Maʻu ʻAonga mei Hono Ako ʻa e Tohi ʻUnuʻunu Ofi kia Sihova

1. Naʻe anga-fēfē ongoʻi ʻa ha tokotaha fekauʻaki mo e tohi ʻUnuʻunu Ofi kia Sihova?

¹ “ʻOku ou fakamālō atu ʻaki e kotoa ʻo hoku lotó ʻi he meʻaʻofa fakaʻofoʻofa ko ia ko e tohi ʻUnuʻunu Ofi kia Sihova. Naʻá ne fakalato ha meʻa naʻe ʻikai ke ʻi hoku lotó—ko e fiemaʻu ke ongoʻi ʻoku ʻofaʻi mo tokangaʻi ʻe Sihova. ʻOku ou ongoʻi ofi ʻaupito ange kia Sihova mo hono ʻAlo ʻofaʻangá he taimí ni. ʻOku ou loto ke talanoa ki he tokotaha kotoa fekauʻaki mo e tohí ni pea ke ʻave ha tohi ki he faʻahinga kotoa ʻoku ou ʻofa aí.” Ko e anga ia ʻo e ongoʻi ʻa e taha ʻo e Kau Fakamoʻoni ʻa Sihová fekauʻaki mo e tohi peesi ʻe 320 ʻi hono tukuange mai ʻi he lea faka-Pilitāniá, ʻi he Ngaahi Fakataha-lahi Fakavahe “Kau Fanongonongo Faivelenga ʻo e Puleʻangá” naʻe fai lolotonga ʻa e 2002/03. Tau vakaiʻi angé ʻa e ngaahi tafaʻaki ʻe niʻihi ʻo e tohí ni mo e ʻuhinga naʻe pulusi aí.

2. Ko e hā ʻoku mātuʻaki fiemaʻú pea ʻoku anga-fēfē tokoni ʻa e faʻunga ʻo e tohí ki he fakalaulaulotó?

² Te tau kamata lāulea ʻi Maʻasi ki he tohi ʻUnuʻunu Ofi kia Sihova ʻi he ako Tohi Tapu ʻa e Fakatahaʻangá. ʻE lava fēfē nai ke tau maʻu ʻaonga mei heʻetau akó? ʻOku mātuʻaki fiemaʻu ʻa e teuteú. ʻE vaheʻi ʻa e uike ʻe ua ki he vahe taki taha, fakataha mo ha ngaahi palakalafi ʻikai loko lahi kuo fakataimitēpileʻi ki he akó ʻi he uike taki taha. ʻE lava heni ke ʻi ai ʻa e taimi feʻunga ki hoʻo tali mei ho lotó makatuʻunga ʻi hoʻo ako mo e fakalaulauloto ki he fakamatalá. ʻIkai ko ia pē, ʻe toe siʻi ange ʻa e ngaahi palakalafi ʻe lāulea ki ai lolotonga ʻa e ngaahi uike ʻe fakamanatu ai ʻa e konga fakaʻosi ʻo ha vahe, ke maʻu ai ha taimi ke ngāueʻaki ai ha tafaʻaki makehe ʻo e tohí.

3. Fakamatala ki ha ngaahi tafaʻaki ʻe niʻihi ʻo e tohí.

³ Kamata ʻi he vahe 2, ʻe hā ai ha puha kuo fakakaveinga ko e “Ngaahi Fehuʻi ki he Fakalaulauloto” ofi ki he ngataʻanga ʻo e vahe taki taha. Hili e lāulea ki he palakalafi fakaʻosi ʻi he vahé, ʻe ʻai ʻe he ʻovasia ako tohí ke fetalanoaʻaki ʻa e kulupú ʻi he puhá. Te ne fakaʻaiʻai ʻa e kau mēmipa ʻo e kulupú, ke nau fakamatala ki he ngaahi poini lelei kuo maʻu mei heʻenau fakalaulauloto ki he Tohi Tapú. (Pal. 20:5) Tānaki atu ki he ngaahi fehuʻi ʻoku ʻomai ʻi he puhá, te ne ʻeke nai he taimi ʻe niʻihi ʻa e ngaahi fehuʻi hangē ko ení: “Ko e hā ʻoku tala atu kiate koe ʻe he fakamatala ko ení fekauʻaki mo Sihová? ʻOku anga-fēfē ʻene ueʻi ʻa hoʻo moʻuí? ʻE lava fēfē ke ke ngāueʻaki ia ke tokoniʻi ʻa e niʻihi kehé?” Ko ʻene taumuʻá ke maʻu ha tali mei he lotó, ʻo ʻikai ko hono siviʻi ʻa e kulupú fekauʻaki mo ha fanga kiʻi fakaikiiki.

4. Ko e hā ʻa e tafaʻaki ʻoku fakahoko ʻe he faiakó ʻi hono ʻai ke tau maʻu ʻaonga mei he akó?

⁴ Ko e tohi ʻUnuʻunu Ofi kia Sihova ʻoku makehe. Neongo ko e ʻū tohi kotoa ʻa e “tamaioeiki agatonu mo boto” ʻoku fakalāngilangiʻi ai ʻa Sihova, ʻoku vaheʻi ʻataʻatā ʻa e tohí ni ki ha fetalanoaʻaki ki he ʻulungaanga ʻo Sihová. (Mt. 24:45-47, PM) Ko ha faingamālie fakaueʻiloto moʻoni ia ʻoku tatali mai kia kitautolú! Te tau maʻu ʻaonga lahi mei hano ako fakamātoato ʻa e ʻulungaanga ʻo Sihová. ʻOfa ke tokoniʻi kitautolu ʻe he akó ke tau ʻunuʻunu ofi ange ai ki heʻetau Tamai fakahēvaní, pea ʻofa ke tau hoko ai ʻo ola lelei ange ʻi hono tokoniʻi ʻa e niʻihi kehé ke nau fai ʻa e meʻa tatau.