Ngāueʻaki ʻa e Tohitapú ʻi he Talí

ʻI HE fehuʻi fekauʻaki mo ʻetau ngaahi tuí, ko ʻetau founga moʻuí, ko ʻetau vakai fekauʻaki mo e ngaahi meʻa lolotonga ʻoku hokó, ko ʻetau ʻamanaki ki he kahaʻú, ʻoku tau feinga ke ngāueʻaki ʻa e Tohitapú ʻi he talí. Ko e hā hono ʻuhingá? Koeʻuhi ko e Folofola ia ʻa e ʻOtuá. Ko e Tohitapú ʻoku maʻu mei ai ʻetau tuí. ʻOku tau fakatefito ʻetau founga moʻuí ʻi he Tohitapú. ʻOkú ne fakafuo ʻetau fakakaukau fekauʻaki mo e ngaahi meʻa ʻoku hoko ʻi he māmaní. Ko ʻetau ʻamanaki ki he kahaʻú ʻoku faiaka fefeka ia ʻi he ngaahi talaʻofa fakamānavaʻi ʻi he Tohitapú.​—2 Tim. 3:​16, 17.

ʻOku tau mātuʻaki lāuʻilo fekauʻaki mo e fatongia ʻoku ʻalu fakataha mo hotau hingoá. Ko e Kau Fakamoʻoni ʻa Sihova kitautolu. (Ai. 43:12) Ko ia ai, ʻoku tau tali ʻa e ngaahi fehuʻí, ʻo ʻikai makatuʻunga ʻi he filōsofia fakaetangatá, kae makatuʻunga ʻi he meʻa ʻoku folofolaʻaki ʻe Sihova ʻi heʻene Folofola fakamānavaʻí. Ko e moʻoni, ʻi he tuʻunga fakatāutahá ʻoku ʻi ai ʻetau ngaahi fakakaukau fekauʻaki mo e ngaahi meʻá, ka ʻoku tau fakaʻatā ʻa e Folofola ʻa e ʻOtuá ke ne fakafuo ʻetau ngaahi fakakaukaú koeʻuhi ʻoku tau tuipau mālohi ko e moʻoní ia. Ko e moʻoni, ʻoku ʻomai ʻe he Tohitapú kia kitautolu ʻa e tauʻatāina ke fili fekauʻaki mo e saiʻia fakafoʻituituí ʻi he ngaahi meʻa lahi. ʻI he ʻikai ʻoatu ʻetau ngaahi saiʻiá ki he niʻihi kehé, ʻoku tau holi ke akoʻi ʻa e ngaahi tefitoʻi moʻoni ʻoku fokotuʻu ʻi he ngaahi Konga Tohitapú, ʻo fakaʻatā ai ʻetau kau fanongó ke nau ngāueʻi ʻa e tauʻatāina tatau ko ia ke fili ʻa ia ʻoku tau maʻú. ʻI he hangē ko e ʻapositolo ko Paulá, ʻoku tau feinga “ke pouaki ʻa e talangofuá ʻaki ʻa e tuí.”​—Loma 16:​26, NW.

ʻOku fakamatalaʻi ʻa Sīsū Kalaisi ʻi he Fakahā 3:​14 ko e “Fakamoʻoni Falalaʻanga mo Moʻoni.” Naʻe anga-fēfē ʻene tali ʻa e ngaahi fehuʻí pea feangai mo e ngaahi tuʻunga naʻe tuku atu kiate iá? ʻAki hono ngāueʻaki ʻi he taimi ʻe niʻihi ʻa e ngaahi talanoa fakatātā te ne ʻai ke fakakaukau ai ʻa e kakaí. ʻI he ngaahi taimi kehe ʻaki ʻa e ʻeke ki he tokotaha fehuʻí fekauʻaki mo ʻene mahinoʻi tonu ʻo ha konga Tohitapu. ʻAki ʻa e toutou fakamatalaʻi ʻa e ngaahi konga Tohitapú, toe fakalea kinautolu, pe lave kia kinautolu. (Mt. 4:​3-​10; 12:​1-8; Luke 10:​25-​28; 17:32) ʻI he ʻuluaki senitulí, naʻe faʻa tauhi ai ʻa e ngaahi takainga Konga Tohitapú ʻi he ngaahi sinakoké. ʻOku ʻikai ha fakamoʻoni naʻe maʻu ʻe Sīsū ha tānekinga fakafoʻituitui ʻo e ngaahi takainga tohí ni, ka naʻá ne ʻiloʻi lelei ʻa e ngaahi Konga Tohitapú pea toutou lave ki ai ʻi heʻene akoʻi ʻa e niʻihi kehé. (Luke 24:​27, 44-​47) Naʻe lava ke ne lea moʻoni ʻo pehē ko e meʻa naʻá ne akoʻí naʻe ʻikai ke tupu meiate ia pē. Naʻá ne leaʻaki ʻa e meʻa naʻá ne fanongoa mei heʻene Tamaí.​—Sione 8:​26.

Ko ʻetau holí ia ke muimui ki he faʻifaʻitakiʻanga ʻa Sīsuú. Kuo ʻikai ke tau fanongo fakafoʻituitui ki he folofola ʻa e ʻOtuá, ʻo hangē ko Sīsuú. Ka ko e Tohitapú ko e Folofola ia ʻa e ʻOtuá. ʻI he taimi ʻoku tau ngāueʻaki ai ia ko e makatuʻunga ki heʻetau ngaahi talí, ʻoku tau fakaʻehiʻehi ai mei hono tohoaki mai ʻa e tokangá kia kitautolú. ʻOku tau fakahaaʻi ai ʻi he ʻikai ko hono fakalea ʻa e fakakaukau ʻa ha tangata taʻehaohaoa, ʻoku tau fakapapauʻi mālohi ke tuku ʻa e ʻOtuá ke ne folofola ki he meʻa ʻa ia ʻoku moʻoní.​—Sione 7:​18; Loma 3:4.

Ko e moʻoni, ko ʻetau holí ʻoku ʻikai koeʻuhi ke ngāueʻaki pē ʻa e Tohitapú ka ke fai ia ʻi ha founga ʻa ia ʻe ʻaonga lahi taha ki heʻetau kau fanongó. ʻOku tau loto ke ne fanongo mai fakataha mo ha fakakaukau ʻatā. Fakatuʻunga ʻi he fakakaukau ʻa e tokotahá, ʻe lava ke ke kamata ʻa e fakakaukau faka-Tohitapú ʻaki ʻa e pehē: “ʻIkai ʻokú ke loto-tatau ko e meʻa moʻoni ʻoku laú ko e meʻa ʻoku folofolaʻaki ʻe he ʻOtuá?” Pe ʻe lava ke ke pehē: “Naʻá ke ʻiloʻi ʻoku lāulea ʻa e Tohitapú ki he foʻi fehuʻi tonu ko iá?” Kapau ʻokú ke lea ki ha taha ʻoku ʻikai haʻane ʻapasia ki he Tohitapú, ʻe fiemaʻu nai ke ke ngāueʻaki ha lea kamata ʻoku kiʻi kehe. ʻE lava ke ke pehē: “Tuku ke u vahevahe atu kiate koe ʻa e kikite motuʻa ko ení.” Pe te ke pehē nai: “Ko e tohi ʻa ia ʻoku tufaki lahi taha ʻi he hisitōlia ʻo e tangatá ʻoku leaʻaki ai eni . . . ”

ʻI he ngaahi tuʻunga ʻe niʻihi, te ke fili pē nai ke toe fakalea ha konga tohi. Kae kehe, ʻi heʻene malavá, ʻoku lelei tahá ke fakaava ʻa e Tohitapú tonu pea lau ʻa e meʻa ʻoku leaʻaki aí. Fakahaaʻi ʻa e konga Tohitapú ki he tokotahá ʻi heʻene tatau Tohitapu pē ʻaʻaná ʻi ha taimi pē ʻe ʻaonga aí. Ko e ngāueʻaki hangatonu ko eni ʻo e Tohitapú ʻoku faʻa ʻi ai ʻene kaunga mālohi ki he kakaí.​—Hep. 4:​12.

Ko e kau mātuʻa Kalisitiané ʻoku nau maʻu ha fatongia makehe ke ngāueʻaki ʻa e Tohitapú ʻi hono tali ʻa e ngaahi fehuʻí. Ko e taha ʻa e ngaahi tuʻunga taau ki he ngāue ko ha mātuʻá, ko e tokouá ʻokú ne “buke ke mau ae lea mooni, o hage ko hono akonekina.” (Tai. 1:​9, PM) Ko ha mēmipa ʻo e fakatahaʻangá te ne fai nai ha fili mafatukituki ʻi he moʻuí hili hono fai ange kiate ia ʻe ha mātuʻa ha akonaki. He mahuʻinga ē ke makatuʻunga fefeka ʻa e akonaki ko ení ʻi he ngaahi Konga Tohitapú! Ko ha faʻifaʻitakiʻanga ʻa ha mātuʻa ʻi hono fai ení ʻe lava ke ne tākiekina ʻa e niʻihi kehe tokolahi ʻi heʻenau founga faiakó.