Feinga ke Aʻu ki he Lotó

TĀNAKI ATU ki hono fai ha fakamoʻoni ki he kakaí, ʻoku fiemaʻu ke ke fai ha feinga ke aʻu ki honau lotó. ʻI he Tohitapú, ʻoku faʻa fokotuʻu ai ʻa e lotó ʻo fakafaikehekeheʻi ʻaki ʻa e meʻa ʻoku hā ʻi tuʻa ʻi ha tokotaha. Ko e lotó ʻokú ne fakafofongaʻi ʻa e tuʻunga ʻo e tokotahá ʻi lotó​—ʻa e anga ʻo ʻene ongoʻí, meʻa kotoa ʻokú ne fakakaukau fekauʻaki mo iá, ʻuhinga ʻokú ne fakakaukau ai fekauʻaki mo iá, mo e anga ʻo e tākiekina ʻe he ngaahi fakakaukau ko iá ʻa ʻene ngaahi tōʻongá. Ko e loto ko ení ʻoku tūtuuʻi ai ʻa e tenga ʻo e moʻoní. (Mt. 13:19) Pea kuo pau ke tupu mei he lotó ʻa e talangofua ki he ʻOtuá.​—Pal. 3:1; Loma 6:​17.

Koeʻuhi ke lava ʻo hūhū hoʻo faiakó ki he lotó, tokangataha ki he ngaahi taumuʻa ko ení: (1) ʻIloʻilo ki he meʻa kuó ne ʻosi tākiekina ʻa e loto ʻo hoʻo tokotaha fanongó. (2) ʻAi ke mālohi ʻa e ngaahi ʻulungaanga lelei, hangē ko e ʻofá mo e manavahē faka-ʻOtuá. (3) Fakalotolahiʻi hoʻo tokotaha fanongó ke ne ʻanalaiso ʻa ʻene ngaahi fakaueʻiloto ʻi lotó koeʻuhi ke ne lava ʻo fakahōifua kakato kia Sihova.

Ngāueʻaki ʻa e ʻIloʻiló. Ko e ngaahi ʻuhinga kuo teʻeki ke tali ai ʻe he kakaí ʻa e moʻoní ʻoku kehekehe. ʻI hono fai ha ako Tohitapu ʻi ʻapi, ʻe fiemaʻu nai ke ke toʻo ʻa e tomuʻa fehiʻá pea ʻoatu ʻa e ngaahi foʻi moʻoní ke ne fetongi ʻa e ngaahi fakakaukau hala ʻoku maʻu ʻe he tokotaha akó, pe ʻe fiemaʻu pē nai ke ke ʻoatu ʻa e fakamoʻoni. ʻEke hifo kiate koe: ‘ʻOku lāuʻilo ʻa e tokotaha ko ení ʻoku ʻi ai ʻene ngaahi fiemaʻu fakalaumālie ʻi he tuʻunga ko ha tangatá? Ko e hā ʻa e lahi ʻo e meʻa kuó ne ʻosi tui ki aí? Ko e hā ʻoku ʻikai te ne tui ki aí? Ko e hā kuó ne aʻu ai ki he ngaahi fakamulituku ko iá? ʻOkú ne fiemaʻu ha tokoni ke ikuʻi ai ʻa e ngaahi holi ʻa ia ʻe lava ke ne taʻofi ia mei hono tali ʻa e ngaahi fatongia ko ia ʻoku hoko fakataha mo hono ʻiloʻi ʻa e moʻoní?’

ʻOku ʻikai faingofua maʻu pē ke ʻiloʻi ʻa e ʻuhinga ʻoku tui ai ʻa e kakaí ki he ngaahi meʻa pau. “Ko e tuʻutuʻuni ʻi he loto ʻo e tangata ko e vai tuʻu fufū,” ko e lau ia ʻa e Palovepi 20:​5, “ka ko e tama ʻiloʻilo te ne lava ke fusi hake.” Ko e ʻiloʻiló ko e malava ke mahinoʻi ʻa e meʻa ʻoku teʻeki ke hā mahinó. ʻOku fiemaʻu ki he meʻá ni ʻa e siofi fakamātoato pea mo ha fakakaukau tokanga.

ʻOku ʻikai faiʻaki ʻa e leá ʻa e fetuʻutaki kotoa pē. ʻE fakatupu nai ʻe ha tuʻunga-lea pau ha liliu ʻi he anga ʻo e sio pe tō ʻo e leʻo ʻo e tokotaha akó. Kapau ko ha mātuʻa tauhi fānau koe, ʻoku ʻikai ha veiveiua ʻokú ke ʻiloʻi ko ha liliu ʻi he tōʻonga hoʻo kiʻi tamá ʻe fakahaaʻi nai ai ʻokú ne fai ha tali ki ha tākiekina foʻou ʻi he moʻuí. ʻOua ʻe tukunoaʻi ʻa e ngaahi fakaʻilonga ko ení. Ko e fanga kiʻi maʻalifekina ia ʻo e meʻa ʻoku ʻi he loto ʻo e tokotahá.

Ko e ngaahi fehuʻi ʻosi filifili leleí ʻe lava ke ne tokoniʻi koe ke ʻiloʻi ai ʻa e meʻa ʻoku ʻi he loto ʻo e tokotahá. Te ke ʻeke nai: “ʻOku anga-fēfē hoʻo ongoʻi fekauʻaki mo e . . . ?” “Ko e hā naʻá ne fakatuipauʻi koe ki he . . . ?” “ʻE anga-fēfē hoʻo ongoʻí kapau . . . ?” Neongo ia, tokanga ke ʻoua ʻe nafui ʻa e kakaí ʻaki ʻa e ngaahi fehuʻí. Te ke kamata pōtoʻi nai hoʻo ngaahi fehuʻí ʻaki eni, “ʻE sai pē nai kapau te u ʻeke atu . . . ?” Ko hono ʻiloʻi ʻa e meʻa ʻoku ʻi he lotó ko ha ngāue faingataʻa ia ʻa ia ʻe ʻikai lava ke fakavaveʻi. ʻI he ngaahi tuʻunga lahi tahá ko e falalá kuo pau ke langa hake ia ʻi ha vahaʻa taimi ki muʻa ke loto-lelei ʻa e tokotahá ke fakahaaʻi ʻa ʻene ngaahi ongoʻi tefitó. Naʻa mo ia, kuo pau ke ngāueʻaki ʻa e tokangá koeʻuhi ke ʻoua ʻe ongoʻi ʻe he tokotahá ʻokú ke ʻeke fekauʻaki mo ha ngaahi meʻa ʻoku ʻikai haʻo totonu ke ʻilo ki ai.​—1 Pita 4:​15.

Ko e founga ʻo hoʻo tali ki he meʻa ʻokú ke fanongo ki aí ʻoku toe fiemaʻu ki ai ʻa e ʻiloʻilo. Manatuʻi ko hoʻo taumuʻá ke mahinoʻi ʻa e kakaí koeʻuhi ke lava ai ʻo ke fakapapauʻi ʻa e fakamatala makatuʻunga ʻi he Tohitapú ʻoku ngalingali te ne ueʻi kinautolú. Fakavaivaiʻi vave ha holi pē ke fakaeʻa ʻa e hala ʻo ʻenau ngaahi fakakaukaú. ʻI hono kehé, tokanga ke ʻiloʻilo ki he ongoʻi ʻoku ʻikai fakahaaʻi ʻi he leá. Te ke ʻiloʻi leva ai ʻa e founga ke fai ai ha talí; pea ko hoʻo tokotaha akó, ʻi heʻene ongoʻi ʻoku mahinoʻi iá, ʻe ngalingali te ne fakakaukau fakamātoato ange ai fekauʻaki mo e meʻa ʻokú ke leaʻakí.​—Pal. 16:23.

ʻE lava ke ke ueʻi ʻi ha tuʻunga ʻa e faʻahinga tāutahá naʻa mo e taimi ʻokú ke lea ai ki ha fuʻu kulupu tokolahí. Kapau ʻoku lelei hoʻo fetuʻutaki mo e kau fanongó, tokanga ki he anga ʻo e matá, pea ʻeke ha ngaahi fehuʻi tali loto fakatupu fakakaukau, ngalingali te ke maʻu ai ha fakakaukau ki he founga ʻo e ongoʻi ʻa hoʻo kau fanongó fekauʻaki mo e meʻa ʻokú ke leaʻakí. Kapau ʻokú ke ʻiloʻi lelei hoʻo kau fanongó, fakahaaʻi ʻa e fakaʻatuʻi ki honau ngaahi tuʻungá. Tokanga ki he fakakaukau fakalūkufua ʻa e fakatahaʻangá ʻi hoʻo fakaʻuhinga mo kinautolu mei he Folofola ʻa e ʻOtuá.​—Kal. 6:​18.

Langaʻi ʻa e Ngaahi Ongoʻi ʻAonga. Hili hoʻo maʻu ha mahino ki he meʻa ʻoku tui ki ai ha tokotahá, meʻa ʻoku ʻikai te ne tui ki aí, mo e ʻuhingá, te ke malava ai ke langa hake ʻi he meʻa ko iá. Hili ʻene toetuʻú, naʻe aʻu ʻa Sīsū ki he loto ʻo ʻene kau ākongá ʻaki hono ‘vete kiate kinautolu ʻa e Tohi tapú’ ʻi he fekauʻaki mo e ngaahi meʻa naʻe toki hokó. (Luke 24:32) Ko koe foki ʻoku totonu ke ke feinga ke fai hano fakafehokotaki ʻi he vahaʻa ʻo e meʻa kuo hokosia ʻe he tokotahá, meʻa ʻokú ne ʻunaloto ki aí, mo e meʻa ʻokú ne ʻiloʻi ʻi he Folofola ʻa e ʻOtuá. ʻE laveʻi ʻa e loto ʻo e tokotaha akó ʻi ha founga ʻaonga ʻi heʻene fakatokangaʻi lelei: “Ko eni ʻA E MOʻONÍ!”

ʻI hoʻo fakamamafaʻi ʻa e tuʻunga lelei ʻo Sihová, ko ʻene ʻofá, ko ʻene ʻofa maʻataʻataá, pea mo e totonu ʻo ʻene ngaahi foungá, ʻokú ke tokoniʻi ai ʻa e faʻahinga ʻa ia ʻokú ke akoʻí ke langa hake ai ʻenau ʻofa ki he ʻOtuá. ʻI hoʻo vaheʻi ʻa e taimi ke fakahaaʻi ai ki hoʻo kau fanongó ʻa e ngaahi ʻulungaanga lelei ʻoku vakai mai ki ai ʻa e ʻOtuá ʻia kinautolu ʻi honau tuʻunga tāutahá, ʻokú ke ʻoange ai kia kinautolu ʻa e ʻuhinga ke tui ʻoku malava ke ʻi ai ha vahaʻangatae fakafoʻituitui mo ia. ʻE lava ke fakahoko eni ʻaki ʻa e fakakaukauloto atu ki he ngaahi konga tohi hangē ko e Sāme 139:​1-3, Luke 21:​1-4, mo e Sione 6:​44 pea ʻi hono tokoniʻi hoʻo kau fanongó ke nau houngaʻia ʻi he lahi ʻo e pipiki anga-ʻofa ʻa Sihova ki heʻene kau sevāniti loto-tōnungá. (Loma 8:​38, 39) Fakamatalaʻi ʻoku ʻikai ke fakatokangaʻi pē ʻe Sihova ʻetau ngaahi fehālaakí ka ʻokú ne ʻafio mai ki he ʻalunga kotoa ʻo ʻetau moʻuí, ko ʻetau faivelenga ki he lotu maʻá mo ʻetau ʻofa ki hono huafá. (2 Kal. 19:​2, 3; Hep. 6:​10) ʻOkú ne manatuʻi naʻa mo e ngaahi fakaikiiki siʻisiʻi taha fekauʻaki mo kitautolu tāutaha, pea te ne toe fakafoki mai, ʻi ha founga fakaofo ki he moʻuí ʻa e “kakai kotoa pe ʻoku ʻi he ngaahi faʻitoka.” (Sione 5:​28, 29; Luke 12:​6, 7) Koeʻuhi naʻe ngaohi ʻa e tangatá ʻi he ʻīmisi mo e tatau ʻo e ʻOtuá, ko ha lāulea ki hono ngaahi ʻulungāngá te ne faʻa fakatupunga maʻu pē ha tali lelei loto-moʻoni mei he tokotahá.​—Sen. 1:​27.

ʻOku toe lava ke maongo ki he lotó ʻa e taimi ʻoku ako ai ha tokotaha ke vakai ki he kakai kehé ʻo hangē ko e vakai ʻa Sihová. ʻOku ʻuhinga lelei kapau ʻoku fakahaaʻi ʻe hotau ʻOtuá ʻa e tokanga ʻofa fekauʻaki mo kitautolu ʻi hotau tuʻunga tāutahá, tā ʻokú ne toe fakahaaʻi ʻa e fakaʻatuʻi tatau ki he niʻihi kehé, ʻo tatau ai pē pe ko e hā honau puipuituʻá, fonuá pe matakalí. (Ng. 10:​34, 35) ʻI he aʻu pē ha tokotaha ki ha mahino pehē, ʻe ʻi ai ha makatuʻunga Fakatohitapu fefeka kiate ia ke ne taʻaki fuʻu ai mei hono lotó ʻa e tāufehiʻá mo e tomuʻa fehiʻá. ʻE ʻai ʻe he meʻá ni ke ne malava ai ʻo feohi ʻi he melino mo e niʻihi kehé ʻi heʻene ako ke fakahoko ʻa e finangalo fakaʻotuá.

Ko e manavahē-ʻOtuá ko ha toe ongoʻi ia ʻe taha ʻoku totonu ke ke tokoniʻi ʻa e niʻihi kehé ke nau fakatupulekina. (Sāme 111:10; Fkh. 14:​6, 7) Ko e ʻapasia loloto peheé, pe manavahē ki he ʻOtuá, ʻe lava ke ne ueʻi ha tokotaha ke ne lavaʻi ʻa e meʻa ʻe ʻikai nai malava ʻi hono ivi pē ʻoʻoná. ʻI he lāulea ki he ngaahi ngāue fakamanavahē ʻa Sihová mo ʻene ʻaloʻofa lahi faú, ʻe lava ke ke tokoniʻi ai ʻa e niʻihi kehé ke nau fakatupulekina ha manavahē lelei ki hano taʻefakahōifuaʻi ia.​—Sāme 66:5; Sel. 32:40.

Fakapapauʻi ʻoku mahinoʻi ʻe hoʻo kau fanongó ʻoku mahuʻinga kia Sihova ʻa honau ʻulungāngá. ʻOku ʻi ai ʻene ngaahi ongoʻi, pea ʻi heʻetau tali ki heʻene fakahinohinó, ʻoku tau fakatupunga ai ia ke ne mamahi pe fiefia. (Sāme 78:​40-​42) Fakahaaʻi ki he kakaí ʻa e ʻuhinga ʻe lava ai ʻa honau ʻulungaanga fakafoʻituituí ke ʻai ha faikehekehe ʻi hono fai ʻa e tali ki he pole ʻa Sētane ki he ʻOtuá.​—Pal. 27:11.

Tokoniʻi hoʻo kau fanongó ke nau ʻiloʻi ko hono aʻusia ʻa e ngaahi fiemaʻu ʻa e ʻOtuá ʻoku ʻaonga ia kia kinautolu. (Ai. 48:17) Ko e founga ʻe taha ʻe lava ke fai ai ení ko hono fakahaaʻi ʻa e ngaahi nunuʻa fakaesino mo fakaeongo ʻo hono siʻaki ʻa e poto ʻo e ʻOtuá naʻa mo e ʻi ha mōmeniti. Fakamatalaʻi ʻa e founga hono ʻai ʻe he angahalá ke tau mamaʻo mei he ʻOtuá, toʻo mei he niʻihi kehé ʻa e faingamālie ke nau ako meia kitautolu ʻa e moʻoní, pea halalotoʻapi ai ʻi ha founga ʻi heʻenau ngaahi totonú. (1 Tes. 4:6) Tokoniʻi hoʻo kau fanongó ke nau koloaʻaki ʻa e ngaahi tāpuaki kuo nau ʻosi maʻu ko hono ola ia ʻo ʻenau tauhi ʻa e ngaahi lao ʻa e ʻOtuá. ʻAi ke mālohi ʻenau houngaʻia ki he moʻoniʻi meʻa ko ia ko e ʻaʻeva ʻi he ngaahi founga māʻoniʻoni ʻa Sihová ʻoku fakahaofi ai kitautolu mei he mamahi lahi. ʻI he maʻu pē ʻe ha taha ʻa e tui ki he fakapotopoto ʻo e ngaahi founga ʻa e ʻOtuá, te ne talitekeʻi ai ʻi he ʻalunga kotoa pē ʻa e fakafepaki ki aí. (Sāme 119:104) Te ne vakai ai ki he talangofuá, ʻoku ʻikai ko ha kavenga, ka ko ha founga ia ke fakahāhā ai ʻa e līʻoa anga-ʻofa kia Sihova ʻi he tuʻunga ko ha tokotahá.

Tokoniʻi ʻa e Niʻihi Kehé ke Fai ha Sivisiviʻi. Koeʻuhi ke hokohoko atu ʻa e tupu fakalaumālié, ʻoku fiemaʻu ke hoko ʻa e kakaí ʻo ongongofua ki he meʻa ʻoku ʻi honau lotó. Fakamatalaʻi ʻa e founga ʻe lava ke tokoniʻi ai ʻe he Tohitapú kinautolu ke fai ení.

Tokoniʻi hoʻo kau fanongó ke nau ʻiloʻi ko e Tohitapú ʻoku ʻikai ko ha lēkooti pē ia ʻo e ngaahi fekau, akonaki, ngaahi meʻa fakahisitōlia ʻoku hoko mo e ngaahi kikite. ʻOkú ne toe fakahaaʻi ʻa e fakakaukau ʻa e ʻOtuá. ʻI he Semisi 1:​22-​25, ʻoku fakahoa ai ʻa e Folofola ʻa e ʻOtuá ki ha sioʻata. ʻI heʻetau tali ki he meʻa ʻoku leaʻaki aí pea ki he founga ʻoku fakahoko ai ʻe Sihova ʻene taumuʻá, ʻoku fakaeʻa ʻe he pōpoaki ʻo e Tohitapú ʻa e meʻa ʻoku ʻi hotau lotó. ʻOku fakahaaʻi ai ʻa e founga ʻoku sio mai ai kia kitautolu ʻa e ʻOtuá, ʻa ia ko e tokotaha “sivi loto.” (Pal. 17:3) Fakalotolahiʻi hoʻo kau fanongó ke nau hanganaki fakakaukau ki he meʻá ni. Fakaʻaiʻai kinautolu ke fakakaukauloto ki he meʻa kuo tuku tauhi mai ʻe he ʻOtuá maʻatautolu ʻi he lēkooti ʻo e Tohitapú pea mo e ngaahi feʻunuʻaki ʻe fiemaʻu nai ke nau fai ʻi heʻenau moʻuí koeʻuhi ke fakahōifua lahi ange ai kiate iá. Tokoniʻi kinautolu ke nau vakai ki he lau Tohitapú ko ha founga ia ʻo hono maʻu ʻa e fakafuofua ʻa Sihova fekauʻaki mo e “ngaahi holi mo e fakakaukau ʻo e loto” koeʻuhi ke nau lava ai ʻo ngāue fāitaha mo e ʻOtuá ʻi hono fai ha ngaahi liliu pē ʻoku fiemaʻu.—Hep. 4:12; Loma 15:4.

ʻE fiemaʻu nai ʻe he kau ako Tohitapu ʻe niʻihi ke ngāue ki he meʻa ʻoku nau akó; neongo ia ʻoku nau hohaʻa fekauʻaki mo e meʻa ʻe fakakaukau ki ai ʻa e kakai kehé. ʻOku nau faitau nai mo e ngaahi holi fakakakano mālohi ʻe niʻihi. Pe ʻoku nau fakaʻuhinga nai ke maʻu ha founga ke tauhi ai ki he ʻOtuá lolotonga ia ʻa e pipiki ki he ngaahi tōʻonga ʻa e māmaní. Fakahaaʻi ʻa e ngaahi fakatuʻutāmaki ʻo e lotolotoua peheé. (1 Tuʻi 18:21) Fakaʻaiʻai ke nau lotu ki he ʻOtuá ke ne vakaiʻi mo sivi honau lotó.​—Sāme 26:2; 139:​23, 24.

Fakahaaʻi kia kinautolu ʻoku mahinoʻi ʻe Sihova ʻenau fāingá pea ʻoku fakamatalaʻi ʻe he Tohitapú ʻa e meʻa ʻoku hokó. (Loma 7:​22, 23) Tokoniʻi kinautolu ke nau tokanga koeʻuhi ke ʻoua ʻe fakaʻatā ke pule ʻa e ngaahi hehema ʻo e loto taʻehaohaoá.​—Pal. 3:​5, 6; 28:26; Sel. 17:​9, 10.

Fakalotolahiʻi ʻa e tokotaha taki taha ke ne ʻanalaiso ʻa ʻene ngaahi fakaueʻiloto ki hono fai ʻa e ngaahi meʻá. Akoʻi ke ne ʻeke hifo kiate ia: ‘Ko e hā ʻoku ou fiemaʻu ai ke fai ení? ʻE fakahaaʻi ai kia Sihova ʻoku ou houngaʻia moʻoni ʻi he meʻa kotoa kuó ne fai maʻakú?’ Ngāue ke ʻai ke mālohi ʻa e tuipau ko ha vahaʻangatae fakahōifua mo Sihova ʻa e koloa mahuʻinga taha ʻe lava ke maʻu ʻe ha tahá.

Tokoniʻi hoʻo kau fanongó ke nau mahinoʻi ʻa e ʻuhinga ʻo e tauhi kia Sihova ʻaki honau “loto kotoa.” (Luke 10:​27, PM) ʻOku ʻuhinga ení ko e kotoa ʻo ʻenau ongoʻí, ngaahi holí, mo e fakaueʻilotó kuo pau ke fehoanaki ia mo e ngaahi founga ʻa Sihová. Ko ia akoʻi hoʻo kau fanongó ke nau ʻanalaiso ʻo ʻikai ko e meʻa pē ʻoku nau faí, ka ko e toe anga foki ʻenau ongoʻi fekauʻaki mo e ngaahi fiemaʻu ʻa e ʻOtuá mo ʻenau ngaahi fakaueʻiloto ʻi he tauhi kiate iá. (Sāme 37:4) ʻI he ʻiloʻilo hoʻo kau akó ki he ngaahi tafaʻaki ʻa ia ʻoku fiemaʻu ke fakaleleiʻí, fakalotolahiʻi kinautolu ke nau lotu kia Sihova: “Gaohi ke taha be hoku loto ke manavahe ki ho huafa.”—Sāme 86:​11, PM.

ʻI he fakatupulekina ʻe ha tokotaha ako ha vahaʻangatae fakafoʻituitui mo Sihová, te ne talangofua ai ki he ʻOtuá ko e tupu ia mei he tuí ʻo ʻikai koeʻuhi pē ko hoʻo ngaahi fakaʻaiʻaí. Te ne hanga leva, ʻiate ia pē, ʻo “sivi ʻo ʻilo, pe ko e ha ʻa e meʻa ʻe hōifua ai ʻa e ʻEiki.” (Ef. 5:10; Fili. 2:12) Ko e talangofua loto-moʻoni peheé ʻoku fakafiefiaʻi ai ʻa Sihova.​—Pal. 23:15.

Manatuʻi ko Sihova ʻa e tokotaha ʻokú ne fakafuofua ʻa e lotó mo tohoakiʻi ʻa e kakaí ki ha vahaʻangatae mo ia. (Pal. 21:2; Sione 6:​44) Ko hotau ngafá ko e taha ia ʻo e ngāue fāitaha. (1 Kol. 3:9) ʻOku ‘hage ia oku fakakolekole ae Otuá iate kitautolú.’ (2 Kol. 5:​20, PM, fakaʻītali ʻamautolu; Ng. 16:14) ʻOku ʻikai fakamālohiʻi ʻe Sihova ha taha pē ke ne tali ʻa e moʻoní, ka ʻi heʻetau ngāueʻaki ʻa e ngaahi Konga Tohitapú, te ne fakatupunga nai ai ʻetau kau fanongó ke nau ʻiloʻi ko e meʻa ʻoku nau fanongo ki aí ʻa e tali ki heʻenau ngaahi fehuʻí​—pe ko ʻenau ngaahi lotú. Fakakaukau ki he meʻá ni ʻi ha faingamālie pē ʻokú ke maʻu ke akoʻi ʻa e niʻihi kehé, pea kole fakamātoato kia Sihova ki heʻene tatakí mo e tokoní.​—1 Kal. 29:​18, 19; Ef. 1:​16-​18.