Ko Hai ʻa e Tuʻi ʻo e Puleʻanga ʻo e ʻOtuá?

• Fili ʻe he ʻOtuá. “Ko au kuó u fokotuʻu ʻa ʻeku tuʻí . . . Te u ʻoatu ʻa e ngaahi puleʻangá ko ho tofiʻa pea mo e ngaahi ngataʻanga ʻo e māmaní ko ho ʻinasi.”—Saame 2:6, 8.

• Hoko ko e ʻea ʻo Tuʻi Tēvita. “Kuo fanauʻi mai kiate kitautolu ha tama, kuo foaki mai kiate kitautolu ha foha . . . Ko e lahi ʻo ʻene pulé mo e melinó, ʻe ʻikai hano ngataʻanga, ʻi he taloni ʻo Tēvitá mo hono puleʻangá koeʻuhí ke fokotuʻu maʻu ia.”—ʻAisea 9:6, 7.

• ʻAloʻi ʻi Pētelihema. “ʻE Pētelihema . . . , ʻe haʻu meiate koe maʻaku ʻa e tokotaha te ne hoko ko e pule . . . Ko hono mafaí ʻe aʻu ia ki he ngaahi ngatangataʻanga ʻo e māmaní.”—Maika 5:2, 4.

• Talitekeʻi ʻe he tangatá pea tāmateʻi. “Naʻe taʻetokaʻi ia, pea naʻa mau vakai kiate ia ʻoku ʻikai hano mahuʻinga. . . . Naʻe hokaʻi ia koeʻuhi ko ʻemau laka halá; naʻe laiki ia koeʻuhí ko ʻemau ngaahi faihalá.”—ʻAisea 53:3, 5.

• Fokotuʻu hake mei he maté pea fakalāngilangiʻi. “Heʻikai te ke tuku au ʻi he Faʻitoká. ʻE ʻikai te ke tuku ʻa hoʻo tokotaha mateakí ke sio ki he luó. . . . ʻOku ʻi ai ʻa e fiefia ʻi ho nima toʻomataʻú ʻo taʻengata.”—Saame 16:10, 11.

Sīsū Kalaisi—Taau Moʻoni

ʻI he kotoa ʻo e hisitōlia ʻo e faʻahinga ʻo e tangatá, ko e toko taha pē kuo feʻungamālie mo hono fakamatalaʻi ko ha Pule tāú; ko Sīsū Kalaisi. Ko hono moʻoní, naʻe tala ange ʻe ha ʻāngelo kia Mele, ʻa e faʻē ʻa Sīsuú: “Ko e ʻOtuá te ne ʻoange kiate ia ʻa e taloni ʻo Tēvita ko ʻene tamaí, . . . pea ko hono Puleʻangá ʻe ʻikai hano ngataʻanga.”—Luke 1:31-33.

Naʻe ʻikai ʻaupito ke hoko ʻa Sīsū ko ha pule ʻi he māmaní. ʻI hono kehé, te ne pule ki he faʻahinga ʻo e tangatá mei hēvani ko e Tuʻi ʻo e Puleʻanga ʻo e ʻOtuá. Ko e hā ʻokú ne taau moʻoni ai ko ha Pulé? Fakakaukau ki he meʻa naʻe fai ʻe Sīsū ʻi heʻene ʻi māmaní.

• Naʻe tokanga ʻa Sīsū ki he kakaí. Naʻe tokoniʻi ʻe Sīsū ʻa e kau tangata mo e kau fefine, kei siʻi mo e taʻumotuʻa, ʻo tatau ai pē pe ko e hā honau puipuituʻá pe tuʻungá. (Mātiu 9:36; Maʻake 10:16) ʻI he kōlenga ha tokotaha kilia kia Sīsū: “Kapau te ke loto pē ki ai, ʻe lava ke ke ʻai au ke u maʻa,” naʻe ueʻi ia ʻe he fakaʻofaʻiá ke ne fakamoʻui ʻa e tangatá.—Maʻake 1:40-42.

• Naʻe akoʻi mai ʻe Sīsū ʻa e founga ke fakahōifuaʻi ai ʻa e ʻOtuá. Naʻá ne pehē: “Heʻikai lava ke mou ngāue fakatamaioʻeiki ki he ʻOtuá pea ki he Koloá.” Naʻá ne toe pehē kuo pau ke tau fai ki he niʻihi kehé ʻa e meʻa ʻoku tau loto ke nau fai mai kiate kitautolú—ʻa ia ʻoku ʻiloa ko e Lao Koulá. ʻIkai ko ia pē, naʻá ne fakahaaʻi ʻoku ʻikai ngata pē ʻa e mahuʻingaʻia ʻa e ʻOtuá ʻi he meʻa ʻoku tau faí kae pehē foki ki he anga ʻetau fakakaukaú mo e ongoʻí. Ko ia ke fakahōifuaʻi ʻa e ʻOtuá, kuo pau ke tau mapuleʻi ʻetau ngaahi ongoʻi lolotó. (Mātiu 5:28; 6:24; 7:12) Naʻe fakamamafaʻi ʻe Sīsū ke tau hoko ʻo fiefia moʻoní, kuo pau ke tau ako ʻa e meʻa ʻoku loto ʻa e ʻOtuá ke tau faí pea fai leva ia.—Luke 11:28.

• Naʻe akoʻi mai ʻe Sīsū ʻa e ʻofá. Ko e ngaahi lea mo e ngāue ʻa Sīsuú naʻe ʻaonga pea maongo ki he loto ʻene kau fanongó. “Naʻe fakatumutumu ʻa e fuʻu kakaí ʻi heʻene founga faiakó, he naʻá ne faiako kiate kinautolu ʻo hangē ko ha taha ʻokú ne maʻu ha mafaí.” (Mātiu 7:28, 29) Naʻá ne akoʻi kinautolu: “ʻOfa ki homou ngaahi filí.” Naʻe aʻu ʻo ne lotu maʻá e faʻahinga naʻa nau kaunga ki hono tāmateʻi iá: “Tamai, fakamolemoleʻi kinautolu, he ʻoku ʻikai te nau ʻilo ʻa e meʻa ʻoku nau faí.”—Mātiu 5:44; Luke 23:34.

Ko Sīsū ʻa ia ʻoku fie tokoni mo anga-leleí ʻokú ne taau moʻoni ke hoko ko e Pule lavameʻa ki he māmaní. Ka ʻe kamata fakakū ʻene pulé?