Fiefia ʻi Hoʻo ʻAmanakí

Ko e ʻamanakí ʻoku hangē ha taulá. (Hep. 6:19) ʻOkú ne tokoniʻi kitautolu ke tau hao mei he tūkia fakalaumālié ʻi heʻetau fehangahangai mo e hou tuʻu ʻa e tahí. (1 Tīm. 1:18, 19) Ko e hou tuʻu ʻa e tahí ʻoku kau nai ki ai ʻa e loto-mamahi fakafoʻituitui, mole fakamatelie, puke ʻi ha taimi lōloa, mate ha taha ʻofeina pe ko ha toe fakamanamana kehe ki heʻetau anga-tonú.

Ko e tuí mo e ʻamanakí ʻokú ne ʻai kitautolu ke tau lava ʻo sio māʻalaʻala ki he tāpuaki ʻoku talaʻofaʻaki maí. (2 Kol. 4:16-18; Hep. 11:13, 26, 27) Ko ia tatau ai pē pe ʻoku tau maʻu ʻa e ʻamanaki fakahēvaní pe ki he māmaní, kuo pau ke tau hanganaki fakaivimālohiʻi ia ʻaki ʻa e fakalaulauloto ki he ngaahi talaʻofa ʻoku lēkooti ʻi he Folofola ʻa e ʻOtuá. ʻI he taimi leva te tau mamahi ai ʻi he ngaahi ʻahiʻahí, ʻe faingofua ange ai ke tauhi maʻu ʻetau fiefiá.—1 Pita 1:6, 7.

SIO ʻI HE VITIŌ FIEFIA ʻI HE ʻAMANAKÍ, PEA TALI ʻA E NGAAHI FEHUʻI KO ENÍ:

• Ko e hā ko ha faʻifaʻitakiʻanga lelei ai ʻa Mōsese ke faʻifaʻitaki ki aí?

• Ko e hā ʻa e fatongia ʻoku hilifaki ki he ngaahi ʻuluʻi fāmilí?

• Ko e hā ha ngaahi kaveinga ke lāulea nai ki ai ʻi he polokalama Lotu Fakafāmilí?

• ʻE lava fēfē ke tokoniʻi koe ʻe he ʻamanakí ke ke fehangahangai mo e ngaahi ʻahiʻahí ʻi he falala-pau?

• Ko e hā ʻokú ke fakatuʻotuʻa atu ki aí?