Ko e Hā ʻOku Totonu Ai Ke Ke Hokohoko Atú?

1. ʻE ʻaonga fēfē kiate koe ʻa e hokohoko atu hoʻo ako Tohi Tapú?

ʻOku ʻikai ha veiveiua, ko e vakai fakalūkufua ko eni ki he ngaahi akonaki tefito ʻa e Tohi Tapú kuó ne fakaivimālohiʻi hoʻo ʻofa kia Sihová. ʻOku fiemaʻu ki he ʻofa ko ení ʻa hono fakatupulekina maʻu pē. (1 Pita 2:2) Ko hoʻo ʻamanaki ki he moʻui taʻengatá ʻoku fakatuʻunga ia pe te ke hokohoko atu ke ʻunuʻunu ofi ki he ʻOtuá ʻaki hono ako ʻene Folofolá.​—Lau ʻa e Sione 17:3; Sute 21.

ʻI hoʻo tupulaki ʻi he ʻilo ki he ʻOtuá, ʻe hoko ai hoʻo tuí ʻo mālohi ange. ʻE tokoniʻi koe ʻe he tuí ke ke fakahōifuaʻi ʻa e ʻOtuá. (Hepelū 11:1, 6) Te ne ueʻi koe ke ke fakatomala pea fai mo e ngaahi liliu ʻaonga ʻi hoʻo founga moʻuí.​—Lau ʻa e Ngāue 3:19.

2. ʻE lava fēfē ke ʻaonga ki he niʻihi kehé ʻa hoʻo ʻilo ki he ʻOtuá?

ʻOku fakanatula pē, hoʻo loto ke ke vahevahe ki he niʻihi kehé ʻa e meʻa kuó ke akó​—ʻoku tau fiefia kotoa ʻi hono tala ha ongoongo lelei. ʻI hoʻo hokohoko atu hono ako ʻa e Tohi Tapú, te ke ako ai ki he founga ke ngāueʻaki ai ʻa e Tohi Tapú ke fakamatalaʻiʻaki hoʻo tui kia Sihová pea mo e ongoongo leleí.​—Lau ʻa e Loma 10:13-15.

ʻOku kamata ʻa e kakai tokolahi tahá ʻaki hono vahevahe atu ʻa e ongoongo leleí ki he ngaahi kaumeʻá pe ngaahi kāingá. Fai fakapotopoto. ʻI he ʻikai ke pehē ʻoku hala ʻenau lotú, talanoa kiate kinautolu ʻo fekauʻaki mo e ngaahi talaʻofa ʻa e ʻOtuá. Pehē foki, manatuʻi ʻoku faʻa maongo ange ki he kakaí ʻa hoʻo ʻulungaanga leleí ʻi he meʻa ʻokú ke leaʻakí.​—Lau ʻa e 2 Tīmote 2:24, 25.

3. Ko e hā ʻa e vahaʻangatae mo e ʻOtuá ʻe lava ke ke maʻú?

Ko hono ako ʻa e Folofola ʻa e ʻOtuá te ne tokoniʻi koe ke ke tupu fakalaumālie. Faifai atu pē, ʻe lava ke ke kamataʻi ai ha vahaʻangatae makehe mo Sihova. ʻE lava ke ke hoko moʻoni ai ko e meʻa ʻaʻana ʻi he tuʻunga ko ha mēmipa ʻo hono fāmilí.​—Lau ʻa e 2 Kolinitō 6:18.

4. ʻE lava fēfē ke ke hokohoko atu ke fakalakalaka?

ʻE lava ke ke laka ki muʻa fakalaumālie ʻi he hokohoko atu hono ako ʻa e Folofola ʻa e ʻOtuá. (Hepelū 5:13, 14) Kole ki ha taha ʻo e Kau Fakamoʻoni ʻa Sihová ke ne ako Tohi Tapu mo koe ʻo ngāueʻaki ʻa e tohi Ko e Hā ʻOku Lava ke Akoʻi Mai ʻe he Tohi Tapú? Ko e lahi ange hoʻo ako mei he Folofola ʻa e ʻOtuá ko e lahi ange ia ʻa e lavameʻa ʻe ʻi ai hoʻo moʻuí.​—Lau ʻa e Saame 1:1-3; 73:27, 28.

Ko e ongoongo leleí ʻoku haʻu ia meia Sihova, ko e ʻOtua fiefia. ʻE lava ke ke ʻunuʻunu ofi ange kiate ia ʻaki hoʻo ʻunuʻunu ofi ange ki heʻene kakaí. (Hepelū 10:24, 25) ʻI he hokohoko atu hoʻo ngaahi feinga ke fakahōifuaʻi ʻa Sihová, ʻokú ke kakapa atu ai ki he moʻui moʻoní​—ʻa e moʻui taʻengatá. Ko e ʻunuʻunu ofi ki he ʻOtuá ʻa e meʻa lelei taha moʻoni ʻe lava ke ke faí.​—Lau ʻa e 1 Tīmote 1:11; 6:19.