Ko ha Mole Ne ʻIkai Meimei Lava ke Makātakiʻi
Ko Nicolle ko ha kiʻi taʻahine moʻui lelei. Ka ʻi he efiafi ʻe taha naʻá ne pehē ai ʻoku langa ʻa hono ʻulú, pea naʻe ʻave ia ʻe heʻene ongo mātuʻá ki he falemahakí. ʻI he efiafi hono hokó, lolotonga hono kei siví, naʻe tuʻu ai e tā e mafu ʻo Nicolle. Naʻe fakahaaʻi ʻi ha toe ngaahi sivi naʻá ne maʻu ha mahaki pekitīlia hāhāmolofia ʻa ia ne mafola ki hono maʻamaʻá, kofuuá, mo hono mafú. ʻI loto ʻi ha houa ʻe 48, naʻe mate ai ʻa Nicolle. Naʻá ne taʻu tolu pē.
KO E mate ha tokotaha ʻofeina ʻa e taha ʻo e ngaahi hokosia fakamamahi taha ʻoku lava ke fehangahangai mo e tangatá. ʻI he taimi ʻe niʻihi, ko e molé ʻe hā ngali ʻikai nai lava ke makātakiʻi. “ʻOku ou ongoʻi ʻaupito e puli ʻa Nicolle,” ko e lau ia ʻa Isabelle, ko e faʻē ʻa e taʻahiné. “ʻOku ou ongoʻi e ʻikai ke ne fāʻofua maí, ko hono nanamú, ko ʻene anga-ʻofá. ʻOku ou ongoʻi e ʻikai te ne toe ʻomai kiate au ha matalaʻiʻakau he ʻaho kotoa pē. ʻOku ʻi heʻeku fakakaukaú maʻu pē ʻa Nicolle.”
Kuo mole meiate koe foki ha tokotaha ʻofeina—ko ha kiʻi leka, ko ha hoa mali, ko ha tokoua pe tuongaʻane, ko ha mātuʻa, pe ko ha kaumeʻa ofi? Kapau ko ia, ʻe lava fēfē ke ke fekuki mo hoʻo mamahí?