Tāpuaki Maʻá e Kau Talangofua ki he ʻOtuá

Naʻe pehē ʻe he palōfita ko Mōsesé kapau te tau talangofua ki he fekau ʻa e ʻOtuá, te tau maʻu ai ʻene tāpuakí. (Teutalōnome 10:13; 11:27) ʻOku ʻikai ke tau talangofuá ko ʻetau manavahē naʻa tauteaʻi kitautolu ʻe he ʻOtuá. ʻOku ueʻi kitautolu ʻe he ngaahi ʻulungaanga fakaʻofoʻofa ʻo e ʻOtuá ke tau talangofua kiate ia he ʻoku tau ʻofa kiate ia pea ʻoku tau loto ke fakaʻehiʻehi mei hono fakalotomamahiʻi nai iá. “Ko e meʻa ʻeni ʻoku ʻuhinga ki ai ʻa e ʻofa ki he ʻOtuá, ko ʻetau tauhi ʻene ngaahi fekaú.”​—1 Sione 5:3.

Ka ko e hā ʻa e tāpuaki te tau maʻu mei he talangofua ki he ʻOtuá? Fakakaukau ki he tafaʻaki ʻe ua.

1. TALANGOFUA KI HE ʻOTUÁ TE NE ʻAI KE TAU POTO

“Ko au Sihova, ko ho ʻOtuá, ʻa e Tokotaha ʻokú ne akoʻi koe ke ke maʻu ʻaonga aí, . . . ʻokú ne tataki koe ʻi he hala ʻoku totonu ke ke fou aí.”​—ʻAISEA 48:17.

Ko Sihova ko e ʻOtuá, ʻa hotau Tokotaha-Fakatupú, ʻokú ne ʻiloʻi kitautolu pea tokonaki mai ʻa e tataki ʻoku tau fiemaʻú. Kapau ʻoku tau loto ke tokoniʻi kitautolu ʻe heʻene akonakí ke fai ʻa e fili fakapotopotó, kuo pau ke tau ako mei he Folofolá ʻa e meʻa ʻoku fiemaʻu ʻe he ʻOtuá ke tau faí pea ngāueʻaki leva ia.

2. TALANGOFUÁ TE NE ʻAI KE TAU FIEFIA

“He fiefia ē ko e faʻahinga ʻoku fanongo ki he folofola ʻa e ʻOtuá pea tauhi iá!”​—LUKE 11:28.

ʻI he ʻahó ni, ko e laui miliona ʻoku nau muimui ki he Folofola ʻa e ʻOtuá ʻoku nau fiefia moʻoni. Ko e fakatātaá, fakakaukau ki ha tangata ʻi Sipeini naʻá ne ʻita tōlili pea ngaohikoviʻi anga-kakaha ʻa e niʻihi kehé​—kau ai hono uaifí. ʻI he ʻaho ʻe taha naʻá ne lau ʻa e tohi ʻa e palōfita ko Mōsesé fekauʻaki mo ha tokotaha anga-malū ko Siosifa, ʻa e foha ʻo Sēkope. Naʻe fakatau atu ʻa Siosifa ko ha pōpula pea tuku pōpula taʻetotonu ia; ka naʻá ne anga-malū, fakamelino mo faʻa fakamolemole. (Sēnesi, vahe 37-45) Naʻe pehē ʻe he tangata ʻi Sipeiní: “ʻI he fakakaukau fekauʻaki mo e faʻifaʻitakiʻanga ʻa Siosifá naʻá ne ueʻi au ke fakatupulekina ʻa e anga-malū, anga-lelei mo e mapuleʻi-kita. Ko hono olá, ʻoku ou maʻu he taimí ni ha moʻui fiefia.”

ʻOku ʻomai ʻi he Folofolá ʻa e tataki lahi ange ki he founga ʻoku totonu ke tau fakafeangai ai ki he niʻihi kehé. Vakai ki ha fakaikiiki lahi ange ʻo e meʻá ni ʻi he kupu hokó.