ʻOkú Ke Manatuʻi?
Kuó ke houngaʻia ʻi hono lau ʻa e ngaahi ʻīsiu fakamuimui ʻo e Taua Leʻo? Sio angé pe ʻe lava ke ke tali ʻa e ngaahi fehuʻi ko ení:
• Ko e hā ne pau ke pekia ai ʻa e Mīsaiá?
Ko e pekia ʻa Sīsuú naʻe fakamoʻoniʻi ai ʻe lava ke tauhi maʻu ʻe ha tangata haohaoa ʻa e anga-līʻoa fakaʻotuá neongo ʻa e ngaahi ʻahiʻahi kakaha tahá. Pehē foki, naʻá ne totongi ʻa e tautea ki he angahala naʻe maʻu tukufakaholo ʻe he fānau ʻa ʻĀtamá, ʻo fakaʻatā ai ʻa e hala ki he moʻui taʻengatá.—12/15, peesi 22-23.
• ʻOku ʻalu ʻa e kakai lelei kotoa pē ki hēvani?
Neongo naʻe palōmesi ʻa Sīsū ki heʻene kau ākongá te ne “teuteu ha potu” moʻonautolu ʻi hēvani, naʻá ne fakahaaʻi ʻoku ʻikai ke ʻalu kotoa ki ai ʻa e kau māʻoniʻoní. (Sione 3:13; 14:2, 3) ʻIkai naʻá ne lotu ke fakahoko ʻa e finangalo ʻo e ʻOtuá “hange ko ia ʻi he langi ke pehe foki ʻi māmani”? (Mātiu 6:9, 10) ʻI hono moʻoní, ko e taha ʻi he feituʻu ʻe ua ʻoku fakatatali mai ki he kau māʻoniʻoní. Ko ha tokosiʻi te nau pule ʻi hēvani fakataha mo Kalaisi, ka ko e tokolahi tahá te nau moʻui taʻengata ʻi māmani.—Fakahā 5:10.—1/1, peesi 6.
• Ko e hā ʻoku kau ʻi he fetuʻutaki mohu ʻuhinga mo e fānaú?
ʻI he ʻikai talanoa pē kia kinautolú, ʻoku kau ai ʻa hono ʻeke ʻa e ngaahi fehuʻi mo e fanongo anga-kātaki ki heʻenau talí. Kuo ʻiloʻi ʻe he tokolahi ʻoku maʻu ʻi he taimi kaí ʻa e ngaahi faingamālie lelei ki he fetuʻutakí.—1/15, peesi 18-19.
• ʻI he tuʻunga fē ʻe toe fakakaukauʻi nai ai ha toe papitaiso tuʻo uá?
Ko e tuʻungá ia kapau naʻe fai fakapulipuli ai ʻe ha taha ha meʻa pe kau ʻi ha tōʻonga ʻe lava ke iku atu ki hano tuʻusi kapau naʻá ne ʻosi papitaiso moʻoni.—2/15, peesi 22.
• Ko Sīsū ʻa e ʻĀngelo-Pule ko Maikelí?
Ko hono ʻai mahinó, ko e talí ko e ʻio. ʻOku ui ʻi he Siutasi veesi 9 ʻa Maikeli “ko e angelo-pule.” Ko e foʻi lea tānaki mei mui ko e “pule” ʻoku ʻuhinga iá ko e “tuʻu-ki-muʻa” pe “māʻolunga taha,” pea ko e foʻi lea “angelo-pule” ʻoku ʻikai ʻaupito ngāueʻaki ia ʻi he faʻunga palulalí ʻi he Tohi Tapú. Ko e foʻi veesi kehe pē taha ʻa ia ʻoku lave ai ki ha ʻāngelo-pulé ʻoku ʻi he 1 Tesalonaika 4:16, ʻa ia ʻoku fakamatalaʻi ai ʻe Paula ʻa Sīsū kuo toetuʻú, ʻo pehē: “ʻE haʻele mei he langi ʻa e ʻEiki [Sīsū] ʻe ia, pea ai ha vakavakaō, ʻa e angi ʻa ha angelo-pule, mo e ifi ʻa e talupite ʻa e ʻOtua.” Ko ia ʻoku fakapapauʻi heni ʻa Sīsū Kalaisi tonu ko e ʻāngelo-pule pe ʻāngelo māʻolunga tahá.—4/1, peesi 19.
• ʻI he pealapeli ʻa Sīsū ki he uité mo e teá, ko e hā ʻoku fakatātaaʻi ʻe he tūtuuʻi, pe tō ʻo e tenga leleí?
Ko e foha ʻo e tangatá ʻa Sīsū, naʻá ne teuteuʻi ʻa e kelekelé lolotonga ʻene ngāue fakafaifekau ʻi he māmaní. Mei he Penitekosi ʻo e 33 T.S. ʻo faai mai ai, naʻe tūtuuʻi ʻa e tenga leleí ʻi he taimi naʻe pani ai ʻa e kau Kalisitiané ʻo nau hoko ko e ngaahi foha ʻo e ʻOtuá, ko e ngaahi foha ʻo e Puleʻangá.—3/15, peesi 20.
• ʻOku anga-fēfē hono ʻomai ʻa e uite fakaefakatātā ki he feleoko ʻo Sihová ʻi he pealapeli ʻa Sīsuú? (Mt. 13:30)
Ko hono fakahokó kuo fakalaka mai ia ʻi ha vahaʻa taimi lolotonga ʻa e fakaʻosiʻosi ʻo e fokotuʻutuʻu ʻo e ngaahi meʻá. Ko e ngaahi foha pani ʻo e Puleʻangá, ʻa e uite fakaefakatātaá, ʻoku ʻomai kinautolu ki he feleoko ʻo Sihová ʻi he taimi ʻoku ʻomai ai kinautolu ki he fakatahaʻanga Kalisitiané kuo toe fokotuʻú pe ʻi he taimi ʻoku nau maʻu ai honau pale fakahēvaní.—3/15, peesi 22.
• Ko hai naʻá ne fakapapauʻi ʻa e ʻū tohi fakamoʻoniʻanga ʻoku faʻuʻaki ʻa e Ngaahi Konga Tohi Tapu Faka-Kalisi Kalisitiané?
Naʻe ʻikai ko ha fakataha fakasiasi ia pe fakataha ʻa ha kau taki lotu. ʻI hono kehé, ko e kau Kalisitiane moʻoní, ʻi he malumalu ʻo e tataki ʻa e laumālie māʻoniʻoni ʻo e ʻOtuá, naʻa nau ʻiloʻi ʻa e ʻū tohi naʻe fakamānavaʻi moʻoní. ʻOku fehoanaki eni mo e moʻoniʻi meʻa ko ia ko e taha ʻo e ngaahi meʻaʻofa fakaemana ʻo e laumālié naʻe ʻoange ʻi he muʻaki ngaahi hongofuluʻi taʻu ʻo e fakatahaʻanga Kalisitiané ko e “vavangaʻi [pe ʻiloʻi] ʻo e ngaahi laumalie.” (1 Kol. 12:4, 10)—4/1, peesi 28.