ʻOkú Ke Manatuʻi?

Kuó ke houngaʻia ʻi hono lau ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi ko ení:

• Ko e hā ʻoku lava ke ako ʻe he kau talavou Kalisitiané mei he talangofua ʻa Sīsū lolotonga ʻene kei siʻí?

ʻI ha founga, naʻe maʻu ʻe Sīsū ʻa e tamai ʻe ua—ko Sihova mo Siosefa. ʻI heʻene hoko ko ha talavou ʻi he māmaní, naʻá ne hokohoko atu ʻa e fakamoʻulaloa ki heʻene ongo mātuʻá. (Luke 2:51, 52) Ka, naʻe ʻikai faingofua maʻu pē kia Sīsū ke ne talangofua ki heʻene Tamai fakahēvaní. ʻI he pō ki muʻa ke ne pekiá, naʻe kole ai ʻa Sīsū kia Sihova pe ʻe lava ke liliu ʻa ʻEne fakakaukau fekauʻaki mo e meʻa naʻá Ne loto ke ne faí. (Luke 22:42) Ka naʻe talangofua ʻa Sīsū ki he ʻOtuá neongo naʻe ʻikai ke faingofua.—4/1 peesi 30-31.

• Ko e hā naʻe ʻikai tautea ai ʻe he ʻOtuá ʻa ʻĒlone ʻi heʻene ngaohi ʻa e kiʻi pulu koulá?

Naʻe maumauʻi ʻe ʻĒlone ʻa e lao ʻa e ʻOtuá fekauʻaki mo e tauhi ʻaitolí. (Eki. 20:3-5) Ka, naʻe kole ʻa Mōsese ki he ʻOtuá maʻa ʻĒlone, pea ko ʻene kolé naʻe ʻi ai hono “ʻaonga lahi.” (Sem. 5:16) Ko ʻĒloné naʻe ʻi ai hano lēkooti ʻo e faitōnunga. Pea neongo naʻe fakalotoʻi ʻe he kakaí ʻa ʻĒlone ke ne ngaohi ʻa e kiʻi pulú, naʻá ne fakahaaʻi ki mui naʻe ʻikai ke ne loto tatau mo kinautolu, he naʻá ne kau mo e fānau ʻa Līvaí ʻi he tuʻu he tafaʻaki ʻa Sihová. (Eki. 32:25-29)—5/15, peesi 21.

• Ko e hā ʻa e ngaahi lēsoni ʻoku maʻu mei he ngaahi ngāue ʻa Pita hili e pekia ʻa Sīsuú?

ʻOku pau pē naʻe mamahi ʻa Pita ʻi he fakakaukau atu ki heʻene fakalahi ʻa e mamahi ʻa hono ʻEikí ʻi he ʻaho naʻe hoko ko e ʻaho fakaʻosi ia ʻo ʻEne moʻui ko ha tangatá. Kae kehe, naʻe ʻikai tuku ʻe Pita ke ikuʻi ia ʻe he ʻamanaki-tōnoá. Naʻá ne fakahaaʻi ʻa e tui moʻoni ʻaki ʻene fakatahataha mo hono fanga tokouá neongo ʻa ʻene ongoʻi mafasiá. ʻI he taimi ʻoku mafasia ai ha taha ʻi he mamahí pe ongoʻi fakameʻapangoʻiá, ʻoku fakataueleʻi ai ia ke nofo mavahe ka ʻoku fakatuʻutāmaki. Ko e ʻalunga fakapotopotó ke nofo ofi ki he kaungātuí pea toe maʻu ai ʻa e mālohi fakalaumālie. ʻI he taimi ʻoku tō ai ha sevāniti ʻa e ʻOtuá, ko e meʻa ʻoku mahuʻinga tahá ʻoku ʻikai ko e lahi ʻo ʻene toó ka ko e mālohi ʻo ʻene fakapapau ke toe tuʻu hake, ʻo fakatonutonu ʻa e ngaahi meʻá.—4/1, peesi 24.

• Ko e hā te ne tokoniʻi nai ha Kalisitiane ke fekuki mo ha tono ʻa hono hoá?

Kapau kuo feinga ʻa e hoa tonuhiá ke moʻui ʻo fakatatau ki he ngaahi tefitoʻi moʻoni Fakatohitapú, ʻoku ʻikai ha fiemaʻu ke ne ongoʻi halaia fekauʻaki mo e lavaki ʻa e tokotaha tonó. Manatuʻi, ʻoku ʻafioʻi ʻe he ʻOtuá ʻa hoʻo fiemaʻu ʻa e fakafiemālie mo e fakalototoʻá. Te ne tokonaki mai nai ʻa e fakafiemālie fakafou ʻi he kaungā Kalisitiané.—6/15, peesi 30-31.

• ʻE lava fēfē ke ke fakahūhū ʻi hoʻo fānaú ha manako ʻi he lautohí?

Ko ha ʻātakai ʻofa mo ha faʻifaʻitakiʻanga fakaemātuʻa ʻoku tokoni ia ke fakahūhū ai ha manako ki he lautohí. Pehē foki, ʻai ke ala maʻu ha ʻū tohi. Lau leʻo-lahi. Fakaʻaiʻai ke nau kau ki ai, lāulea ki he meʻa ʻoku mou laú. ʻAi hoʻo fānaú ke nau lautohi atu kiate koe, pea fakaʻaiʻai ke nau fehuʻi.—7/15, peesi 26.

• Tuku kehe ʻa e Tohi Tapú, ko e hā ʻa e fakamoʻoni ʻoku ʻi ai ko Sīsuú ko ha tokotaha moʻoni ia ʻi he hisitōliá?

Ko ha kau faʻu-tohi fakaemāmani tokolahi naʻa nau fai ha lave fakahangatonu kia Sīsū. Naʻe hiki ʻe Koliniusi Tasitusi ko Sīsuú naʻe tāmateʻi ia ʻi he nima ʻo Ponitō Pailató ʻi he pule ʻa Taipilioó. Ko Feleiviasi Siosifasí naʻá ne lave ʻo pehē ko e Taulaʻeiki Lahi ko ʻAnanaiá naʻá ne fakatahatahaʻi ʻa e kau fakamaau ʻo e Sanetalimí ke fakamāuʻi ʻa Sēmisi, ko e tokoua ʻo Sīsuú.—4/1, peesi 15.