ʻI he Taimi ʻOkú Ke Ongoʻi Ai ʻOku ʻIkai Te Ke Toe Fie Moʻuí

ʻI HE taʻu taki taha, ʻoku laui mano ʻa e kakai ʻi he ʻIunaite Seteté ʻataʻatā pē ʻoku nau feinga ke toʻo ʻenau moʻuí. ʻOku ʻomai ʻi he Tohi Tapú ha ʻuhinga tefito ki he ʻuhinga ʻoku siva pehē ai ʻa e ʻamanaki ʻa e tokolahi. ʻOku fakamatala ai ʻoku tau moʻui ʻi he “ngaahi taimi fakalilifu ʻa ia ʻe faingataʻa ke fekuki mo ia.” ʻOku ongoʻi lahi ʻaupito ʻe he kakaí ʻa e ngaahi tenge ʻo e moʻuí. (2 Tīmote 3:1; Koheleti 7:7) ʻI he taimi ʻoku lōmekina ai ha taha ʻe he ngaahi loto-moʻua ʻo e moʻuí, te ne fakakaukau nai ki he taonakitá ko ha founga ia ke hao ai mei he mamahí. Ko e hā ʻe lava ke ke faí kapau kuo ʻi ai haʻo ngaahi fakakaukau pehē?

ʻOku ʻIkai ko Koe Toko Taha Pē!

Neongo ʻe hā ngali faingatāmaki ʻaupito nai ho tuʻungá, manatuʻi ʻoku ʻikai ko koe toko taha pē pea ko e meʻa fakamamahí ʻoku meimei ko e tokotaha kotoa pē ʻoku fehangahangai mo ha faʻahinga palopalema he ʻahó ni. ʻOku pehē ʻe he Tohi Tapú: “Ko e fakatupú kotoa ʻoku nau hanganaki toʻe fakataha mo mamahi fakataha.” (Loma 8:22) Lolotonga ʻi ha vahaʻa taimi nounou ʻe hā ngali nai ko hoʻo palopalemá ʻe ʻikai ʻaupito ke fakaleleiʻi ia, ʻoku faʻa hoko ʻo lelei ange ʻa e ngaahi meʻá ʻi he faai atu ʻa e taimí. Lolotonga iá, ko e hā ʻe lava ke tokoní?

Vahevahe hoʻo ngaahi ongoʻí ki ha kaungāmeʻa matuʻotuʻa mo falalaʻanga. ʻOku pehē ʻe he Tohi Tapú: “Ko e kaumeʻa ʻoku ne ʻofa ʻi he taimi kotoa pe; pea ko hoto moʻoni naʻe fanauʻi maʻa ha faingataʻa.” (Palōveepi 17:17) Ko e tangata māʻoniʻoni ko Siopé, ʻa ia ʻoku fakamatalaʻi ʻi he Tohi Tapú, naʻá ne fakahaaʻi ʻene ngaahi ongoʻí ki he niʻihi kehé lolotonga ʻa e vahaʻa taimi ʻo ʻene faingataʻaʻia lahí. ʻI he taimi naʻá ne ongoʻi ai ʻo hangē ko ia ko ʻene lea ‘ʻoku ou fiu ʻi heʻeku moʻuí,’ naʻá ne pehē: “Te u laku atu ʻeku launga: Te u lea ʻi he mamahi hoku laumalie.” (Siope 10:1) Ko e talanoa ki he niʻihi kehé ʻe lava ke holo hifo ai ʻa e lahi ʻa hoʻo ngaahi ongoʻí, pea ʻe malava ke ne ʻoatu kiate koe ha fakakaukau foʻou ki he ngaahi palopalema ʻokú ke fehangahangai mo iá.a

Lilingi atu ho lotó ki he ʻOtuá ʻi he lotu. ʻOku maʻu ʻe he niʻihi ʻa e fakakaukau ko e lotú ko ha fakanonga fakaeʻatamai pē ia, ka ʻoku leaʻaki ʻe he Tohi Tapú ha meʻa ia ʻoku kehe. ʻOku ui ʻi he Saame 65:2 ʻa Sihova ko e ʻOtuá ko e tokotaha “tali lotu” ia, pea ʻi he 1 Pita 5:7 ʻoku pehē ai: “ʻOkú ne tokanga mai kiate kimoutolu.” ʻOku toutou fakamamafaʻi mai ʻe he Tohi Tapú ʻa e mahuʻinga ʻo e falala ki he ʻOtuá. Ko e fakatātaá:

“Falala ki he ʻEiki ʻaki ʻa e kotoa ʻo ho loto, ʻo ʻouae fāki ki ho poto oʻou: Ke ke fakaongo kiate ia ʻi ho hala kotoa pe, pea ʻe fakatonutonu ʻe ia ho ngaahi ʻalunga.”—PALŌVEEPI 3:5, 6.

“Ko e holi ʻa e kakai ʻoku ʻapasia [kia Sihová] ʻoku ne fakaai; pea ʻoku ongo kiate ia ʻenau kaila, ʻo ne fakamoʻui.”—SAAME 145:19.

“Ko e loto-falala eni ʻoku tau maʻu kiate iá, ʻa ia, ʻilonga ha meʻa ʻoku tau kole ʻo fakatatau ki hono finangaló, ʻokú ne fanongo mai kiate kitautolu.”—1 SIONE 5:14.

“ʻOku mamaʻo ʻa Sihova mei he kau angahala: Ka ko e lotu ʻo e faitotonu ʻoku ne ongoʻi.”—PALŌVEEPI 15:29.

Kapau te ke tala ki he ʻOtuá ʻa e ngaahi faingataʻa ʻokú ke fehangahangai mo iá, te ne ʻomai ha tokoni. ʻI he ʻuhinga lelei, ʻoku fakalototoʻaʻi koe ʻe he Tohi Tapú ke ke “falala kiate ia he taimi kotoa . . . mou lilingi homou loto ʻi hono ʻao na.”—Saame 62:8.

ʻI he Taimi ʻOku Fiemaʻu Ai ha Meʻa Lahi Angé

ʻOku hā mei he ngaahi fakatotoló ko e tokolahi taha ʻo e kakai ʻoku nau toʻo ʻenau moʻuí kuo nau loto-mafasia nai ʻi ha vahaʻa taimi.b ʻOku fakamamafaʻi ʻe he meʻá ni ʻa e moʻoniʻi meʻa ko ia ʻe fiemaʻu nai ha tokoni fakafaitoʻo. ʻE ʻomai nai ʻe ha toketā ha faitoʻo pe fokotuʻu mai ke feʻunuʻaki ʻa e meʻa ʻoku kaí. ʻI he ngaahi tuʻunga ʻe niʻihi, ko ha polokalama fakamālohisino ko ha toe tokoni ola lelei ia ki he faitoʻó. Ko e tokoni fakafaitoʻo fakapalōfesinalé kuo fakamoʻoniʻi ʻoku ʻaonga ia ki he tokolahi.c

ʻOku ʻi he Tohi Tapú ʻa e fakamatala lahi ʻa ia ʻe lava ke ne ʻoatu kiate koe ʻa e tokoni mo e ʻamanaki. Ko e fakatātaá, ʻi he Fakahā 21:4, ʻoku lau ai ʻa e Tohi Tapú ʻo fekauʻaki mo Sihova ko e ʻOtuá: “Te ne holoholo ʻa e loʻimata kotoa pē mei honau matá, pea ʻe ʻikai ke toe ʻi ai ha mate, pe ha mamahi pe ha tangi pe ha langa. Kuo mole atu ʻa e ngaahi meʻa muʻá.” Ko ha talaʻofa fakaʻotua eni, pea ko e fakalaulauloto ki aí ʻoku malava ke ne ʻomai ai ʻa e fakafiemālie.

ʻOku vahevahe atu ʻe he Kau Fakamoʻoni ʻa Sihová ʻa e ʻamanaki makatuʻunga ko eni ʻi he Tohi Tapú ki he kakai ʻe laui miliona takatakai ʻi he māmaní. Ko hono olá, ʻoku maʻu ai ʻe he tokolahi ʻa e ʻamanaki moʻoni ʻi he ngaahi taimi fakamamahi ko ení. Ki ha fakamatala lahi ange, fetuʻutaki ki he Kau Fakamoʻoni ʻa Sihova ʻi ho feituʻú ʻaki hoʻo ʻaʻahi ki he Fale Fakatahaʻanga fakalotofonuá, pe tohi ki he tuʻasila feʻungamālie ʻoku hā ʻi he peesi 5 ʻo e makasini ko ení. ʻE lava ke ke vakai foki ki heʻemau Uepisaití ʻi he www.watchtower.org.

[Fakamatala ʻi lalo]

[Puha ʻi he peesi 28]

TOKONI MEI HE TOHI TAPÚ

● “ʻOua ʻe hoko ʻo loto-moʻua ʻi ha faʻahinga meʻa, ka ʻi he meʻa kotoa pē fakafou ʻi he lotu mo e hū tōtōaki fakataha mo e fakafetaʻi, mou ʻai ke ʻilo ai hoʻomou ngaahi kolé ʻe he ʻOtuá; pea ko e nonga ʻa e ʻOtuá ʻa ia ʻoku fakalaka atu ʻi he mahino kotoa pē te ne maluʻi homou lotó pea mo homou ngaahi mafai fakaefakakaukaú fakafou ʻia Kalaisi Sīsū.”—Filipai 4:6, 7.

● “Naʻa ku haʻao ki he ʻEiki, pea ne talia; pea ne hamusi au mei heʻeku ʻu ilifia.”—Saame 34:4.

● “He ko e loto lavea ʻoku ofi ki ai ʻa e ʻEiki, pea ʻoku ne fakamoʻui ʻakinautolu ʻoku laumalie mafesi.”—Saame 34:18.

● “He ko e lotomafesi ʻoku ne faitoʻo, pea ʻoku ne haʻihaʻi honau ngaahi kafo.” —Saame 147:3.

[Puha ʻi he peesi 29]

KAPAU KUÓ KE FAKAKAUKAU TAONAKITA . . . 

Vahevahe hoʻo ngaahi ongoʻí ki ha kaungāmeʻa falalaʻanga

Lilingi atu ho lotó ki he ʻOtuá ʻi he lotu

Kumi ki ha faleʻi fakafaitoʻo

[Puha/Fakatātā ʻi he peesi 30]

KI HE NGAAHI KAUNGĀMEʻÁ MO E FĀMILÍ

Ko e ngaahi mēmipa ʻo e fāmilí mo e ngaahi kaungāmeʻa ofí ʻoku faʻa hoko ko e ʻuluaki faʻahinga ia ʻoku nau fakatokangaʻi ʻa e fakakaukau taonakita ʻa ha tokotaha loto-mamahi. Ko hono fai ha meʻá ʻe malava ai ke ne fakahaofi ʻa e moʻui ʻa e tokotaha ko iá! Hoko ko ha tokotaha fanongo kaungāongoʻi. Fakahaaʻi ʻokú ke ʻiloʻi ʻa e tuʻunga moʻoni ʻo e ngaahi faingataʻa ʻokú ne fehangahangai mo iá. ʻOku pehē ʻe he Tohi Tapú: “Lea fakanonga ki he faʻahinga ʻoku loto-mafasiá.” (1 Tesalonaika 5:14) Fakaʻaiʻai ʻa e tokotaha loto-mamahí ke ne maʻu ha tokoni, pea ʻo ka fiemaʻu, hokohoko vakaiʻi ke fakapapauʻi ʻoku fai ha fokotuʻutuʻu ki ha tokoni pehē.