Hoko ko ha Tokoni Lelei ʻi he Matapaá
1. Ko e hā ʻa e ngaahi ʻaonga ʻoku hoko ʻi he ngāue mo ha hoa ʻi he ngāue fakafaifekaú?
1 ʻI he taimi ʻe taha, naʻe fekauʻi atu ai ʻe Sīsū ʻa e kau ākonga ʻe toko 70 ke nau malanga, pea naʻá ne “fekau atu kinautolu, ʻo tautau toko ua.” (Luke 10:1) ʻOku ʻikai ha veiveiua ko e fokotuʻutuʻu ko ení naʻe fakaʻatā ai ʻa ʻene kau ākongá ke nau fetokoniʻaki mo fefakalototoʻaʻaki ʻi heʻenau malangá. ʻI heʻetau ʻalu mo ha tokotaha malanga ʻe taha ʻi he ngāue fakafaifekaú, ʻe fēfē nai haʻatau tokoni?
2. ʻI he taimi ʻoku fai ai ʻa e tuʻuaki ʻa hotau hoá, ʻe anga-fēfē pea ko e hā ʻoku totonu ai ke tau fanongó?
2 ʻAki ʻa e Fanongo: Fanongo tokanga ʻi he fai ʻa e tuʻuaki ʻa ho hoá. (Sem. 1:19) Kapau ʻoku lau ha konga Tohi Tapu, muimui ʻi hoʻo Tohi Tapú. Sio ki he toko taha ʻoku leá, pe ko ho hoá pe ko e tokotaha-ʻapí. Kapau te ke tokanga lelei ki he fetalanoaʻakí, ʻe fakaʻaiʻai nai heni ʻa e tokotaha-ʻapí ke ne fai ʻa e meʻa tatau.
3. Ko fē nai ʻa e taimi ʻe tali lelei ai ʻe hotau hoá ke tau leá?
3 ʻAki ʻa e ʻIloʻi ʻa e Taimi ke Lea Aí: ʻI he taimi ʻoku fai ai ʻe hoto hoá ʻene tuʻuaki, ʻoku tau fakangeingeiaʻi ia ʻaki hono fakaʻatā ke ne muʻomuʻa. (Loma 12:10) ʻOku totonu ke tau fakaʻehiʻehi mei hono fakahohaʻasí. Kapau ʻoku ngalo ʻene leá pe ʻoku fai ʻe he tokotaha-ʻapí ha fakafepaki pe fehuʻi pea ʻoku fiemaʻu ʻe hotau hoá ha tokoni, ʻoku tau feinga ke tānaki atu ki he fakamatala ʻa hotau hoá kae ʻikai kamataʻi ha kaveinga kehe. (Pal. 16:23; Koh. 3:1, 7) Kapau ʻoku tau lea, ʻoku totonu ke tokoni ʻetau leá ki he faifakamoʻoní.—1 Kol. 14:8.
4. Ko e hā ʻe tokoni ki heʻetau fiefia mo e lavameʻa ʻi he ngāue fakafaifekaú?
4 ʻI he taimi naʻe ʻosi ai ʻa e malanga ʻa e hoa ʻe 35 ʻo e kau ākongá, naʻa nau “foki fiefia.” (Luke 10:17) Ko kitautolu foki te tau fiefia mo lavameʻa ʻi he ngāue fakafaifekaú ʻi heʻetau fanongo mo ʻiloʻi ʻa e taimi ke lea ai ʻi heʻetau tokoni ki he faʻahinga ʻoku tau ō mo ia ki he matapaá.