Fakahaaʻi ʻa e Mahuʻingaʻia Fakafoʻituitui—ʻAki ʻa e Hoko ʻo Anga-Lelei
1 ʻI hono manatuʻi ʻa e fuofua taimi naʻá ne fetaulaki ai mo e taha ʻo e Kau Fakamoʻoni ʻa Sihová, naʻe pehē ʻe ha fefine ʻa ia naʻá ne tomuʻa fehiʻa ʻi he Kau Fakamoʻoní: “ʻOku ʻikai moʻoni te u manatuʻi ʻe au ʻa e meʻa naʻá ma talanoa ki aí, ka ko e meʻa naʻá ku manatuʻí ko ʻene anga-lelei moʻoni mai kiate aú, pea mo ʻene anga-talitali kakaí mo e anga-fakatōkilaló. Naʻá ku ongoʻi ʻoku tohoakiʻi moʻoni au kiate ia.” Ko e fakamatala ko ení ʻoku fakamamafaʻi ai ʻa e mahuʻinga ʻo hono fakahaaʻi ʻa e mahuʻingaʻia fakafoʻituitui loto-moʻoni ʻi he faʻahinga ʻa ia ʻoku tau malanga ki aí.—Fili. 2:4.
2 Ko ʻOfá ʻOku Anga-Lelei: Ko e founga ʻe taha ʻe lava ke tau fakahāhā ai ʻa e ʻofa ki he niʻihi kehé ko e hoko ʻo anga-lelei. (1 Kol. 13:4) Ko ha tokotaha anga-lelei ʻokú ne mātuʻaki mahuʻingaʻia ʻi he lelei ʻa e niʻihi kehé, ʻo kumi ke fai ʻa e ngaahi meʻa ʻaonga maʻa kinautolu. ʻOku moʻoni, ko e ngāue fakamalangá ʻiate ia pē ko ha ngāue ia ʻo e anga-leleí. Ka ko ʻetau tokanga moʻoni ki he kakaí ʻe tapua atu ia ʻo ʻikai ʻi he malanga pē kia kinautolú. Ko e kotoa ʻo ʻetau tōʻonga ʻi he feangainga mo e kakaí—ʻa ʻetau anga-fakakaumeʻá, ko ʻetau ngaahi tōʻonga anga-fakaʻapaʻapá, ko e anga ʻo ʻetau fanongó, ko e ngaahi meʻa ʻoku tau leaʻakí mo e anga ʻo ʻetau leaʻaki iá, naʻa mo e anga ʻo ʻetau sio ki he niʻihi kehé—te ne fakahaaʻi ai ʻoku tau tokanga moʻoni.—Mt. 8:2, 3.
3 Ko e tokanga anga-ʻofa ki he kakaí te ne toe ueʻi ai kitautolu ke tau ʻoatu ʻa e tokoni ʻi he ngaahi founga ʻaonga. Lolotonga ʻa e malanga mei he fale ki he falé, naʻe fekauʻi vave ai ʻe ha uitou taʻumotuʻa ha tokoua tāimuʻa ke hū ki tuʻa ʻi heʻene ʻiloʻi ko ha Fakamoʻoni iá. Naʻe tala ange ʻe he uitoú naʻá ne kaka ʻi ha kiʻi tuʻunga he peitó ʻo feinga ke fetongi ha foʻi ʻuhila ʻi he taimi naʻe fakatatangi ai ʻe he tokouá ʻa e fafangu ʻo e matapaá. “ʻOku fakatuʻutāmaki ʻa hoʻo fai tokotaha iá,” ko e lea ia ʻa e tokouá. Naʻe fakaafeʻi ia ʻe he uitoú ki loto. Naʻá ne fetongi ʻa e foʻi ʻuhilá peá ne toki mavahe. ʻI he taimi naʻe ʻaʻahi mai ai ʻa e foha ʻo e fefiné ʻi he hili mei ai ha kiʻi taimi siʻi ke vakaiʻi pe ʻokú ne fēfeé, naʻá ne tala ange ai kiate ia ʻa e meʻa naʻe hokó. Naʻe maongo lahi kiate ia ʻo ne feinga ai ke kumi ʻa e tokouá ke fakahaaʻi kiate ia ʻa ʻene houngaʻiá. Naʻe taki atu eni ki ha fetalanoaʻaki lelei, ʻo iku ai ki hono tali ʻe he fohá ha ako Tohi Tapu.
4 ʻI he hoko ʻo anga-leleí, ʻoku tau tapua atu ai ʻa e ʻofa ʻa Sihova ki he kakaí pea ʻai ai ke fakaʻofoʻofa ʻa e pōpoaki ʻo e puleʻangá. Ko ia ai, ʻofa ke tau “fakaogolelei atu aki[t]autolu i he gaahi mea kotoabe, o tāu moe kau faifekau ae Otua. . . i he [anga-lelei].”—2 Kol. 6:4, 6, PM.