Fakatamakí ʻOku Ofi ke Ngata

MOFUIKE, tau, honge mo e ngaahi mahaki fakalilifu—ko e ngaahi meʻa ia ʻe niʻihi naʻe muʻaki tala ʻe Sīsū te ne fakaʻilongaʻi e “fakaʻosi ʻo e kuonga” ʻa ia ʻoku tau lolotonga moʻui eni aí. (Mātiu 24:​3, 7, 8; Luke 21:​7, 10, 11) ʻIo, ko e ngaahi meʻa ko iá ʻoku ʻikai ko ha ngāue ia ʻa e ʻOtuá. Ko ia ko Sīsū mo ʻene Tamaí, ʻa e ʻOtua ko Sihová, ʻoku ʻikai haʻana kaunga ki ai.

Ka ʻoku ʻi ai e kaunga ia ʻa e ʻOtuá ki he meʻa ʻoku fakaʻilongaʻi ʻe he ngaahi meʻa naʻe tomuʻa talá, ʻa ia, ko e hoko mai e Puleʻanga ʻo e ʻOtuá—ko ha founga-pule fakahēvani ʻi he malumalu e tataki ʻa Sīsū Kalaisí—pea mo hono fakaʻauha kotoa e faʻahinga ʻa ia ʻoku nau fakafisi ke tali e tuʻunga-hau ʻo Sihová. (Taniela 2:44; 7:​13, 14) Hili iá, ʻe ngaohi leva e māmaní ke hoko ko ha feituʻu melino mo malu, ʻa ia heʻikai ke toe hoko ai ha ilifia ki ha fakatamaki fakanatula. ʻOku ʻuhinga kotoa iá, ʻe fakahoko leva e talaʻofa ʻa e ʻOtuá: “E nofo a hoku kakai i he nofoaga oe melino, bea i he gaahi fale tuu mau, bea i he gaahi mālōlōaga oe fiemalie.”—Aisea 32:​18, PM.

Fakaongo ki he ʻOtua ka ke Moʻui!

ʻI hono fakamatalaʻi ʻi ha kupu ki muʻa ʻi he ngaahi konga ko eni ʻoku fakahokohokó, ko ʻetau ngāue ʻo fakatatau ki he ngaahi fakatokangá ʻoku hangē ia ha fakahaofi moʻuí. ʻI he taimi lahi ʻoku toe ngāueʻaki pē ʻa e tefitoʻi moʻoni ko iá ki he ngaahi fakatokanga mei he ʻOtuá ʻa ia ʻoku hiki ʻi he Tohi Tapú. “Ka ko ia ʻoku fakaongo kiate au,” ʻoku talaʻofa ʻe he ʻOtuá, “te ne nofo nonga, pea te ne ʻatā mei he manavahe ki he kovi.”—Palovepi 1:33.

ʻOku feinga ʻa e Kau Fakamoʻoni ʻa Sihová ke nau fanongo ki he ʻOtuá ʻaki ʻenau lau maʻu pē ʻEne Folofola fakamānavaʻí pea ngāueʻaki ʻene ngaahi akonakí. ʻOku nau fakaafeʻi atu koe ke ke fai ʻa e meʻa tatau. ʻIo, ko kinautolu kotoa pē ʻoku nau talangofua ʻo fanongo kia Sihová te nau ʻataʻatā mei he manavahē ki he kahaʻú pea mo e fakatamaki ʻoku ʻamanaki ke hoko ki he fulikivanú. ʻI hono kehé, ʻoku nau fakatuʻamelie atu ke maʻu ʻa e moʻui taʻengata ʻi he Palataisi he māmaní, pea te nau hoko ai “o nau fakafiemalieʻi akinautolu i hono lahi oe melino.”—Sāme 37:​10, 11, PM.

[Puha ʻi he peesi 8]

FAKANONGA KI HE KAU MAMAHÍ

Kuo mate nai ha niʻihi ʻokú ke ʻofa ai, mahalo pē ʻi ha fakatamaki fakanatula pe ʻi ha tuʻunga fakamamahi kehe? Meimei ko e taʻu ʻe 2000 kuo maliu atú, naʻe mate mutukia ai ʻa e kaumeʻa ofi ko ia ʻo Sīsū ko Lāsalosí. ʻI heʻene ʻilo ení, naʻe ʻalu leva ʻa Sīsū ki he kolo ko ia ʻo Lāsalosí, ko Pētani, ʻo ne fokotuʻu hake ia mei he “mohe” ʻi he maté.—Sione 11:​1-44.

Naʻe fai ʻe Sīsū ʻa e maná ni ʻo ʻikai fakatuʻunga pē ʻi heʻene fakahāhā ʻa e ʻofa kia Lāsalosi pea mo hono fāmilí kae toe hoko foki ko ha meʻa ke fakapapauʻi ai ʻene talaʻofa ko ia ke fokotuʻu hake mei he maté “ʻa e kakai kotoa pe ʻi he ngaahi faʻitoka” lolotonga e taimi ʻe pule mai ai hono Puleʻangá. (Sione 5:​28, 29) ʻIo, ʻi he Palataisi ka hoko maí, ʻe toʻo ai ʻe Sīsū ʻa e ngaahi maumau kotoa pē ʻa ia naʻe kamata mei he angatuʻu ko ia ʻi he ngoue ko ʻĪtení.a—1 Sione 3:8.

[Fakamatala ʻi lalo]

[Puha/Fakatātā ʻi he peesi 9]

LILIU ʻE HA MOFUIKE ʻEKU ʻALUNGA MOʻUÍ

ʻI he 1971, naʻá ku hoko ai ko ha faʻē kei siʻi peá u toe fakaʻamu ke u hoko ko ha tokotaha faiva hiva solo. ʻI he 1957, naʻá ku hiki ai mei hoku feituʻu tupuʻangá, ʻa ia ko Winnipeg, Manitoba, Kānata, ke u ofi ki Hollywood, Kalefōnia, ʻAmelika, ʻi he fakaʻamu ke u tulia ʻa e meʻa ne u manako taha aí, ʻa e mūsiká.

ʻI he faʻahitaʻu māfana ʻe hiva, naʻe fononga mai ai ʻeku fineʻeikí mei Kānata ke sio mai kiate au, ʻa ia ko e taha ia ʻo e Kau Fakamoʻoni ʻa Sihová. Naʻá ne ngāueʻaki ʻa e ngaahi taimi ko iá ke ne talanoa mai ai fekauʻaki mo e Tohi Tapú mo e fakatuipau ko e tohi ia ʻokú ne ʻomai ʻa e faleʻi lelei taha ki he fiefiá mo e moʻui fakafāmilí. Naʻá ku ʻofa ʻi heʻeku fineʻeikí peá u fanongo anga-fakaʻapaʻapa kiate ia. Ka neongo ia, ʻi he taimi kotoa pē naʻá ne foki aí, naʻá ku laku e ʻū tohi naʻá ne ʻomaí, peá u falala pē ʻoku totonu ʻa e ʻalunga moʻui ʻoku ou fouá.

Ka, ʻi ha hengihengi Tūsite ʻi Fepueli ʻo e 1971, naʻe luluʻi ai au ʻou ʻā ʻe ha mofuike ʻa ia naʻe feʻunga hono mālohí mo e 6.6 ʻi he meʻafua mofuiké. Naʻe ʻikai kei ongo telinga ʻene lulú pea toe fuʻu lahi foki. Naʻá ku lele ke vakaiʻi hoku fohá lolotonga ʻeku ilifiá, ka naʻá ku ongoʻi fiemālie he naʻe hao pē ʻi hono kiʻi mohengá. ʻI he ʻosi ko ia e lulu ʻa e mofuiké naʻe movete ʻi he falikí ʻa e ngaahi meʻa sioʻata mafahifahí pea mo e meʻa kotoa naʻe faʻo ʻi he ʻū kōpaté. Ko e vai mei he vai kaukaú naʻe hake ia ki tuʻa ʻo faai atu ki he toumuí. Neongo naʻe hao pē hoku kiʻi fāmilí, naʻe ʻikai lava ke u toe mohe.

Naʻe faʻa lea ʻeku fineʻeikí fekauʻaki mo e “kuonga fakamui,” ʻa ia ko hano konga tefito e “ngaahi fuʻu mofuike.” (2 Timote 3:1; Luke 21:​7-11) Naʻá ne toe foki mai ʻi he faʻahitaʻu māfana ko iá ʻi heʻene ʻeva fakataʻu maí ka naʻe ʻikai ke haʻu ia mo ha tohi Fakatohitapu. Naʻá ne fakakaukau nai ʻoku ʻikai ke u mahuʻingaʻia he ko e taʻu ē ʻe hiva ʻene faifakamoʻoni kiate au mo e ʻikai pē hano ola. He maʻuhala lahi moʻoni ē ko ia! Ko e mōmeniti pē ʻene aʻu maí kuó u haʻaki fuʻu atu e ngaahi fehuʻí. Ne fakafokifā pē ʻa e hoko e hivá ia mo e kumi ke ongoongoá ʻo hōloa atu hono mahuʻingá.

ʻI he uike tatau pē naʻá ku maʻu ai e ngaahi fakataha faka-Kalisitiané fakataha mo ʻeku fineʻeikí ʻi he Fale Fakatahaʻanga he feituʻú, pea hili iá naʻe tātātaha pē ʻeku liʻaki fakatahá. Naʻá ne fokotuʻutuʻu leva ke fai ha ako Tohi Tapu mo au ʻi ʻapi. Naʻá ku papitaiso ʻi he 1973, pea ʻi he lolotongá ni ʻoku fakaʻavalisi ki he houa ʻe 70 ʻoku ou fakamoleki ʻi he māhina taki taha ki hono talaki atu e ongoongolelei ʻo e Puleʻanga ʻo e ʻOtuá ki he niʻihi kehé. (Mātiu 24:14) ʻIo, ʻi he ʻikai ke movete ʻeku tui ki he ʻOtuá, naʻe tokoniʻi au ʻe ha mofuike ke langa hake ʻeku tuí.—Fakamatala fai ʻe Colleen Esparza.