Vakai Ki He Māmaní
Ko e fakaʻavalisi ʻo e tokolahi ʻo e kakai ʻoku ngāue ki ai ʻa e toketā taki taha ʻi Tenisaniá ko e toko 64,000.—THE CITIZEN, TENISANIA.
‘ʻOku ʻi ai ʻa e kakai masiva ʻikai siʻi hifo ʻi he 1 pilioná ʻoku nau moʻui fiekaia hokohoko, pea ko e Taumuʻa Fakalakalaka Mileniume ʻa e Ngaahi Puleʻanga Fakatahatahá ʻo hono mātuʻaki fakasiʻisiʻi ʻa e tokolahi ʻo e fiekaia ʻi he māmaní ʻi he 2015 heʻikai ke aʻusia.’ —SCIENCE, ʻAMELIKA.
“Ko e ngaahi kautaha faʻu naunau tau lahi taha ʻe 100 ʻi he māmaní” naʻa nau lēsisita ʻa e $385 piliona ʻi hono fakatau atú ʻi he 2008, ko ha tupu lahi ʻaki ia ʻa e $39 piliona mei he 2007.—AKOʻANGA FAKAVAHAʻAPULEʻANGA ʻI HE FAKATOTOLO KI HE MELINÓ ʻI STOCKHOLM, SUĒTENI.
ʻOku Fuʻu Siʻisiʻi ʻa e Siemú?
“Ko ʻemau fakatotoló ʻoku fakahuʻunga ai ko e ngaahi ʻātakai maʻa lahi fau mo fakahaisini lahi fau mei he kei siʻí ʻoku tokoni nai ia ki he lahi ange ʻa hono maʻu ʻe he kulokulá ʻi he hoko ko ha tokotaha lahí, ʻa ia ʻoku iku ai ki he fakautuutu ʻa e ngaahi mahaki fakatuʻutāmaki lahi,” ko e fakamatala ia ʻa Thomas McDade, ko e palōfesa māʻolunga ʻi he ʻUnivēsiti Northwestern, ʻi ʻIlinoi, ʻAmelika. ʻI ha fakatotolo naʻe fakahoa ai ʻa e fānau Filipainí mo e fānau ʻAmeliká, naʻe ʻiloʻi ai ʻi he fakalūkufuá, naʻe puke ʻa e kau Filipainí ʻi he ngaahi mahaki pipihi lahi ange ʻi heʻenau kei siʻí. Neongo ia, ʻi he kehe mei he meʻa naʻe ʻamanekiná, ko e tamaiki lalahi Filipainí naʻa nau maʻu ʻa e lēvolo toto naʻe māʻulalo lahi ange ai ʻa e polotini C-fakafepakí, ʻa ia koe toto ko iá ʻoku ʻalu ia ki ʻolunga ʻi hono maʻu ʻe he kulokulá. Ko e hā ʻa e fakamulitukú? Ko e eʻa lahi ange ʻi he kei siʻí ki he pekitīlia anga-mahení ʻoku maluʻi moʻoni nai ai ʻa e kakai lalahí mei he ngaahi mahaki fakatupu maté.
Mole ʻa e ʻĒfika Fakaengāué
ʻOku puputuʻu ʻa e kau pule ngāue Finilani tokolahi ʻi ha toʻutangata foʻou ʻo e kau kumi ngāue ʻoku hā ngali ʻoku ʻikai ke ʻi ai haʻanau ʻilo ʻe taha fekauʻaki mo e ngaahi pōtoʻi fakasōsiale ʻoku fiemaʻu ke maʻu ai ha ngāué. “Ko e kau ngāue foʻoú ʻoku nau hehema ke fakaʻuhingaʻi ʻoku ngaofengofua ʻa e ngaahi houa ngāué pea fakakaukau ʻe lava ke nau ngāue pea tuku ʻi ha taimi pē ʻoku nau loto ki ai,” ko e lau ia ʻa Anne Mikkola, ko ha tokotaha fakalele falekai, ʻi ha fakaʻekeʻeke naʻe fai ʻe he kautaha sēvesi fakamafolalea fakafonua ʻa Finilaní. Ko e ngaahi tuʻutuʻuni ki he ʻulungaangá mo e valá ʻoku toe hoko ai ha ngaahi faingataʻa. Tautefito ʻi he sekitoa sēvesí, ʻoku faʻa pau ai ke fakahaaʻi ʻe he kau pule ngāué ʻa e faʻahinga teuteu ʻoku ʻikai feʻungamālié. ʻOku toe hā ʻa e ʻikai lava ke fakafaikehekeheʻi ʻa e ngāué mei he meʻa fakafoʻituituí ʻi he taimi ʻoku haʻu ai ki he ngāueʻangá ko e ʻeva pē ʻa e ngaahi kaungāmeʻa ʻo e kau ngāue foʻoú.
“Fakaleleiʻi” ʻa e Vākovi ʻi he Konga Fonuá
Ko ha vākovi fuoloa ʻi he vahaʻa ʻo Pengikolotesi mo ʻInitia ʻi ha kiʻi motu ʻi he Matāfanga ʻo Pengalí kuo fakaleleiʻi ia—ʻe ha māʻolunga ange ʻa e fukahi tahí. Ko e feituʻu ʻikai nofoʻí, ʻa ia ʻoku ʻiloa ʻi he kau ʻInitiá ko e Motu New Moore pea ki he kau Pengikolotesí ko e Motu South Talpatti, naʻe ʻikai ʻaupito toe māʻolunga ʻaki ia ʻa e fute ʻe ono (mita ʻe 1.9) mei he fukahi tahí. Kae kehe, ʻoku fakahaaʻi ʻe he ngaahi ʻata mei he satelaité kuo hanga ʻe he tahí ʻo fakangotoʻi ia ki muí ni. “Ko e meʻa naʻe ʻikai lava ke fakahoko ʻe he ongo fonua ko ení ʻi he ngaahi taʻu ʻo e tālangá kuo fakaleleiʻi ia ʻe he fakaʻau ke mafana ange ʻa e foʻi kolopé,” ko e lau ia ʻa Palōfesa Sugata Hazra, ʻo e Akoʻanga ʻUnivēsiti ʻo Calcutta ʻi Jadavpur ʻo e Ngaahi Fakatotolo ki ʻŌsení.