Naʻá Ne “ʻIlo ʻa e Hala”

KO Guy Hollis Pierce, ko ha mēmipa ʻo e Kulupu Pule ʻo e Kau Fakamoʻoni ʻa Sihová, naʻe ngata ʻene ʻalunga moʻui ʻi he māmaní ʻi he Tūsite, Maʻasi 18, 2014, ʻi hono taʻu 79. ʻI he tuʻunga ko e taha ʻo e fanga tokoua ʻo Kalaisí, naʻe fokotuʻu hake ia pea maʻu hono pale fakahēvaní.—Hep. 2:10-12; 1 Pita 3:18.

Naʻe fanauʻi ʻa Guy Pierce ʻi Auburn, Kalefōnia, U.S.A., ʻi Nōvema 6, 1934, pea naʻá ne papitaiso ʻi he 1955. Naʻá ne mali mo hono uaifi ʻofaʻangá, ʻa Penny, ʻi he 1977 pea tauhi ha fāmili. Naʻá ne toe hangē foki ha tamai ki he niʻihi kehe tokolahi. ʻI he 1982 naʻá ne kamata tāimuʻa fakataha mo Penny. Kamata ʻi he 1986, naʻá ne ngāue ko ha ʻovasia sēketi ʻi he ʻIunaite Seteté ʻi he taʻu ʻe 11.

ʻI he 1997, naʻe kamata ngāue ʻa Guy mo Penny Pierce ko ha mēmipa ʻo e fāmili Pēteli ʻi he ʻIunaite Seteté. Naʻe ngāue ʻa Tokoua Pierce ʻi he Potungāue Ngāué, pea ʻi he 1998 naʻe fakanofo ia ko ha tokotaha tokoni ki he Kōmiti Kau Ngāue ʻa e Kulupu Pulé. ʻI ʻOkatopa 2, 1999, ʻi he fakataha fakataʻú, naʻe fanongonongo ai kuo fakanofo ia ko ha mēmipa ʻo e Kulupu Pulé. ʻI he ngaahi taʻu ki mui ní, naʻá ne ngāue ʻi he ngaahi taimi kehekehe mo e kōmiti Kau Ngāué, Hiki-Tohí, Pulusí mo e Kouʻotineitá.

Ko ha tokotaha mata malimali mo fakakata ʻa Tokoua Pierce. Naʻe ongoʻi faingofuaʻia ʻa e kakai mei he puipuituʻa mo e anga-fakafonua kehekehe ʻi he feohi mo iá. Ka ko e meʻa naʻá ne tohoakiʻi moʻoni ʻa e kakaí kiate iá ko ʻene ʻofá, ko ʻene anga-fakatōkilaló, ko ʻene fakaʻapaʻapa ki he ngaahi lao mo e tefitoʻi moʻoni ʻa e ʻOtuá mo ʻene falala kakato kia Sihová. Naʻe faʻa pehē ʻe Guy Pierce ʻe ala lava ange ke ʻikai hopo hake ʻa e laʻaá ʻi he ʻikai ke hoko moʻoni mai ʻa e ngaahi talaʻofa ʻa Sihová, pea naʻá ne loto ke ʻiloʻi ʻe he māmaní kotoa ʻa e meʻá ni.

Naʻe ngāue mālohi ʻa Tokoua Pierce kia Sihova, ʻo kamata pongipongia maʻu pē pea faʻa ngāue ʻo aʻu ki he tuʻuapoó. Naʻá ne fononga holo he māmaní ke fakalototoʻaʻi hono fanga tokoua mo e fanga tuofāfine Kalisitiané, pea naʻe ʻikai ke ne fuʻu femoʻuekina ke fakamoleki ha taimi mo ha taha pē naʻá ne fiemaʻu ʻene tokoní pe faleʻí. Naʻa mo e ngaahi taʻu lahi ki mui ai, ʻoku manatuʻi ʻe he ngaahi kaungātuí ʻene anga-talitali kakaí, anga-fakakaumeʻá mo e fakalototoʻa Fakatohitapú.

Ko hotau tokoua mo siʻotau kaumeʻá ʻe ongoʻi moʻoni ʻene pulí ʻe hono uaifí, fānau ʻe toko ono, hono fanga makapuna mo e fanga makapuna-ua mo ʻene fānau fakalaumālie tokolahí. Ko Mark Sanderson, ko ha kaungāmēmipa ʻo e Kulupu Pulé, naʻá ne fai ʻa e malanga putu ʻo Tokoua Pierce ʻi he Pēteli ʻi Brooklyn ʻi he Tokonaki, Maʻasi 22, 2014. Naʻá ne malanga fekauʻaki mo e ʻamanaki fakahēvani ʻa Tokoua Pierce pea lau ʻa e lea ʻa Sīsū: “ʻI he fale ʻo ʻeku Tamaí ʻoku lahi ai ʻa e ngaahi nofoʻangá. . . . Kapau te u ʻalu ʻo teuteu ha potu moʻomoutolu, te u toe haʻu pea te u maʻu mai kimoutolu kiate au ki hoku ʻapí, koeʻuhi ko e feituʻu ʻoku ou ʻi aí ke mou ʻi ai foki. Pea ko e feituʻu ʻoku ou ʻalu ki aí ʻoku mou ʻilo ʻa e hala ki aí.”—Sione 14:2-4.

Te tau ongoʻi moʻoni ʻa e puli ʻa Tokoua Pierce. Ka ʻoku tau fiefia naʻá ne “ʻilo ʻa e hala” ki hono ‘nofoʻanga’ tuʻuloá.