ʻOku ʻi Ai Haʻo Ngaahi Taumuʻa Ala Aʻusia?

● Ko e hā ʻokú ke fiemaʻu ʻi he moʻuí? ʻOku ʻi ai ha ngaahi meʻa ʻoku ʻuhinga lelei ke ke ʻamanekina, pe ʻokú ke fakaʻānaua fekauʻaki mo e ngaahi meʻa ʻe mahulu atu nai ia mei hoʻo malavá pe ko e ngaahi meʻa ʻokú ke maʻú? Ko ha tokotaha naʻá ne siofi fakalelei ʻa e natula ʻo e tangatá naʻá ne ʻomai ʻa e faleʻi fakapotopoto ko ení: “ʻOku lelei ange ke fiemālie ʻi he meʻa ʻoku ʻi muʻa ʻi ho matá ʻi he tuku ke faʻiteliha ʻa e holí; ko e koto ngeʻesi mo eni foki pea ko e tuli matangi.”—Koheleti 6:9, The New English Bible.

Ko e “meʻa ʻoku ʻi muʻa ʻi [hotau] matá” ʻoku ʻuhinga iá ki hotau ngaahi tuʻunga mo e ngaahi meʻa ʻe ala aʻusia lolotongá. Ko e meʻa ke ʻiloʻí, ʻoku ʻikai ha meʻa ʻe hala ʻi he feinga ke fakaleleiʻi ʻa ʻetau moʻuí. Kae kehe, ko e poini ʻoku ʻomai ʻe he Tohi Tapú, ko e potó ʻoku ʻikai ke ne tuli ki ha ngaahi taumuʻa ʻe taʻealaaʻusia. Ko e ngaahi taumuʻá ni nai ki he ongoongoá, koloá, ko e hoa mali lelei, pe ko e moʻui lelei haohaoa.

ʻIkai ko ia pē, ko e faʻahinga ʻoku nau maʻu ha taumuʻa pau, hangē ko e koloaʻia fakamatelié, te nau kei havala pē nai ke maʻu ha meʻa lahi ange. “Ko ia ʻoku manako siliva ʻoku ʻikai te ne makona ʻi he siliva; pea ko ia ʻoku manako ki he fuʻufuʻunga meʻa, ʻoku ʻikai hano fua: ko e muna mo ia foki,” ko e fakahaaʻi moʻoni ia ʻe he Tohi Tapú. (Koheleti 5:10) Ko ia ai, ko e kau poto fakalaumālié, ʻoku nau feinga ke fiemālie pē ʻi he meʻa ʻoku nau maʻú, ʻa e “meʻa ʻoku ʻi muʻa ʻi [honau] matá.” ʻIo, ʻoku nau ʻiloʻi ʻa e foʻi moʻoni ko ení: “Talaʻehai naʻa tau haʻu mo kitautolu ha meʻa ki mamani, koeʻuhi foki ʻe ʻikai te tau lava ke ʻalu mo kitautolu ha momoʻi meʻa.”—1 Timote 6:7.

Ko e natula fakaetangatá ko e tuʻunga ia ʻa ia ʻe hoko mai ai ʻa e fiefia lahi tahá ki he faʻahinga ʻoku nau fakalato ʻenau ngaahi fiemaʻu fakalaumālié. (Mātiu 5:3) ʻE lava fēfē ke tau fai iá? Naʻe pehē ʻe Sīsū Kalaisi: “Oku ikai moʻui ʻa e tangata ʻi he ma pe, ka ʻi he ngāhi folofola kotoa pe ʻoku ʻalu atu mei he fofonga ʻo e ʻOtua.” (Mātiu 4:4) Ko e ngaahi folofola mahuʻinga ko iá ʻoku maʻu ia ʻi he Tohi Tapú, pea ʻoku ʻatā ia ke maʻu.

Ko e folofola pehē ʻe taha ʻoku maʻu ia ʻi he Sāme 37:4. ʻOku pehē hono laú: “Tuʻu foki ʻi he ʻEiki hoʻo manako, pea te ne ʻatu ʻa e ngaahi kole ʻa ho loto.” ʻI hono tuʻunga ko e ʻOtua Māfimafi-Aoniú, ʻe foaki ʻe Sihova ki heʻene kau lotu faitōnungá ʻa e ngaahi meʻa heʻikai lava ke foaki ʻe ha tangata: ko e moʻui lelei haohaoa, maluʻanga fakamatelie, mo e moʻui taʻengata ʻi Palataisi ʻi he māmaní. (Luke 23:43; Fakahā 21:3, 4) Ko e falala ki he ngaahi lea ko ení ʻoku ʻikai pehē ʻe taʻealaaʻusia.