Felangahakeʻaki Lolotonga ʻa e Ngāue Fakafaifekaú

¹ ʻOku tau houngaʻia kotoa ʻi hono maʻu ha fakalototoʻa ʻi ha “lea oku gali mo totonu hono lea aki.” (Pal. 25:11, PM) ʻI he taimi ʻoku tau ngāue ai mo e niʻihi kehé ʻi he ngāue fakafaifekaú, ʻe lava fēfē ke tau fakapapauʻi ko ʻetau fetalanoaʻakí ʻoku iku ki ha fakalototoʻa?

² Fetalanoaʻaki Fakatupu Langa Hake: He fakatupu langa hake moʻoni ē ke fakakau ʻa e ngaahi meʻa fakalaumālié ʻi heʻetau fetalanoaʻaki lolotonga ʻa e kau ki he ngāue fakamalangá! (Sāme 37:30) ʻE lava ke tau talanoa fekauʻaki mo ʻetau tuʻuakí pe lave ki ha meʻa fakalototoʻa naʻa tau toki hokosia ki muí ni mai ʻi he malaʻe malangá. (Ng. 15:3) Naʻa tau maʻu ha poini mahuʻinga mei heʻetau lau Tohi Tapu fakafoʻituituí, ko e ngaahi makasini fakamuimuí, pe ko ha fakataha ʻa e fakatahaʻangá? Te tau lāulea nai ki he ngaahi poini naʻe ʻomai ʻi ha malanga maʻá e kakaí ʻa ia naʻa tau toki fanongo ai ʻi he Fale Fakatahaʻangá.

³ Te tau ongoʻi loto-siʻi nai ʻi he taimi ʻoku langaʻi hake ai ʻe ha tokotaha-ʻapi ha fakafepaki ʻa ia heʻikai malava ke tau ikuʻi. ʻE ʻaonga ke tau vaheʻi ha kiʻi miniti hili ʻa e mavahe mei he matapaá ke lāulea ai mo hotau hoá ki he founga ke fakaleleiʻi nai ai ha tuʻunga pehē ʻi he kahaʻú, ʻaki ʻa e sio nai ki he tohi Reasoning. Pea kapau ʻoku tau houngaʻia ʻi ha meʻa fekauʻaki mo e tuʻuaki ʻa hotau hoá, ʻe hoko ko ha fakalototoʻa ia kiate ia ha lea fakaongoongoleleiʻi loto-moʻoni.

⁴ Tamuʻomuʻa: ʻOku ʻi ai ha niʻihi ʻi heʻetau kulupu ako tohí kuo teʻeki ke tau ngāue mo ia ki muí ni mai? Ko hono fakaaʻu atu ha fakaafe fakafoʻituitui ke ngāue fakataha mo kitautolu ʻi he ngāue fakafaifekaú ʻe iku nai ia ki ha “fefakalototoʻaʻaki.” (Loma 1:12, NW) ʻOku houngaʻia ʻa e kau tāimuʻa tuʻumaʻú mo e kau tāimuʻa tokoní ke ʻi ai ha niʻihi ke ngāue fakataha mo ia, tautautefito ʻi he hengihengí pe efiafí, ʻi he taimi ʻoku tokosiʻi ai ʻa e kau malanga ʻoku nau kau nai ʻi he ngāue fakafaifekaú. ʻE lava ke tau poupouʻi ʻa e kau tāimuʻá ʻaki hono fakafaingamālieʻi kitautolu. ʻOku ʻi ai ha tokotaha malanga vaivai ʻoku fakangatangata ʻe heʻene moʻui leleí ʻa e meʻa ʻokú ne malava ke fai ʻi he ngāue fakafaifekaú? Ko hono fokotuʻutuʻu ha taha pehē ke ngāue fakataha mo kitautolu, mahalo ʻi ha ako Tohi Tapú, ʻe lava ke ʻaonga ia.—Pal. 27:17.

⁵ ʻOku fakalototoʻa maʻu pē ʻa e fakaongoongoleleí mo e fakahāhā ʻo e houngaʻiá, naʻa mo e ngaahi meʻa īkí. ʻOku totonu ke tau manatuʻi ia ʻi he ngāue fakataha mo e niʻihi kehe ʻi he ngāue fakafaifekaú, koeʻuhí he ʻoku tau loto maʻu pē ke ‘fefaiʻaki hotau langa haké.’—1 Tes. 5:11.