“Maʻu ʻa e ʻOfa ki he Haʻohaʻonga Fakakātoa ʻo e Fanga Tokouá”
Ko e ngaahi lea fakamānavaʻi ʻi he kaveinga ko ení naʻe hiki ia ʻi he taʻu nai ʻe ua afe kuo maliu atú. (1 Pita 2:17) Ka ʻoku fiemaʻu ke ngāueʻaki kinautolu he taimí ni ʻo laka ia ʻi ha toe taimi! ʻE lava fēfē ke tau ʻofa ki ha fuʻu fetokouaʻaki pehē ʻi māmani lahi? Pea ʻi he māmani taʻeʻofa ko ení, ʻe lava fēfē ke tau fakapapauʻi ko ʻetau ʻofá ʻe ʻikai mōliá? (Māt. 24:12) Sio angé pe te ke lava ʻo tali ʻa e ngaahi fehuʻi ko ení lolotonga hoʻo sio ʻi he foʻi vitiō ko e Our Whole Association of Brothers.
(1) Naʻa tau hoko ʻanefē ʻo kau ki heʻetau fetokouaʻaki faka-Kalisitiané? (2) Ko e hā ʻa e ngāue ʻe tolu ʻoku tau faitatau ai mo hotau fetokouaʻaki ʻi māmani lahí? (3) ʻOku anga-fēfē hono fakahāhā ʻe hotau fanga tokouá ʻenau fakapapau ke malanga (a) ʻi he toafa ʻAlasikā, (e) ʻi he ngaahi taulanga lalahi ʻo ʻIulope mo e (f) ʻi he vaotā fihi ʻo Pelū? (4) Ko e hā ʻoku ʻikai totonu ai ke tau pehē ko e ngāue fakamalangá ko ha ngāue anga-maheni pē iá? (5) ʻOmai ha fakatātā ki he founga ʻo e fefakafiemālieʻaki mo e fepoupouʻaki ʻa e Kau Fakamoʻoni ʻa Sihová (a) hili ha mofuike, (e) hili ha afā mo e (f) lolotonga ha tau fakalotofonua? (6) Ko e hā ha ngaahi founga ʻaonga te tau lava kotoa ke fakahāhā ai ʻa e fakaʻilonga fakapapauʻiʻanga ʻo hotau fetokouaʻaki faka-Kalisitiané? (Sione 13:35) (7) Ko e hā ʻa e ngaahi ʻaonga ʻo e ngāue fāitaha ke langa hotau Fale Fakatahaʻangá tonu? (8) Naʻe anga-fēfē ʻa e kei moʻui fakalaumālie hotau fanga tokoua ʻi ʻIulope Hahake mo Lūsiá ʻi he taimi naʻe tapui ai ʻa e ngāué? (9) Ko e hā ʻa e feinga makehe naʻe fai ʻe he Kau Fakamoʻoni tokolahi ke maʻu ʻa e ngaahi fakataha-lahí pea ko e hā hono ʻuhingá? (10) Kuo anga-fēfē hono fakaivimālohiʻi ʻe he foʻi vitiō ko ení hoʻo fakapapau (a) ke lotu kia Sihova ʻi he ngaahi fakataha faka-Kalisitiané ʻi he fāʻūtaha mo ho fanga tokouá, (e) ke tokoni ki he niʻihi kehé ʻi he taimi ʻoku fiemaʻu aí pea (f) ke malanga faitōnunga ʻi ha taimi mo ha founga pē te ke lava aí? (11) ʻI he founga fē mo e taimi fē ʻe lava ke tau ngāueʻaki ai ʻa e foʻi vitiō ko ení ʻi he ngāue fakafaifekaú?
Ko e ʻuhinga tefito ʻetau hoko ko e konga ʻo e fetokouaʻaki faka-Kalisitiané ko ʻetau ʻofa kia Sihová. Ko ia ʻoku tau saiʻia ke ako fekauʻaki mo ia pea akoʻi ʻa e niʻihi kehé fekauʻaki mo ia. Pea ʻoku tau ʻofa ʻi he kakai ʻa ia ʻoku ʻofa ai ʻa Sihová. ʻI he taimi ʻoku tau tokoni ai ki he faʻahinga ʻi he taimi ʻo e fiemaʻú ʻoku ʻikai ke tau ʻamanekina ke fakamālō mai ʻa e ʻOtuá kiate kitautolu. ʻI hono kehé, ʻoku tau fakamālō ki he ʻOtuá koeʻuhí ʻoku tau vakai ki hotau fetokouaʻaki faka-Kalisitiané ko ha meʻaʻofa maʻongoʻonga meiate ia. ʻI he ofi ke ngata ko eni ʻa e ngaahi ʻaho fakaʻosi ʻo e māmani taʻeʻofá, ʻofa ke tau hokohoko atu hono fakahāhā ʻa e ʻofa ki he haʻohaʻonga fakakātoa ʻo e fanga tokouá!