Fehuʻi mei he Kau Lautohí
Ko e hā ʻoku totonu ke u fai he taimi ʻoku ʻi ai ai haʻaku fehuʻi fekauʻaki mo ha meʻa ʻoku ou lau he Tohi Tapú pe ʻi he taimi ʻoku ou fiemaʻu ai ha faleʻi fekauʻaki mo ha palopalema fakafoʻituitui?
ʻOku ekinaki mai kia kitautolu taki taha ʻa e Palovepi 2:1-5, ke tau “haʻao” pe fekumi ki he ʻilomeʻá mo e fakahinohinó ʻo hangē ko haʻatau fekumi ki ha “koloa fufu.” ʻOku fakahuʻunga mai heni ʻoku totonu ke tau feinga mālohi ʻi he fekumi ki he ngaahi tali ki heʻetau ngaahi fehuʻi Fakatohitapú pea ki hono maʻu ha ngaahi fakaleleiʻanga ki heʻetau ngaahi palopalema fakafoʻituituí. ʻE lava fēfē ke tau fai eni?
ʻOku ʻanalaiso ʻi he Maʻu ʻAonga mei he Ako Fakafaifekau Fakateokalatí, peesi 33 ki he 38, ʻa e “Founga ʻo Hono Fai ʻa e Fekumí” ʻaki hono ngāueʻaki e ngaahi meʻangāue kuo tokonaki mai ʻe he “tamaioeiki agatonu mo boto.” (Mt. 24:45, PM) ʻOku fakamatalaʻi ʻi he peesi 36 ʻa e founga hono ngāueʻaki ʻa e Watch Tower Publications Index, ʻa ia ko e pulusinga taki taha ʻoku vahevahe ia ki ha ʻiniteki fakakaveinga mo ha ʻiniteki konga Tohi Tapu. ʻOku ʻai ai heni ke malava ʻo fekumi ʻaki ha ngaahi foʻi lea tefito pe ʻaki ha ngaahi veesi Tohi Tapu, ʻa ia te ke maʻu ai ha lisi ʻo ha ngaahi maʻuʻanga fakamatala ke sio ki ai. Anga-kātaki ʻi he fekumi ki he tali pe fakahinohino pau ʻokú ke fiemaʻú. Manatuʻi, ʻokú ke fekumi ki ha “koloa fufu,” ʻa ia ʻoku fiemaʻu ki ai e taimi mo e feinga.
Ko e moʻoni, ʻoku ʻi ai e ngaahi tuʻunga-lea mo e ngaahi konga Tohi Tapu ʻe niʻihi kuo teʻeki ke lave hangatonu ki ai ʻetau ʻū tohí. Pea naʻa mo e taimi kuo mau lave ai ki ha konga Tohi Tapu pau, kuo teʻeki nai te mau fai ha lau ki he fehuʻi pau ko ia ʻoku ʻi hoʻo fakakaukaú. Pehē foki, ko e ngaahi fakamatala Tohi Tapu ʻe niʻihi ʻokú ne langaʻi e ngaahi fehuʻi koeʻuhí ʻoku ʻikai fakalau kotoa mai ʻa e ngaahi fakaikiikí ʻi he Tohi Tapú. Ko ia ai, ʻe ʻikai lava ke tau maʻu leva ʻa e ngaahi tali ki he fehuʻi kotoa pē ʻoku malanga hake. ʻI ha tuʻunga peheé, ʻoku totonu ke tau fakaʻehiʻehi mei he fakamahalo fekauʻaki mo e ngaahi meʻa ʻe ʻikai lava ke talí, naʻa faifai pea tau kau ʻi hono fakakikihiʻi “ʻa e ngaahi fehuʻi ke fai ha fekumi ki ai kae ʻikai ko hono tokonaki mai ha meʻa mei he ʻOtuá ʻoku fekauʻaki mo e tuí.” (1 Tim. 1:4, NW; 2 Tim. 2:23; Tai. 3:9) ʻOku ʻikai malava ʻe he ʻōfisi vaʻá pe ʻuluʻi ʻōfisi ʻi māmaní ke na ʻanalaiso mo tali ʻa e fehuʻi kotoa kuo teʻeki lāulea ki ai ʻi heʻetau ʻū tohí. ʻE lava ke tau fiemālie he ʻoku tokonaki mai ʻe he Tohi Tapú ʻa e fakamatala feʻunga ke tataki kitautolu ʻi he moʻuí ka ʻoku toe toʻo mei ai ʻa e ngaahi fakaikiiki feʻunga koeʻuhi ke fiemaʻu ai kia kitautolu ke maʻu ha tui mālohi ki hono Faʻutohi fakaʻotuá.—Sio ki he peesi 185 ki he187 ʻo e tohi ʻUnuʻunu Ofi kia Sihova.
Fēfē kapau kuó ke fai e meʻa kotoa ʻokú ke malavá ke fekumi ai ki ha meʻa ʻokú ne uesia fakafoʻituitui koe kae teʻeki ai pē ke maʻu e fakahinohino pe fakaleleiʻanga ʻokú ke fiemaʻú? Ongoʻi tauʻatāina ke lea ki ha kaungātui matuʻotuʻa, mahalo ko ha taha ʻo e kau mātuʻa fakalotofonuá. ʻOku nau maʻu ha ʻilo Fakatohitapu lahi ʻaupito pea pehē foki ki he taukei ʻi he moʻui faka-Kalisitiané. Ko ʻenau tokoni mafamafatataú ʻe feʻunga ia tautefito kapau ʻokú ke fiemaʻu faleʻi fekauʻaki mo ha palopalema pe fili fakafoʻituitui, he ʻoku nau ʻilo koe pea ʻoku nau ofi kia koe mo ho tuʻungá. Pea ʻoua ʻaupito naʻa ngalo ke lotu kia Sihova tautefito fekauʻaki mo hoʻo ngaahi hohaʻá pea kole kiate ia ke ne tataki hoʻo fakakaukaú fakafou ʻi hono laumālie māʻoniʻoní, “he ʻoku foaki poto ʻe Sihova . . . mo e fakahinohino.”—Pal. 2:6; Luke 11:13.