Ikunaʻi ʻa e Fakalielia-Toko-Tahá

Ko e fakalielia-toko-tahá ʻa ia ko ha tōʻonga ʻikai lelei fakalaumālié, ʻoku hūhū ai ʻa e fakakaukau ʻokú ne fakaʻaiʻai ʻa e fakatōliʻa-kitá pea ʻuliʻi ai ʻa e ʻatamaí.a Ko ha tokotaha fakalielia-toko-taha ʻokú ne toe hoko nai ʻo vakai ki he niʻihi kehé ko e faʻahinga pē ke fai ʻa e fehokotaki fakasino mo kinautolu—ko e ngaahi meʻangāue kinautolu ke fakatōliʻa ʻaki ʻa e fie fehokotaki fakasinó. Ko e fehokotaki fakasinó ʻoku hoko ia ʻo mavahe mei he ʻofá pea tuku hifo ai ki ha faʻahinga fakafeangai ko e fai pē ke maʻu ha fiefia fakataimi pea fakafiemālieʻi ai ʻa e fie fehokotaki fakasinó. Ka ko e fakafiemālie ko iá ʻoku fakataimi pē. Ko hono moʻoní, ʻi he ʻikai ʻai ke mate ʻa e ngaahi kupu ʻo e sinó ʻoku fekauʻaki mo e ‘feʻauaki, angaʻuli, mo e havala [taʻetotonú],’ ʻoku hanga ʻe he fakalielia-toko-tahá ʻo ai ke moʻui ia.—Kolose 3:5.

Naʻe tohi ʻe he ʻapositolo ko Paulá: “Siʻoku ʻofaʻanga . . . tau fakamaʻa kitautolu mei he ʻuli kotoa pe ʻo e kakano mo e loto, ʻo tau fakakakato ʻetau maʻoniʻoni ʻi he ʻapasia ki he ʻOtua.” (2 Kolinito 6:19 [2Ko 7:1, PM]) Kapau ʻoku faingataʻa ke ke fai ki he ngaahi leá ni, ʻoua ʻe siva hoʻo ʻamanakí. Ko Sihová ʻoku mateuteu maʻu pē ke “fakamolemole” pea mo tokoni. (Sāme 86:5; Luke 11:9-13) Ko e moʻoni, ko ho loto fakahalaia-kitá mo hoʻo ngaahi feinga ke siʻaki ʻa e tōʻonga ko iá—neongo ʻa e tō ʻi he taimi ki he taimí—ʻoku fakahaaʻi ai ha fakakaukau lelei. Manatuʻi foki, “ʻoku lahi ʻa e ʻOtua ʻi hotau loto, pea ʻoku ne meaʻi ʻa e meʻa kotoa pe.” (1 Sione 3:20) ʻOku vakai mai ʻa e ʻOtuá ʻo fakalaka ʻi heʻetau ngaahi angahalá; ʻokú ne vakai mai ki he tokotahá kakato. Ko e ʻilo ko ení ʻoku hoko ai ʻo ne malava ke fanongo mai fakataha mo e kaungāongoʻi ki heʻetau ngaahi kole fakamātoato ki he mēsí. Ko ia ʻoua ʻaupito ʻe foʻi ʻi he hanga ki he ʻOtuá ʻi he lotu anga-fakatōkilalo mo fakamātoato, ʻo hangē ha kiʻi leka ʻoku ʻalu ki heʻene tamaí ʻi he taimi ʻo e faingataʻá. ʻE tāpuakiʻi koe ʻe Sihova ʻaki ha konisēnisi maʻa. (Sāme 51:1-12, 17; Aisea 1:18) Ko e moʻoni, ʻoku fiemaʻu ke ke fou ʻi he ngaahi sitepu pau ʻo fehoanaki mo hoʻo ngaahi lotú. Ko e fakatātaá, te ke feinga ke fakaʻehiʻehi mei he ngaahi meʻa fakalielia kotoa pē pea pehē ki he feohi koví.b

Kapau ʻoku kei hokohoko atu pē ʻa hoʻo palopalema ʻi he fakalielia-toko-tahá, kātaki ʻo talanoa fekauʻaki mo e meʻá ni mo ha mātuʻa Kalisitiane tauhi fānau pe ko ha kaumeʻa matuʻotuʻa fakalaumālie mo tokanga.c—Palovepi 1:8, 9; 1 Tesalonaika 5:14; Taitusi 2:3-5.

[Fakamatala ʻi lalo]