Fakataha ʻa e Fakatahaʻangá Fakafou ʻi he ʻInitanetí

Ko e ngaahi puleʻanga lahi kuo nau fokotuʻu ke tauhi ʻa e vā mamaʻó pea tapui ʻa e fakatahataha fakatokolahí. Ko e Kau Fakamoʻoni ʻa Sihová ʻoku nau talangofua ki he Puleʻangá, ʻi he taimi tatau ʻoku nau hokohoko atu ke lotu fakataha ʻi ha founga ʻe ʻikai ke uesia ai kinautolu. Ke fai ení, kuo ngāueʻaki ʻe he ngaahi fakatahaʻangá ʻa e Zoom ʻi he ʻinitaneti ke fakahoko ʻa e ngaahi fakatahá.

Naʻe tali ʻe he Kulupu Pulé ke ngāueʻaki ʻa e ngaahi paʻanga tokoní ke totongi ʻaki ʻa e polokalama Zoom ke lava ʻa e ngaahi fakatahaʻangá ʻo fakahoko maʻu pē ʻenau ngaahi fakatahá. Kuo hoko eni ko ha tokoni lahi ki he ngaahi fakatahaʻanga ʻe niʻihi ʻa ia naʻe ʻikai malava ke nau totongi ʻa e polokalama ko ení ʻi he ʻinitaneti ʻo feʻunga mo e $15-$20 pe lahi ange. Ko e ngaahi fakatahaʻanga ko ení naʻa nau faʻa ngāueʻaki ʻa e polokalama taʻetotongi ʻi he ʻinitanetí ʻa ia naʻe fakangatangata ʻa e tokolahi ke hū ki aí pe naʻe ʻikai ke fuʻu loko malu. Ka ʻi he taimi ní, ko e ngaahi fakatahaʻanga kotoa ʻoku nau ngāueʻaki ʻa e Zoom kuo totongi ʻe he kautaha ʻa Sihová. ʻOku faingofua eni ke fakaʻatā ʻa e tokolahi ke kau ki he fakatahá pea ʻi he taimi tatau ʻoku malu feʻunga. Aʻu mai ki he taimi ní, ko e polokalama ko ení ʻoku ngāueʻaki ia ʻe he ngaahi fakatahaʻanga laka hake ʻe 65,000 ʻi he ngaahi fonua ʻe 170 tupu.

Ko e Fakatahaʻanga Kairagi ʻi Manado, Sualwesi Tokelau ʻo ʻInitonēsiá, naʻa nau taʻofi hono ngāueʻaki ha polokalama taʻetotongi ʻi he ʻinitanetí kae kamata ngāueʻaki ʻa e Zoom kuo totongi ʻe he kautaha ʻa Sihová. ʻOku fakamatalaʻi ʻe Tokoua Hadi Santoso: “Naʻa mo e fanga tokoua mo e fanga tuofāfine ʻoku ʻikai ke nau poto ʻi hono ngāueʻaki ʻa e ngaahi meʻangāue fakaʻilekitulōniká ʻoku nau fiefia koeʻuhí ʻoku lava ke nau maʻu ʻa e ngaahi fakatahá ʻo ʻikai ke toe fiemaʻu ke toutou hū ki ai lolotonga ʻoku lele ʻa e fakatahá.”

Ko ha mātuʻa ko Lester Jijón, Jr., ʻi he Fakatahaʻanga Guayacanes Oeste ʻi Guayaquil ʻo ʻEkuatoá ʻokú ne pehē: “Koeʻuhi ko e masiva ʻa e fanga tokouá mo e fanga tuofāfiné naʻe ʻikai lava ʻe he ngaahi fakatahaʻanga ʻe niʻihi ke nau totongi ʻa e polokalama Zoom ke fakaʻatā ʻa e kotoa ʻo e fakatahaʻangá ke maʻu ʻa e ngaahi fakatahá. ʻI he taimí ni, ʻoku mau maʻu ʻa e polokalama Zoom koeʻuhi ko e tokoni mei heʻetau kautahá pea ʻoku lava ke kau mai ki ai ʻa e tokolahi. Ko ia ai, ʻoku lava ke mau fakaafeʻi ʻa e niʻihi kehé ki he ngaahi fakatahá ʻo ʻikai hano fakangatangata.”

ʻOku pehē ʻe Johnson Mwanza, ko ha mātuʻa ʻi he Fakatahaʻanga Ngwerere Tokelau ʻi Lusaka ʻo Semipiá: “Naʻe pehē ʻe he tokolahi ʻo e fanga tokouá mo e fanga tuofāfiné ‘ko e fokotuʻutuʻu ʻa e fakatahaʻangá ki he Zoom ʻoku ʻikai ngata pē ʻi heʻemau ongoʻi ofi ai ki homau fanga tokouá mo e fanga tuofāfiné ka ʻoku mau toe ongoʻi ʻa e ʻofa mo e tokanga mai ʻa Sihová.’”

Ko e polokalama ko ení ʻoku ngāueʻaki ʻe he ngaahi fakatahaʻangá ʻoku totongi ʻaki ia ʻa e paʻanga kuo vaheʻi ki he tokoni fakatamakí. Ko e paʻanga ko ení ʻoku maʻu ia mei he ngaahi tokoni loto-fiefoaki ki he ngāue ʻi māmani lahí. Ko e lahi ʻo e ngaahi tokoni ko ení ʻoku fai ia ʻi he donate.jw.org. Mālō ʻaupito ki hoʻomou ngaahi foaki nima-homó he ko e meʻaʻofa ko iá ʻoku toe ngāueʻaki ia ki he ngaahi ngāue tokoni kehe ʻi māmani lahí.​—2 Kolinitō 8:14.