ʻOku ʻAi Kitautolu ʻe he Ngāue Fakamalangá Ke Tau Kehe

¹ ʻOku ʻeke ʻe he kakai tokolahi, “Ko e hā ʻokú ne ʻai ʻa e Kau Fakamoʻoni ʻa Sihová ke nau kehe mei he ngaahi lotu kehé?” ʻE anga-fēfē haʻo tali? Te ke malava ʻo fakamatalaʻi ha niʻihi ʻo ʻetau ngaahi tui makatuʻunga ʻi he Tohitapú. Ka kuó ke toe fakakaukau fekauʻaki mo hono fakahaaʻi ʻa e lahi ʻo hono ʻai kitautolu ʻe heʻetau ngāue fakafaifekau ki he kakaí ke tau kehe ai mei he ngaahi lotu kehé?​—Mt. 24:14; 28:​19, 20.

² ʻI he ʻahó ni, ko e kakai lotu tokosiʻi pē ʻoku nau ongoʻi ʻoku ueʻi kinautolu ke vahevahe atu ʻenau ngaahi tuí ki ha niʻihi kehe. ʻOku nau fakakaukau nai ʻoku taau ke talangofua ki he ngaahi lao ʻa Sisá, ke taki atu ki he moʻui ʻulungaanga lelei, pe ko hono fai ha ngaahi ngāue anga-ʻofa ki he niʻihi kehé. Kae kehe, ʻoku ʻikai ke nau ongoʻi ʻa e fatongia ke tokoniʻi ʻa e niʻihi kehé ke ako ʻa e meʻa ʻoku leaʻaki ʻe he Tohitapú fekauʻaki mo hono maʻu ʻa e fakamoʻuí. ʻOku anga-fēfē ʻetau kehé?

³ Ko ʻetau ngāue fakafaifekau faivelengá ʻoku tuʻu ia ʻo kehe ʻaupito mei he ngaahi ngāue ʻa e ngaahi lotu kehé. Laka hake ʻi he taʻu ʻe 100, kuo malanga tōtōivi ʻaki ai ʻe he Kau Fakamoʻoni ʻi onopōní ʻa e ongoongo leleí ki he ngataʻanga ʻo e māmaní, ʻi he faʻifaʻitaki ki he muʻaki kau Kalisitiané. Ko ʻetau taumuʻa ʻi hono fai iá ke tokoniʻi ʻa e kakai lahi ange ʻe malavá ke ʻomai ʻenau moʻuí ke fehoanaki mo e finangalo ʻo e ʻOtuá.​—1 Tim. 2:4; 2 Pita 3:9.

⁴ Ko e Hā Ho Ongoongó? ʻOku ʻiloa koe ko ha tokotaha malanga faivelenga ʻo e Folofola ʻa e ʻOtuá? (Ng. 17:​2, 3; 18:25) Koeʻuhi ko hoʻo ngāue fakamalangá, ʻoku sio moʻoni mai ho kaungāʻapí ki he faikehekehe ʻi heʻenau lotú mo hoʻo lotú? ʻOku ʻiloa koe ko ha tokotaha ʻoku vēkeveke ke vahevahe ʻene ʻamanakí ki he niʻihi kehé? ʻOku ʻi ai haʻo taimi-tēpile tuʻumaʻu ke ke kau ai ki he ngāue fakafaifekaú? Manatuʻi ʻoku tau fakafaikehekeheʻi kitautolu ʻo ʻikai ʻaki hotau hingoá pē, ka ʻoku toe pehē foki ki heʻetau fai ʻa e meʻa ʻoku fakamatalaʻi ʻe he hingoa ko iá​—ko e faifakamoʻoni fekauʻaki mo Sihova.​—Ai. 43:10.

⁵ Ko e ʻofa ki he ʻOtuá pea ki he kaungāʻapí ʻoku ueʻi ai kitautolu ke tau kau ʻi he ngāue fakamalangá. (Mt. 22:​37-39) Ko e ʻuhinga ia, ʻoku tau hangē ai ko Sīsū pea mo e kau ʻapositoló, ʻo tau fiemaʻu ke ngāueleleiʻaki ʻa e faingamālie kotoa pē ke vahevahe atu ʻa e pōpoaki ʻo e Puleʻangá ki he niʻihi kehé. ʻOfa ke tau hokohoko atu ke malangaʻi ʻa e ongoongo leleí ʻi he faivelenga ki he faʻahinga ʻoku nau loto-lelei ke fanongó. ʻI he fai peheé ʻe tokoniʻi ai ʻa e faʻahinga loto-totonú ke nau “sio ki he fai kehe kehe . . . ʻa e taha ʻoku ngaue ki he ʻOtua mo ia ʻoku ʻikai ke ngaue ki ai.”​—Mal. 3:18.