ʻOku Lava Ke Tau Foaki ha Meʻa kia Sihova
1 Naʻá ke ʻiloʻi ʻoku malava ʻe he tangatá ke foaki ha meʻa ki he ʻOtuá? Naʻe feilaulauʻaki ʻe ʻĒpeli ʻa e niʻihi ʻo ʻene fanga monumanu mahuʻingá kia Sihova, pea naʻe fai ʻe Noa mo Siope ʻa e ngaahi feilaulau meimei tatau. (Sen. 4:4; 8:20; Siope 1:5) Ko e moʻoni, ko e ngaahi feilaulau peheé, naʻe ʻikai ke koloaʻia ai ʻa e Tokotaha-Fakatupú ʻi ha faʻahinga founga, koeʻuhí he ko e meʻa kotoa pē ʻoku ʻaʻana. Ka naʻe fakahaaʻi ʻe he ngaahi feilaulaú ʻa e ʻofa lahi naʻe maʻu ʻe he kau tangata faitōnunga ko iá ki he ʻOtuá. ʻI he ʻahó ni, ʻoku lava ke tau ngāueʻaki hotau taimí, iví mo e koloá ʻi hono ʻoatu “ha feilaulau fakafetaʻi” kia Sihova.—Hep. 13:15.
2 Taimi: He tuha moʻoni ē ke ‘fakatau mai’ ha taimi mei he ngaahi meʻa ʻoku ʻikai ke loko mahuʻingá ke kau kakato ange ai ʻi he ngāue fakafaifekaú! (Ef. 5:15, 16, NW) Mahalo ʻe lava ke tau feʻunuʻaki ʻetau taimi-tēpilé koeʻuhi ka tau tāimuʻa tokoni ʻi ha māhina ʻe taha pe lahi ange ʻi he taʻu. Mahalo ʻe lava ke tau fakalahi ʻa e taimi ʻoku tau faʻa fakamoleki ʻi he ngāue fakafaifekaú. Ko ha toe ngāue ʻi he miniti ʻe 30 kehe ʻi he uike taki taha ʻe fakalahi hake ai ʻetau ngāue fakafaifekaú ʻo ʻikai toe siʻi hifo ʻi he houa ʻe ua he māhina!
3 Ivi: Ko hono maʻu ha ivi ke ngāueʻaki ʻi he ngāue fakafaifekaú ʻoku fiemaʻu ai ke tau fakaʻehiʻehi mei he fakafiefia mo e ngāue ʻe ʻai ai ke tau fuʻu helaʻia ʻo ʻikai malava ke tau ʻoatu kia Sihova ʻetau lelei tahá. ʻOku toe fiemaʻu foki ke ʻoua te tau fuʻu loto-moʻua ʻi he ngaahi meʻa ʻe malava ke ne ‘peluki’ hotau lotó, ʻo mole ai hotau ivi ne mei lava ke ngāueʻaki ʻi he tauhi ki he ʻOtuá. (Pal. 12:25) Naʻa mo haʻatau loto-hohaʻa ʻuhinga totonu, he lelei lahi ange ē ke ‘li ʻetau kavengá kia Sihova’!—Sāme 55:22; Fili. 4:6, 7.
4 Koloa: ʻOku lava ke tau toe foaki ʻetau ngaahi koloa fakamatelié ke poupouʻiʻaki ʻa e ngāue fakamalangá. Naʻe fakalototoʻaʻi ʻe Paula ʻa e kaungā Kalisitiané ke ʻai maʻu pē ʻo “tauhi , ha meʻa kuo hulu atu” koeʻuhí ke ʻi ai ha meʻa ke foaki ki he faʻahinga ʻoku masivá. (1 Kol. 16:1, 2) ʻI ha founga meimei tatau, ʻe malava nai ke tau vaheʻi ha paʻanga ke tokoni ki he ngaahi fiemaʻu ʻa e fakatahaʻanga fakalotofonuá pea pehē ki he ngāue ʻi māmani lahí. ʻOku fakahoungaʻi ʻe Sihova ʻa e meʻa ʻoku tau foaki mei he lotó, neongo ai pe ko ha kiʻi meʻa siʻisiʻi pē ia.—Luke 21:1-4.
5 ʻOku hulu ʻa e meʻa kuo foaki mai ʻe Sihova maʻatautolú. (Sem. 1:17) ʻOku tau fakahaaʻi ʻetau houngaʻiá ʻaki hono foaki loto-lelei atu hotau taimí, iví mo e ngaahi koloa kehé ke tauhi kiate ia. Ko ʻetau fai peheé ʻoku fakahōifua ia kia Sihova, “he ʻoku ʻofa ʻa e ʻOtua ki ha taha ʻoku vekeveke foaki.”—2 Kol. 9:7.