Talatupuʻa 3: ʻOku ʻAlu ʻa e Kakai Lelei Kotoa Pē ki Hēvani
Ko e hā e tupuʻanga ʻo e talatupuʻá? Hili e mate ʻa e kau ʻapositolo ʻa Sīsuú, ʻi he kamataʻanga ʻo e senituli hono ua T.S., naʻe hoko ai ʻo tuʻu-ki-muʻa ʻa e “Ngaahi Tamai ʻo e muʻaki Siasí.” (Ko ha liliu hangatonu ʻo e lakanga tukufakaholó naʻe ngāueʻaki ʻi he lea lahi ki he muʻaki kau hiki-tohi ko eni ʻa e siasí.) ʻI hono fakamatalaʻi ʻenau akonakí, ʻoku pehē ʻe he New Catholic Encyclopedia (2003), Voliume 6, peesi 687: “Ko e akonaki tefitó ko e pehē ko ia ʻoku foaki ʻa e fiefia kakato fakahēvani ki he laumālie ʻoku ʻikai hano sino ʻi he hili pē ha fakamaʻa ʻoku fiemaʻu ʻi he ʻosi ʻa e maté.”
Ko e hā e lau ʻa e Tohi Tapú? “Fiefia ē ka ko e kau anga-maluú, he te nau maʻu ʻa e māmaní.”—Mātiu 5:5, NW.
Neongo naʻe palōmesi ʻa Sīsū ki heʻene kau ākongá te ne “teuteu ha potu” moʻonautolu ʻi hēvani, naʻá ne fakahaaʻi ʻoku ʻikai ke ʻalu kotoa ki ai ʻa e kau māʻoniʻoní. (Sione 3:13; 14:2, 3) ʻIkai naʻá ne lotu ke fakahoko ʻa e finangalo ʻo e ʻOtuá “hange ko ia ʻi he langi ke pehe foki ʻi māmani”? (Mātiu 6:9, 10) ʻI hono moʻoní, ko e taha ʻi he feituʻu ʻe ua ʻoku fakatatali mai ki he kau māʻoniʻoní. Ko ha tokosiʻi te nau pule ʻi hēvani fakataha mo Kalaisi, ka ko e tokolahi tahá te nau moʻui taʻengata ʻi māmani.—Fakahā 5:10.
ʻI he faai mai ʻa e taimí, naʻe liliu ʻa e fakakaukau ʻa e muʻaki siasí ki hono ngafa tonu ʻi he māmaní. Ko e hā hono ikuʻangá? “Ko e siasi kuo fokotuʻú naʻá ne fetongi ʻi he tuʻunga lahi ʻa e Puleʻanga ʻo e ʻOtuá kuo ʻamanekiná,” ko e fakamatala ia ʻa e New Encyclopædia Britannica. Naʻe kamata fokotuʻu maʻu ʻe he siasí ʻa hono mālohí ʻaki ʻene hoko ʻo kau ʻi he politikí, ʻo tukunoaʻi ʻa e fakamatala mahino ʻa Sīsū ko hono kau muimuí heʻikai te nau “ʻo māmani.” (Sione 15:19; 17:14-16; 18:36) ʻI he tākiekina ʻa ʻEmipola Konisitanitaine ʻo Lomá, naʻe fakangaloku ai ʻe he siasí ʻa e niʻihi ʻo ʻene tuí, ʻa ia ko e taha ai ʻoku fekauʻaki ia mo e natula moʻoni ʻo e ʻOtuá.
Fakafehoanaki ʻa e ngaahi veesi Tohi Tapú ko ení: Sāme 37:10, 11, 29; Sione 17:3; 2 Timote 2:11, 12
MOʻONIʻI MEʻA:
Ko e tokolahi taha ʻo e kakai leleí te nau moʻui taʻengata ʻi māmani—ʻikai ʻi hēvani
[Fakatātā ʻi he peesi 6]
[Fakatātā ʻi he peesi 6]
[Maʻuʻanga Tā ʻi he peesi 6]
Art Resource, NY