Naʻe Talaʻofa ʻe Sīsū ki he Tokotaha Faikoví ha Moʻui ʻi Hēvani?

Naʻe langaʻi ʻa e fehuʻí koeʻuhi naʻe talaʻofa ʻe Sīsū ki he tokotaha faihia naʻe tutuki fakataha mo iá ha moʻui ʻi he kahaʻú ʻi Palataisi. Naʻe pehē ʻe Sīsū: “ʻOku ou tala moʻoni atu kiate koe ʻi he ʻahó ni, Te ke ʻi Palataisi mo au.” (Luke 23:43) Fakatokangaʻi naʻe ʻikai ke pehē ʻe Sīsū ia pe ʻoku ʻi fē ʻa e Palataisi ko iá. Ko ia, naʻe ʻuhinga ʻa Sīsuú ko e tokotaha faikoví ʻe ʻi hēvani mo ia?

ʻUluakí, tau lāulea angé pe ko e tokotaha faikoví naʻá ne aʻusia ʻa e ngaahi tuʻunga taau ki he moʻui fakahēvaní. Ko e faʻahinga ʻoku nau maʻu ʻa e ʻamanaki fakahēvaní kuo nau ʻosi papitaiso ʻi he vai mo e laumālie māʻoniʻoní pea kuo pani ʻe he laumālié ko e kau ākonga ʻa Sīsū. (Sione 3:3, 5) Ko ha toe fiemaʻu ʻe taha ke nau muimui ʻi he ngaahi tuʻunga ʻulungaanga ʻo e ʻOtuá pea fakahāhā ʻa e ngaahi ʻulungaanga hangē ko e faitotonu, anga-tonu mo manavaʻofa. (1 Kolinitō 6:9-11) Kuo pau ke nau nofo mateaki ai pē ki he ʻOtuá mo Kalaisi ʻo aʻu ki he ngataʻanga ʻo ʻenau ʻalunga moʻui ʻi he māmaní. (Luke 22:28-30; 2 Tīmote 2:12) Ko hono toki aʻusia pē ʻa e ngaahi fiemaʻu ko iá ʻoku lava ai ke nau fakahaaʻi ʻoku nau feʻunga ki he toetuʻú pea taau ki he fatongia mafatukituki ʻoku fakatatali mai kiate kinautolu ʻi hēvani, ʻa ia ko e hoko ko e kau taulaʻeiki mo e ngaahi tuʻi fakataha mo Kalaisi ki he faʻahinga ʻo e tangatá ʻi ha taʻu ʻe afe.—Fakahā 20:6.

ʻI hono kehé, ko e tokotaha faikovi ʻi he tafaʻaki ʻo Sīsuú naʻá ne moʻui ko ha tangata faihia pea mate ko ha tangata faihia. (Luke 23:32, 39-41) Ko e moʻoni, naʻá ne fakahāhā ha tōʻonga fakaʻapaʻapa ʻi he taimi naʻá ne lea ai kia Sīsuú: “Manatuʻi au ʻi hoʻo hoko ki ho Puleʻangá.” (Luke 23:42) Neongo ia, naʻe ʻikai hoko ia ko ha ākonga papitaiso pani ʻa Sīsū, pehē ki haʻane fakatupulekina ha lēkooti ʻo ha ʻulungaanga anga-tonu mo kītaki faitōnunga. ʻOku hā ngali ʻuhinga lelei ke talaʻofa ange ʻa Sīsū kiate ia ha tuʻunga-tuʻi fakahēvani fakataha mo ʻene kau ākonga faitōnungá ʻa ia kuo nau fakamoʻoniʻi ʻenau anga-tonú?—Loma 2:6, 7.

Ke fakatātaaʻi: Kapau ʻe kole fakamolemole atu ha tangata koeʻuhi naʻá ne kaihaʻasi hoʻo paʻangá, mahalo te ke fili ke ʻoua ʻe fakaʻilo. Ka te ke falala ki ai ke ne fakalele hoʻo pisinisí pe tokangaʻi ho fāmilí? Te ke tuku ʻa e ngaahi fatongia ko iá ki he faʻahinga pē ʻokú ke mātuʻaki falala ki aí. ʻI he tuʻunga tatau, ko e faʻahinga ko ia kuo ʻoange ki ai ʻa e ʻamanaki ki he moʻui ʻi hēvaní kuo pau ke nau tokonaki ha makatuʻunga fefeka te nau pouaki ʻa e ngaahi tuʻunga māʻoniʻoni ʻa e ʻOtuá ʻi he taimi te nau pule ai ki he faʻahinga ʻo e tangatá. (Fakahā 2:10) Neongo naʻe hā ngali loto-moʻoni ʻa e tangata faikoví ʻi heʻene kole ʻi he miniti fakaʻosí, ʻoku ʻikai ʻomai ai ha makatuʻunga pehē ia.

Ka naʻe ʻikai tala ange ʻe Sīsū ki he tokotaha faikoví te ne ʻi hēvani mo ia ʻi he ʻaho pē ko iá? Naʻe ʻikai ko e meʻá ia, koeʻuhi ko Sīsū tonu naʻe ʻikai ke hū ia ki hēvani ʻi he ʻaho pē ko iá. ʻI hono kehé, naʻá ne “ʻi lolofonua”—ʻi he fonualotó—ʻi he ʻaho ʻe tolu. (Mātiu 12:40; Maʻake 10:34) Naʻa mo e hili ʻene toetuʻú, naʻá ne ʻi he māmaní ʻi he ʻaho ʻe 40 ki muʻa ke ʻalu hake ki hēvaní. (Ngāue 1:3, 9) Ko ia, ko e tokotaha faikoví naʻe ʻikai lava ke ne ʻi hēvani mo Sīsū ʻi he ʻaho pē ko iá.

Ko e Palataisi fē leva naʻe hū ki ai ʻa e tokotaha faikoví? Hili ʻa e toetuʻú, te ne ʻi he Palataisi ʻi māmani ʻa ia ʻe pule mai ki ai ʻa Sīsuú. (Ngāue 24:15; Fakahā 21:3, 4) Ke ako lahi ange fekauʻaki mo e Palataisí mo e ngaahi fiemaʻu ʻa e ʻOtuá, talanoa ki ha taha ʻo e Kau Fakamoʻoni ʻa Sihová.