Ko e Hā Te Ne ʻAi ke Fakamānakó?

Fakapipiko? Pe fakaivifoʻou? ʻE fēfē hoʻo lau Tohi Tapú? Ko e lahi tahá ʻoku makatuʻunga ia mei hoʻo founga lautohí. Tau vakai angé ki he meʻa ʻe lava ke ke fai ke fakamānako mo fakafiefia ange ai hoʻo lautohí.

Fili ha liliu Tohi Tapu alafalalaʻanga ʻi onopooni. Kapau te ke lau ʻa e fakamatalá ʻoku ʻi ai ha ngaahi foʻi lea motuʻa mo faingataʻa ke mahinoʻi ʻe ngalingali heʻikai te ke fiefia ke lau ia. Ko ia kumi ha Tohi Tapu ʻoku ngāueʻaki ai ʻa e lea ʻoku faingofua ke mahinoʻi ʻa ia ʻe aʻu ki ho lotó. Neongo ia, ʻi he taimi tatau ʻoku totonu ke sivisiviʻi fakalelei pe ʻoku tonu ʻa e liliú.a

Ngāueʻaki ʻa e tekinolosia ʻi onopōní. ʻI he ʻahó ni ʻoku ʻikai ngata pē hono maʻu ʻa e Tohi Tapú ʻi ha takainga tohi, tatau ʻosi pulusi ka ʻoku toe maʻu ia ʻi ha tatau fakaʻilekitulōnika. Ko e ngaahi Tohi Tapu ʻe niʻihi ʻoku lava ke lau ia ʻi he ʻinitanetí pe hiki ia ki he komipiutá, tepiletí pe ngaahi telefoni toʻotoʻó ke lau fakafoʻituitui ia. ʻOku ʻi ai ha ngaahi founga foʻou ʻo kau ai ʻa e ngaahi meʻangāue ko ení ʻa ia ʻoku lava ai ke vave hoʻo vakaiʻi ʻa e ngaahi veesi kehe ʻi he Tohi Tapú ʻi ha kaveinga tatau pe naʻa mo hano fakahoa ʻo e ngaahi liliu kehé. Kapau ʻokú ke saiʻia ange ke fanongo pē ki ai kae ʻikai lau, ʻoku toe ala maʻu ʻa e Tohi Tapú ʻi ha tatau kuo hiki-leʻo. ʻOku saiʻia ʻa e kakai tokolahi ke fanongo ki ai lolotonga haʻanau fefonongaʻaki, fai e foó pe fai ha faʻahinga ngāue ʻoku kei lava pē ke fanongo ki ai. Ko e hā ʻoku ʻikai ke ke ʻahiʻahiʻi ai ʻa e founga ʻoku feʻungamālie mo koé?

Ngāueʻaki ʻa e ngaahi meʻangāue ki he ako Tohi Tapú. Ko e ngaahi meʻangāue ki he ako Tohi Tapú ʻoku lava ke ne tokoniʻi koe ke maʻu ʻaonga lahi ange ai ʻi hoʻo lautohí. ʻOku ʻi ai ha ngaahi mape ʻi he ngaahi fonua ʻi he Tohi Tapú, ʻa ia ʻoku lava ke ne tokoniʻi koe ke ke ʻiloʻi ʻa e feituʻu ʻi he Tohi Tapú ʻokú ke laú pea ʻai ke moʻoni ange kiate koe ʻa e ngaahi meʻa ʻoku hoko aí. Ko e ngaahi kupu ʻo hangē ko ia ʻoku ʻi he makasini ko ení pe ko ia ʻi he “Bible Teachings” ʻi he uepisaiti jw.org, ʻoku lava ke ne tokoniʻi koe ke ke ʻiloʻi ʻa e ʻuhinga ʻo e ngaahi konga lahi ʻi he Tohi Tapú.

Fulifulihi hoʻo founga lautohí. Kapau ʻokú ke lau ʻa e Tohi Tapú mei he takafi ʻe tahá ki heʻene ʻosi ʻe hā ngali fakapipiko, ko e hā ʻoku ʻikai ʻai ai ke fakamānako ange hoʻo lautohí ʻaki ʻa e kamata lau ʻa e konga ʻoku fakamānako taha kiate koé? Kapau ʻokú ke loto ke ʻiloʻi ʻa e kakai ʻiloa ʻi he Tohi Tapú, ʻe lava ke ke kamata ʻi hono lau ʻa e ngaahi vahe ʻoku fekauʻaki mo kinautolú. ʻOku ʻi ai ha sīpinga ʻe ua ʻoku ʻasi ʻi he puha, “Fekumi ke ʻIloʻi ʻa e Kakai ʻi he Tohi Tapú.” Pe mahalo nai te ke saiʻia ke lau ʻa e Tohi Tapú fakafou ʻi ha ngaahi kaveinga pe ko ha ngaahi meʻa naʻe hoko hokohoko. Ko e hā ʻoku ʻikai ʻahiʻahiʻi ai ha taha ʻo e ngaahi foungá ni?