TALI ʻO E NGAAHI FEHUʻI FAKATOHITAPÚ

Ko e hā ʻoku ui ai ʻa Sīsū ko e ʻAlo ʻo e ʻOtuá?

ʻOku ʻikai ke ʻi ai ha uaifi moʻoni ʻo e ʻOtuá ke ʻi ai haʻane fānau. Ko e Tokotaha-Fakatupu ia ʻo e meʻamoʻui kotoa. Ko e faʻahinga ʻo e tangatá naʻe fakatupu kinautolu ʻi ha founga te nau lava ke faʻifaʻitaki ai ki he ngaahi ʻulungaanga ʻo e ʻOtuá. Ko hono ʻuhinga ia ko e ʻuluaki tangata naʻe fakatupu ʻe he ʻOtuá ʻa ʻĀtama, ʻoku ui “ko e foha ʻo e ʻOtuá.” ʻI he tuʻunga meimei tatau, ʻoku ui ʻa Sīsū ‘ko e ʻAlo ʻo e ʻOtuá’ koeʻuhí naʻe fakatupu ia mo e ngaahi ʻulungaanga ʻo hangē ko ia ko ʻene Tamaí.—Lau ʻa e Luke 3:38; Sione 1:14, 49.

Naʻe fakatupu ʻanefē ʻa Sīsū?

Naʻe fakatupu ʻe he ʻOtuá ʻa Sīsū ki muʻa ʻia ʻĀtama. Ko hono moʻoní, naʻe fakatupu ʻe he ʻOtuá ʻa Sīsū pea ngāueʻaki leva ia ke ne fakatupu ʻa e ngaahi meʻa kehé kotoa, ʻo kau ai ʻa e kau ʻāngeló. Ko e ʻuhinga ia ʻoku ui ai ʻe he Tohi Tapú ʻa Sīsū “ko e ʻuluaki fakatupu ia ʻi he meʻa fakatupu kotoa pē” ʻa e ʻOtuá.—Lau ʻa e Kolose 1:15, 16.

Ki muʻa ke fanauʻi mai ia ʻi Pētelihemá, naʻe moʻui ʻa Sīsū ko ha meʻamoʻui laumālie ʻi hēvani. ʻI he hoko mai ʻa e taimí, naʻe hiki hifo ʻe he ʻOtuá ʻa e moʻui ʻa Sīsuú mei hēvani ki he manava ʻo Melé koeʻuhi ke lava ʻo fanauʻi mai ko ha tangata.—Lau ʻa e Luke 1:30-32; Sione 6:38; 8:23.

Ko e hā naʻe ʻai ai ʻe he ʻOtuá ʻa Sīsū ke fanauʻi mai ki he māmaní ko ha tangatá? Ko e hā ʻa e ngafa makehe naʻe fakahoko ʻe Sīsuú? ʻE lava ke ke maʻu ʻa e ngaahi tali ki he ngaahi fehuʻi ko iá ʻi he Tohi Tapú pea te nau fakaleleiʻi lahi ʻa hoʻo mahino mo e houngaʻia ki he meʻa kuo fai ʻe he ʻOtuá mo Sīsū maʻaú.