Fakaleleiʻi ʻEtau Pōtoʻi ʻi he Ngāue Fakafaifekaú—Faifakamoʻoni ʻi he Feituʻu Pisinisí

ʻUhinga ʻOku Mahuʻinga Aí: Koeʻuhi ko e kakai tokolahi ʻoku nau ngāue ʻi ha ngaahi houa lahi, ko e founga ʻoku faʻa lelei taha ke aʻu ai kiate kinautolu mo e pōpoaki ʻo e Puleʻangá ko e faifakamoʻoni ʻi heʻenau ngāueʻangá. Ko e faifakamoʻoni ʻi he feituʻu pisinisí ʻoku lava ke fakafiefia mo lavameʻa koeʻuhí ʻoku ʻi ai maʻu pē ʻa e taha ʻi ai pea ko e kau ngāué ʻoku nau faʻa hehema ke anga-lelei ki he faʻahinga ʻoku nau vakai ki ai ko ʻenau kau kasitomā. Ke hoko ʻo ola leleí, kuo pau ki he kau malangá ke nau ngāueʻaki ʻa e fakafuofua leleí mo ala faʻifaʻitakiʻanga ʻi he anga ʻenau ʻai valá mo e teuteú. (2 Kol. 6:3) Ko ia ai, ʻoku totonu ki he ʻovasia ngāué ke ne tokangaʻi lelei ʻa e lahi hono ngāueʻi ʻa e ngaahi feituʻu pisinisí mo e faʻahinga ʻoku kau ki aí.

Founga Hono Fai Iá:

Teuteu ha tuʻuaki nounou. Kapau te tau malanga lōloa ki he tokotaha ngāué, ʻe ʻikai nai ke tau toe maʻu ha ngofua ke tau talanoa kiate ia ʻi he taimi ka hokó.
ʻAʻahi ki he pisinisí ʻi he taimi ʻoku ʻikai ke fuʻu femoʻuekina aí, hangē ko e taimi ʻoku fakaava ai ʻa e pisinisí.
Feinga mālohi ke ʻuluaki fakalea ki he pulé. Loto-māfana mo anga-fakakaumeʻa. Te ke pehē nai, “ʻOku mau ʻaʻahi nounou mai ki he kakai ʻi heʻenau ngāueʻangá koeʻuhí ʻoku faingataʻa ke maʻu kinautolu ki honau ʻapí.” Fai ha tuʻuaki nounou, pea tuku ha tuleki, makasini pe ko ha tohi kehe. Koeʻuhi ke ʻoua ʻe fetoʻoaki kitautolu mo e kau tuʻuaki koloá, ʻoku lelei taha ke ʻoua ʻe lave ki he fokotuʻutuʻu ʻo e tokoni fakapaʻangá tuku kehe ka ʻeke mai pe ʻoku fakapaʻanga fēfē ʻetau ngāué.
Kapau ʻoku anga-fakakaumeʻa ʻa e pulé, kole ki ha ngofua ke fakalea nounou ki he kau ngāue kehé. ʻI he ngaahi pisinisi ʻe niʻihi, ʻe lelei ange kapau te tau kole ke tuku ha tohi ʻi he loki talitaliʻangá.
Ngāueʻaki ʻa e fakafuofua leleí pea ngaofengofua. Ko e fakatātaá, kapau ʻe talanoa ʻa e tokotaha ngāué ki ha kasitomā pe femoʻuekina, tatali kae ʻoleva ke ne ʻataʻatā pea toki talanoa ki ai.

ʻAhiʻahiʻi Eni ʻi he Lolotonga ʻa e Māhiná:

ʻI he lolotonga ʻa hoʻomou efiafi Lotu Fakafāmili hono hokó, ʻahiʻahiʻi ha tuʻuaki nounou te ke ngāueʻaki nai kapau te ke ngāue ʻi he feituʻu pisinisí.