FEKUKI MO E HIKIHIKI ʻA E TOTONGI ʻO E KOLOÁ

Hoko ʻo Fiemālie

Ko e kakai ʻoku loto-toponó ʻoku nau fiemālie ʻi heʻenau moʻuí. Pea ʻi he liliu honau tuʻungá, ʻoku nau feʻunuʻaki ʻenau founga moʻuí ke fakatatau mo e meʻa ʻoku nau maʻú.

ʻUHINGA ʻOKU MAHUʻINGA AÍ

Naʻe pehē ʻe ha toketā ki he ʻatamaí ko Jessica Koehler ko e kakai ʻoku nau fiemālie peé ʻoku nau maʻu ha vakai pau ange. Naʻá ne toe pehē ʻoku siʻisiʻi ange ʻenau meheka ki he niʻihi kehé. Ko ia ai, ʻoku ʻikai ke tau ofo ʻi he faʻa fiefia ange ʻa e kakai ʻoku fiemālié pea siʻisiʻi ʻenau loto-mafasiá. Ko hono moʻoní, ko e niʻihi ʻo e kakai fiefia tahá ʻoku ʻikai ke nau maʻu meʻa. ʻOku tautefito ʻa e moʻoni ení ʻi he faʻahinga ʻoku nau fakamahuʻingaʻi lahi ʻa e ngaahi meʻa ʻoku ʻikai lava ʻe he paʻangá ʻo fakatau maí, hangē ko e fiefia ʻi he feohi mo e fāmilí mo e kaungāmeʻá.

“ʻI hono maʻu ha meʻakai mo ha valá, te tau fiemālie pē ʻi he ngaahi meʻá ni.”—1 Tīmote 6:8.

MEʻA ʻE LAVA KE KE FAÍ

Fakaʻehiʻehi mei hono fai ha fakahoa. Kapau te ke fakahoa hoʻo founga moʻui faingofuá ki he moʻui tuʻumālie ʻoku hā ngali maʻu ʻe ha taha, te ke hoko ai ʻo taʻefiemālie pea aʻu ʻo meheka kiate ia. ʻIkai ko ia pē, ʻoku ʻikai nai ke faʻa moʻoni ʻa e meʻa ʻokú ke sio ki aí. Ko e niʻihi ʻoku nau maʻu ʻa e ngaahi koloa lahí ʻoku nau tā moʻua nai. Ko Nicole, ʻoku nofo ʻi Senikolo, ʻokú ne pehē: “ʻOku ʻikai fiemaʻu ia ke u maʻu ha meʻa lahi ka u toki fiefia. Kapau ʻoku ou fiemālie, te u fiefia pē au neongo kapau ʻoku lahi ange ʻa e meʻa ʻoku maʻu ʻe he niʻihi kehé ʻiate au.”

ʻAhiʻahiʻi eni: Fakaʻehiʻehi mei he sio ʻi he ngaahi tuʻuaki pe ngaahi pousi ʻi he mītia fakasōsialé ʻoku tō ʻenau fakamamafá ki he moʻui tuʻumālie ʻa e niʻihi kehé.

“Naʻa mo hono maʻu ʻe ha taha ha meʻa lahi, ʻoku ʻikai fakatuʻunga ʻene moʻuí ʻi he ngaahi meʻa ʻokú ne maʻú.”—Luke 12:15.

Hoko ʻo houngaʻia. Ko e kakai houngaʻiá ʻoku ngalingali ange ke nau hoko ʻo fiemālie pea siʻisiʻi ʻenau hehema ke ongoʻi ʻoku nau fiemaʻu pe tuha mo ha meʻa lahi ange. Ko Roberton, mei Haiti, ʻokú ne pehē: “ʻOku ou vaheʻi ʻa e taimi ke fakakaukauloto ki he ngaahi ngāue anga-lelei kuo fakahāhā mai ʻe he niʻihi kehé kiate au mo hoku fāmilí. ʻOku ou tala ange leva ki he kakai ko iá ʻa e lahi ʻo ʻeku houngaʻia ʻi he meʻa kuo nau faí. ʻOku ou toe akoʻi ʻeku kiʻi tamasiʻi taʻu valú ke lea fakamālō ki he meʻa kotoa ʻokú ne maʻú.”

ʻAhiʻahiʻi eni: ʻAi ha tohi ʻo hiki ai ʻi he ʻaho taki taha ʻa e meʻa ʻokú ke houngaʻia aí. Mahalo ko hoʻo maʻu ha moʻui leleí, ko ha fāmili ofi, kaungāmeʻa moʻoni pe naʻa mo e tāitō hifo pē ʻa e laʻaá.

“Ko e tokotaha ʻokú ne maʻu ha loto-fiefiá ʻoku kai kātoanga hokohoko.”—Palōveepi 15:15.

ʻI he taimi ʻe niʻihi, ʻoku tau fāinga kotoa ke fiemālie pē ʻi he meʻa ʻoku tau maʻú. Ka ʻoku tuha ia mo e ngaahi feingá! ʻI heʻetau fili ke hoko ʻo fiemālié, ʻoku tau toe fili ai ke fiefia—ko ha toe ʻulungaanga ʻoku ʻikai lava ʻe he paʻangá ʻo fakatau mai.