Hoko ʻo ʻIkai ko ha Hoa Ngāue Fakalongolongo Pē
1. ʻE anga-fēfē nai ʻetau faʻifaʻitaki ki he vakai ʻa e ʻapositolo ko Paulá ʻi he taimi ʻoku tau ngāue ai mo e niʻihi kehé ʻi he ngāue fakafaifekaú?
1 Naʻe vakai ʻa e ʻapositolo ko Paulá ki heʻene fakamoleki ʻa e taimi mo hono ngaahi kaungātuí ko ha faingamālie ia ke “fefakalototoʻaʻaki.” (Loma 1:12) ʻI he taimi ʻokú ke ngāue ai mo ha tokotaha malanga ʻi he ngāue fakafaifekaú, ʻokú ke ngāueleleiʻaki ʻa e taimi ko ení ke fakalototoʻaʻi mo tokoniʻi ia? ʻI he ʻikai hoko ko ha hoa ngāue fakalongolongo pē, ko e hā ʻoku ʻikai te ke vahevahe ai ʻa e meʻa naʻá ne tokoniʻi koe ko ha tokotaha malanga ola leleí?
2. Ko e hā ʻe lava ke tau fai ke fakaivimālohiʻi ʻa e tuipau hotau hoa ngāue fakamalangá, pea ko e hā ʻoku mahuʻinga ai ení?
2 Fokotuʻu ʻa e Tuipau: Ko e kau malanga ʻe niʻihi ʻoku ʻikai te nau maʻu ʻa e tuipau, ʻa ia ʻe hā nai ia ʻi heʻenau fakafōtungá pe tō ʻo e leʻó. ʻE lava ke tau fakaivimālohiʻi ʻenau tuipaú ʻaki hono fakaongoongoleleiʻi loto-moʻoni kinautolu. Ko e hā ʻa e ngaahi founga ʻe niʻihi ke fokotuʻu ai ʻa e tuipaú? Ko ha ʻovasia fefonongaʻaki ʻe taha naʻá ne talanoa tauʻatāina ki hono hoa ngāué fekauʻaki mo ʻene ngaahi manavaheé tonu mo e anga ʻene toutou lotu ki ha tokoni ke ikuʻi ʻa e ngaahi ongoʻi ko iá. Naʻe toe fakamatala ha tokoua ʻe taha ki he meʻa naʻá ne tokoniʻi ia ke ne fakahāhā ai ʻa e tuipaú: “ʻOku kamata ʻaki ʻa e malimali. ʻI he taimi ʻe niʻihi ʻoku fiemaʻu ke u lotu ki ha tokoni ke fakahaaʻi ʻa e founga faingofua ko iá.” ʻOku ʻi ai ha meʻa naʻá ne tokoniʻi koe ke hoko ʻo tuipau lahi ange ʻi he ngāue fakafaifekaú? Vahevahe ia mo ho hoa ngāue fakamalangá.
3. Ko e hā ʻe lava ke tau vahevahe mo hotau hoa ngāué ʻe tokoni nai kiate ia ke hoko ʻo ola lelei ange ʻi heʻene ngāue fakafaifekaú?
3 Vahevahe ʻa e Ngaahi Foungá: Kuó ke ʻilo ha lea kamata faingofua pe fehuʻi, ko ha meʻa fakalotofonua nai naʻe hoko, ʻe hoko ia ʻo ola lelei ʻi he kamataʻi ha fetalanoaʻaki? Kuó ke hokosia ha ngaahi ola lelei ʻi hono tānaki atu ha sīpinga tuʻuaki fakafoʻituitui? Fakahā ia ki ho hoa ngāué. (Pal. 27:17) Lolotonga ʻa e fononga ki ha toe ʻaʻahi, ʻe lava ke ke lave ki he taumuʻa hoʻo ʻaʻahí mo e founga hoʻo palani ke lavaʻi ai iá. Hili ha ako Tohi Tapu, ʻe lava ke ke fakamatalaʻi ʻa e ʻuhinga ʻokú ke fili ai ha poini pau, konga Tohi Tapu, pe founga fakafaiako ke feʻunga mo e ngaahi fiemaʻu ʻa e tokotaha akó.
4. Ko e hā ʻoku totonu ai ke tau hoko ʻo mahuʻingaʻia ʻi hono tokoniʻi hotau kaungā ʻevangelioó?
4 Naʻe ʻikai ngata pē ʻi he mahuʻingaʻia ʻa e kau ʻevangeliō ʻi he ʻuluaki senitulí ʻi hono tokoniʻi ʻa e kau taʻetuí. Ka naʻa nau toe vakai ki hono mahuʻinga ʻo e fefakalototoʻaʻakí mo e fefakaivimālohiʻakí. (Ngā. 11:23; 15:32) Naʻe akoʻi ʻe he ʻapositolo ko Paulá ʻa e talavou ko Tīmoté pea fakalototoʻaʻi leva ia ke vahevahe ʻa e meʻa naʻá ne akó mo e niʻihi kehé. (2 Tīm. 2:2) ʻI he taimi ʻoku tau failelei ai ki hotau kaungā Kalisitiané lolotonga ʻa e ngāue fakafaifekaú, ʻoku ʻikai ngata pē ʻi heʻetau fakatupulekina ʻenau fiefiá mo e hoko ʻo ola leleí ka ʻoku tau toe fakafiefiaʻi ai ʻetau Tamai fakahēvaní.—Hep. 13:15, 16.