Fakaleleiʻi ʻEtau Pōtoʻi ʻi he Ngāue Fakafaifekaú—Hoko ko ha Hoa Ngāue Tokoni

ʻUhinga ʻOku Mahuʻinga Aí: Naʻe fakamoʻoniʻi ʻe Sīsū ʻa e mahuʻinga ʻo e ngāue fakataha mo ha hoa ngāue. Ko ia ʻi he taimi naʻá ne fekau atu ai ʻa e kau ākonga ʻe toko 70 ke nau muʻomuʻa ʻiate ia ʻo malangá, naʻá ne fekauʻi atu kinautolu ʻo tautau toko ua. (Luke 10:1) ʻE lava ke ʻoange ʻe he hoa ngāué ʻa e poupou ʻoku fiemaʻu ʻe hono kaungā malangá ʻi ha taimi ʻokú ne fetaulaki ai mo ha tuʻunga faingataʻa pe taʻepauʻia ʻi he founga ʻo hono fai ha tali ki he tokotaha-ʻapí. (Koh. 4:9, 10) ʻE lava ke ne vahevahe ʻene hokosiá pea toutou ʻoatu ha fokotuʻu ʻe tokoni nai ki he tokotaha ʻokú na ngāué ke hoko ai ko ha tokotaha ʻevangeliō lavameʻa. (Pal. 27:17) ʻE toe lava ke ne fai ha fakalototoʻa ʻaki ʻene talanoa fakatupu langa hake lolotonga ʻa e ngāue fale ki he falé.—Fil. 4:8.

Founga Hono Fai Iá:

Tokanga lelei ʻi he taimi ʻoku faifakamoʻoni ai ho hoa ngāué. (Sēm. 1:19) ʻI he taimi ʻoku lau ai ha konga Tohi Tapu, muimui ʻi hoʻo Tohi Tapú. ʻE tokoni eni ke ke fai ha tokoni ʻo ka fiemaʻu.
Ngāueʻaki ʻa e fakafuofua leleí ke fakapapauʻi ʻa e taimi ʻoku totonu ai ke ke kau ki he fetalanoaʻakí. (Pal. 25:11) ʻI hoʻo kau fakataha mo ha tokotaha malanga ki ha ako Tohi Tapu ʻe fakahoungaʻi nai hoʻo ngaahi poupoú ʻi he taimi ki he taimi. Neongo ia, ʻi he malanga fale ki he falé ʻe saiʻia nai ho hoa ngāué ʻi hoʻo fakaʻatā ia ke ne lea ʻi hono taimi ke lea aí. Ko e moʻoni, kapau ko ha tokotaha malanga foʻou ia pe ʻoku taʻepauʻia ʻi he founga ke ne tali ai ha fehuʻi pe ko ha fakafepaki, ʻe ngalingali te ne houngaʻia ʻi hoʻo tokoní. Tatau ai pē pe ʻokú ke ʻalu fakataha mo ha tokotaha malanga ʻi he ngāue fale ki he falé, toe ʻaʻahí pe ako Tohi tapu, ʻoua ʻe fakahohaʻasi pe kaunoaʻia ʻi he fetalanoaʻakí pe ʻoatu ha kaveinga kehe.
Vahevahe hoʻo hokosiá. ʻOua te ke taʻofi haʻo ʻoatu ha fokotuʻu ki he tokotaha malanga ʻokú ke ngāue mo iá kapau ʻe malava ʻa e tuʻungá ke tokoniʻi ia ke ola lelei ange ʻene ngāue fakafaifekaú. (Pal. 3:27) ʻI ha taimi faingamālie, ʻe lava nai ke ke pehē: “ʻOkú ke fakakaukau pē naʻe fēfē ʻa e fakamatalá?” pe “ʻE lava nai ke u ʻoatu ha kiʻi fokotuʻu?” pe “Ko e meʻa eni naʻá ku feinga ke u faí.” Manatuʻi neongo ʻa e houngaʻia ʻa e niʻihi kehé ʻi hono maʻu ha fokotuʻu ʻi ha taimi, ka te nau loto-siʻi kapau te ke lave ki heʻene ngaahi fehālaaki kotoa pē.

ʻAhiʻahiʻi Eni ʻi he Lolotonga ʻa e Māhiná:

Hili ʻa e ngāue mo ho hoa ngāue fakafaifekaú ʻi he malaʻe malangá, tala ange kiate ia ko e meʻa naʻá ne leaʻaki pe faí naʻe hoko ia ko ha hoa ngāue tokoni.