʻi au! Kapau te ke ʻomai haʻaku tama, ʻoku ou talaʻofa atu te u foaki atu ia maʻau koeʻuhi ke ne tauhi kiate koe ʻi he kotoa ʻo ʻene moʻuí.’

Naʻe tali ʻe Sihova ʻa e lotu ʻa ʻAná, pea naʻe ʻosi ha ngaahi māhina naʻá ne fāʻeleʻi ʻa Sāmiuela. Naʻe ʻofa ʻaupito ʻa ʻAna ʻi heʻene kiʻi tamasiʻí, pea naʻá ne kamata akoʻi ia ʻo fekauʻaki mo Sihova lolotonga ʻoku kei siʻi ʻaupito. Naʻá ne tala ki hono husepānití: ‘ʻI he taimi pē kuo lahi feʻunga ai ʻa Sāmiuela ʻo ʻikai ke toe fiemaʻu ke tauhi ia ʻe ha tahá, te u ʻave ia ki he tāpanekalé ke ne tauhi ai kia Sihova.’

Ko e meʻa ia naʻe fai ʻe ʻAna mo ʻElikena ʻa ia ʻoku hā ʻi he fakatātaá ni. Pea koeʻuhi ko hono akoʻi lelei ʻo Sāmiuela ʻe heʻene ongo mātuʻá, naʻá ne fiefia ke tauhi kia Sihova ʻi he tēniti ʻo Sihová. ʻI he taʻu kotoa naʻe haʻu ʻa ʻAna mo ʻElikena ke lotu ʻi he tēniti makehé ni, pea ke sio ki heʻena kiʻi tamasiʻí. Pea ko e taʻu kotoa naʻe ʻomai maʻu pē ʻe ʻAna ha kote foʻou ʻoku ʻikai hano nima kuó ne ngaohi moʻo Sāmiuela.

ʻI he faai atu ʻa e ngaahi taʻú, naʻe hokohoko atu pē ʻa e tauhi ʻa Sāmiuela kia Sihova ʻi hono tāpanekalé, pea naʻe saiʻia fakatouʻosi ʻa Sihova mo e kakaí ʻiate ia. Ka naʻe ʻikai ke sai ʻa e ongo foha ʻo e taulaʻeiki lahi ko ʻĪlaí ko Hofinai mo Fineasi. Naʻá na fai ha ngaahi meʻa lahi ʻoku kovi, mo ʻai ha niʻihi kehe ke talangataʻa foki kia Sihova. Naʻe totonu ke toʻo kinaua ʻe ʻĪlai mei he tuʻunga taulaʻeikí, ka naʻe ʻikai te ne fai pehē.

Naʻe ʻikai tuku ʻe Sāmiuela ʻa e ngaahi meʻa ʻoku kovi ʻoku fai ʻi he tāpanekalé ke ne taʻofi ia mei heʻene tauhi kia Sihová. Ka koeʻuhi ko e tokosiʻi ʻa e kakai naʻa nau ʻofa moʻoni kia Sihová, naʻe fuoloa mo e ʻikai toe lea ʻa Sihova ki ha taha ʻo e faʻahinga ʻo e tangatá. ʻI he taimi naʻe hoko ʻo kiʻi lahi ange ʻa Sāmiuelá ko e meʻa ʻeni naʻe hokó:

Naʻe maʻu mohe ʻa Sāmiuela ʻi he tāpanekalé pea ongo mai ha leʻo ʻo ne ʻā hake. Naʻá ne tali: ‘Ko au ʻeni.’ Peá ne tuʻu hake ʻo lele kia ʻĪlai, mo ne pehē: ‘Naʻá ke ui au, pea ko au ʻeni.’

Ka naʻe tali ange ʻe ʻĪlai: ‘Naʻe ʻikai te u ui koe; foki ʻo mohe.’ Ko ia naʻe toe foki ʻa Sāmiuela ʻo mohe.

Pea naʻe toe ui ko hono tuʻo ua: ‘Sāmiuela!’ Ko ia naʻe toe tuʻu hake ʻa Sāmiuela ʻo lele kia ʻĪlai. Naʻá ne pehē: ‘Naʻá ke ui au, pea ko au ʻeni.’ Ka naʻe tali ange ʻe ʻĪlai: ‘Naʻe ʻikai te u ui koe, ʻe hoku foha. Toe ʻalu ʻo mohe.’ Ko ia naʻe toe foki ʻa Sāmiuela ki hono mohengá.

‘Sāmiuela!’ ko e ui ia hono tuʻo tolú. Ko ia naʻe toe lele ʻa Sāmiuela kia ʻĪlai. Naʻá ne pehē: ‘Ko au eni, he kuo pau ko koe pē naʻá ke ui aú.’ Naʻe toki ʻilo ʻe ʻĪlai ʻoku pau ko Sihova naʻe uí. Ko ia naʻá ne tala ange kia Sāmiuela: ‘Toe foki ʻo tokoto, pea kapau te ne toe ui, pea ke lea ʻo pehē: “Lea mai ʻe Sihova, he ʻoku fakaongo atu ʻa hoʻo sevānití.”’

Ko e meʻa ia naʻe leaʻaki ʻe Sāmiuela ʻi he toe ui mai ia ʻe Sihová. Naʻe toki tala leva ʻe Sihova kia Sāmiuela ʻo pehē te ne tautea ʻa ʻĪlai mo hono ongo fohá. Ki mui mai ai naʻe mate ʻa Hofinai mo Fineasi ʻi he tau mo e kau Filisitiá, pea ʻi he fanongo ʻa ʻĪlai ki he meʻa naʻe hokó naʻá ne tō ʻo motu hono kiá ʻo ne mate ai. Ko ia naʻe hoko ʻo moʻoni ʻa e lea ʻa Sihová.

Naʻe tupu hake ʻa Sāmiuela, ʻo ne hoko ko e fakamaau fakamuimui taha ia ʻo ʻIsilelí. ʻI heʻene tupu ʻo motuʻá, naʻe kole ange ʻe he kakaí kiate ia: ‘Fili ha tuʻi ke ne pule kiate kitautolu.’ Naʻe ʻikai ke fie fai ʻeni ʻe Sāmiuela, koeʻuhi he ko hono moʻoní ko Sihova ko honau tuʻí. Ka naʻe tala ʻe Sihova kiate ia ke fakaongo ki he kakaí.