Ko e Hā ʻOku Fehuʻia Ai ʻa e Lotú?

Tau pehē ʻoku fiemaʻu ke fai kiate koe ha tafa ki ha mahaki ʻoku fakatuʻutāmaki ki he moʻuí. Te ke loto ke maʻu ha falala moʻoni ki he toketā tafá he ko hoʻo moʻuí ʻe ʻi hono ʻaofinimá. ʻIkai ʻe fakapotopoto ke vakaiʻi ʻa e lēkooti ʻo ʻene taukeí?

ʻI he tuʻunga meimei tatau, ʻoku fakapotopoto ke sivisiviʻi lelei ʻa e lotú. Kapau ʻokú ke kau ki ha kautaha fakalotu, ko hono moʻoní ʻokú ke tuku hoʻo moʻui fakalaumālié ki honau nimá. ʻOku kau ki heni hoʻo ngaahi ʻamanaki ki he fakamoʻuí.

Naʻe ʻomai ʻe Sīsū ʻa e tefitoʻi moʻoni ke tokoniʻi kitautolu ke vakaiʻi ʻa e lotú ʻi he founga māʻalaʻala. Naʻá ne pehē: “Ko e ʻakau taki taha ʻoku ʻiloʻi ia ʻi hono fua ʻoʻoná.” (Luke 6:44) Ko e fakatātaá, ʻi hoʻo sio ki ha lotu tefito pe siasi, ko e hā ʻa e fua ʻoku hā mei aí? ʻOku tō lahi ange ʻa e fakamamafa ʻa hono kau taki lotú ki he paʻangá? ʻOku muimui ʻa hono kau mēmipá ʻi he ngaahi tefitoʻi moʻoni ʻa e Tohi Tapú ʻi he fekauʻaki mo e taú mo e ʻulungāngá? Fakaʻosí, ʻoku ʻi ai ha toe lotu ʻoku tuha mo e falalá? ʻOku mau fakaafeʻi koe ke ke sivisiviʻi ʻa e ngaahi kupu hoko maí.